Prea

 7 ?God i Harem Mo i Ansa?

KWESTIN ya antap i pulum tingting blong yumi, from we yumi wantem tumas blong save samting ya. Baebol i talem se, yes, Jeova i stap harem prea blong ol man tede. Be i stap long yumi wanwan nao blong mekem se Jeova bambae i harem prea blong yumi.

Jisas i tok agensem ol lida blong jos long taem blong hem, from we oli stap prea be oli gat tu fes. Taem oli prea, oli no tingbaot God. Oli tingbaot nomo se man i mas luk olgeta se oli stret man. Jisas i talem se ol man ya oli “kasem pei blong olgeta finis.” From we oli wantem tumas we man i luk olgeta, ale bambae ol man oli save luk olgeta, hemia nao pei blong olgeta. Be sore tumas, bambae oli no kasem samting we oli askem long prea, from we God bambae i no harem olgeta. (Matiu 6:5) Tede tu i sem mak. Plante man oli prea from samting we olgeta nomo oli wantem. Oli no tingbaot wanem we God i wantem. Ol man olsem, oli no stap folem ol rul blong Baebol we yumi tokbaot finis long saed blong prea. Taswe God i no harem prea blong olgeta.

?Be olsem wanem long yu? ?God bambae i harem mo i ansa long prea blong yu? God i no stap lesin long prea blong man folem kala blong skin blong hem no kantri blong hem. Hem i no lukluk tu sipos man i hae man no i pua man. Baebol i talem olsem se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:34, 35) ?Yu yu wan man olsem? Sipos yu ona long God i min se yu tinghae long hem, yu no wantem mekem wan samting we bambae i mekem God i harem nogud. Sipos yu mekem ol samting we i stret long fes blong God, i min se yu stap traehad blong faenemaot wanem fasin we i stret long lukluk blong God. Yu no stap folem tingting blong yu wan nomo, mo yu no stap folem tingting blong ol narafala man tu. ?Olsem wanem? ?Yu yu wantem tumas we God i harem ol prea blong yu? Baebol i save halpem yu long saed ya. *

Plante man, taem oli prea long God, oli wantem we hem i mekem merikel wantaem blong givim samting we oli askem. I tru, taem yumi ridim ol stori long Baebol, yumi luk se God i mekem sam merikel olsem. Be hem i no mekem samting ya oltaem. Samtaem God i mekem wan merikel, nao plante handred yia biaen hem i mekem wan narafala merikel bakegen. Mo tu, Baebol i talem se taem ya we God i stap mekem ol merikel, hem i finis finis long taem blong ol aposol bifo. (1 Korin 13:8-10) ?Hemia i min se God i no stap mekem ol samting we yumi askem long prea? !I no minim olsem! I gud yu tingbaot wanem kaen prea nao we God i harem mo i ansarem.

God i givim waes. Jeova, hem i Stamba blong waes. Hem i no holem waes ya i blong hem nomo. Sipos wan man i wantem we God i lidim hem, mo i wantem mekem laef blong hem i laenap wetem waes blong God, ale God i glad nomo blong givim waes ya long hem.—Jemes 1:5.

God i givim tabu spirit. Tabu spirit i paoa blong God we i stap wok. I no gat wan narafala paoa olsem tabu spirit. Paoa ya i save mekem yumi strong taem ol samting oli traem yumi. Hem i save mekem we yumi gat pis long tingting taem yumi wari. Hem i save halpem yumi blong gat ol gudfala fasin. (Galesia 5:22, 23) Jisas i talem long ol man blong hem se God i givim tabu spirit long ol man we oli askem long hem.—Luk 11:13.

God i givim save long man we i wantem save hem. (Ol Wok 17:26, 27) Long olgeta ples long wol, i gat ol man we oli wantem tumas blong save trutok long saed blong God. Oli wantem save nem blong God, oli wantem save wanem stamba tingting blong hem long saed blong wol ya mo ol man, mo oli wantem save olsem wanem blong kam klosap long God. (Jemes 4:8) Plante taem ol Witnes blong Jeova oli mitim ol man olsem, mo oli glad tumas blong halpem ol man ya blong oli faenem ansa blong ol kwestin blong olgeta long Baebol.

?Yu yu stap ridim buk ya from we yu tu yu wantem faenem ansa blong sam kwestin? ?Yu yu wantem tumas blong save God moa? Ating hemia nao rod we God i yusum blong ansa long prea blong yu.

[Futnot]