GODANG do halak na manukkun songon i. Bibel mandok ditangihon Jahowa do tangiangta. Alai ditangihon Debata manang na dang tangiangta i, tergantung tu hita do.

Muruk do Jesus tu akka pamimpin agama di tikki i, ala munafik do nasida. Nasida martangiang holan lao pamer tu akka halak. Jesus mandok, “Nungnga dijalo nasida be sude upa ni nasida.” (Mateus 6:5) Artina, nungnga dapot ni nasida be na dilului nasida, i ma pujian sian akka halak. Alai sasittongna, dang dibege Debata tangiang ni nasida. Songon i do tong akka halak saonari. Godang do na martangiang mangihutton lomo ni rohana sandiri. Dang diihutton nasida akka poda ni Bibel na baru tabahas i. I do alana dang dibege Debata tangiang ni nasida.

Songon dia do molo hamu? Ditangihon Debata do tangiangmuna? Dang soal aha margamuna, bangsomuna, mamora manang na dang, ditangihon Debata do tangiangmuna. Bibel mandok, “So marimbar jolma di jolo ni Debata. Lomo do roha ni Debata mangida ganup halak na makkabiari Ibana jala na mangulahon na sittong, dang soal sian bangso na dia pe nasida.” (Ulaon ni Apostel 10:34, 35) Halak na songon i do hamu? Molo dihabiari hamu Debata, pasti dipasangap hamu do Ibana. Dang olo hamu mambahen haccit rohana. Molo lomo rohamuna mangulahon na sittong, pasti berupaya do hamu mangulahon lomo ni roha ni Debata. Dang na lomo ni rohamuna sandiri, manang halak na asing. Lomo do rohamuna ditangihon Debata tangiangmuna? Taida ma carana sian Bibel. *

Memang, godang do halak na mangido asa dibahen Debata mukjizat lao mangalusi tangiangna. Haru di zaman ni Bibel, jarang do Debata mambahen mukjizat. Olo do sada mukjizat dibahen, dung marratus taon baru pe dibahen muse mukjizat na asing. Jala nungnga dipaboa di Bibel dung salpu jaman ni akka apotel dang adong be mukjizat. (1 Korint 13:​8-​10) Molo songon i, na so dialusi Debata be tangiang ni akka halak saonari? Dang na songon i! Parrohahon ma piga-piga tangiang na dialusi Ibana.

Dilehon Debata do bisuk. Sian Jahowa do sude bisuk na sittong. Jala las do rohana mangalehon i tu akka halak na mangido jala na mangulahon tudu-tuduna.​—Jakobus 1:5.

Dilehon Debata do tondi parbadia. Tenaga ni Debata do tondi parbadia i. Dang adong tenaga na umgogo sian i. On boi mangurupi hita tikki manaon sitaonon. Mambahen dame roha tikki susa. Jala on boi mangurupi hita patuduhon akka parange na denggan. (Galatia 5:​22, 23) Jesus mandok pasti lehonon ni Debata do tondi parbadiana tu akka sisomba Ibana.​—Lukas 11:13.

Dilehon Debata do parbinotoan tu akka halak na mangalului Ibana. (Ulaon ni Apostel 17:26, 27) Di liat portibi on, adong do akka halak na mangalului hasittongan. Hasittongan taringot Debata, ise goarna, aha do na lao dibahen Ibana tu tano on dohot tu akka jolma, jala songon dia asa boi jonok tu Ibana. (Jakobus 4:8) Jotjot do Saksi Jahowa pajuppang dohot halak sisongon i. Jala las do roha ni nasida mangurupi akka halak mangalusi sukkun-sukkun i.

Alani i do dijalo hamu majalah on? Lomo do rohamuna mangalului hasittongan taringot Debata? Olo da ra on alus ni tangiangmuna.