A CUNGLEI ah langhtermi biahalnak cu lungthawh awk ngai le hngalh duh awk ngai a si. Baibal nih kan thlacamnak kha Pathian nih a kan ngaihpiak tiah a ti. Pathian nih kan thlacamnak a ngaih le ngaih lo cu kanmah cungah aa hngatmi a si.

Jesuh nih i titer in thla a cammi biaknaklei hruaitu pawl kha sual a phawt hna. Annih nih mi nih kan zohcho hna seh ti an duh caah biaknak kha an i ṭanhter. Cu bantuk mi hna nih “an laksawng kha tling tein an hmuh cang” tiah Jesuh nih a ti. Cucaah annih nih hmuh an duhmi minung lungthin peknak kha an hmuh i an herhmi kha Pathian nih a ngaihpiak hna lai lo. (Matthai 6:5) Tuchan zongah cutin a si ve. Mi tampi nih Pathian caah si loin anmah ṭhatnak ca tu ah thla an cam. Annih nih Baibal lamhruainak kha zei ah an rel lo caah Pathian nih an thlacamnak kha a ngaihpiak hna lo.

Nangtah zeitin? Pathian nih na thlacamnak kha a ngai lai maw? A phi cu miphun, ram le zatlang nun cungah aa hngatmi a si lo. Baibal nih hitin bia a kan kamh: “Pathian nih mi vialte kha aa ruang tein a zoh hna ti kha ka hngalh. Mi zei miphun chungmi hmanh a si ah, amah a ṭihmi paoh le dinnak a tuahmi paoh cu a cohlan ko hna.” (Lamkaltu 10:34, 35) Mah bia hi nangmah he tah aa pehtlai ve maw? Pathian ṭih timi cu Pathian kha upat in a lunglawmhter lai lo ṭih kha a si. Dinnak i tlaih timi cu kanmah duhnak le midang duhnak nakin Pathian chimmi pawl tuah awkah i zuam kha a si. Na thlacamnak kha Pathian nih ngai seh ti na duh maw? Baibal nih zeitin kan cam ah dah Pathian nih kan thlacamnak a ngaih lai timi kong kha a fianter.

Mi tampi nih an thlacamnak kha Pathian nih khuaruahhar lam in kan let seh ti an duh. Asinain Baibal chan lio hmanhah Pathian nih khuaruahhar thil kha a rak tuah zungzal lo. A caan ah, a tuahmi khuaruahhar thil pakhat le pakhat kar lakah kum tampi a rau. Mah lengah Baibal nih khuaruahhar thil tuah cu lamkaltu hna chan hnuin a dong cang tiah a ti. (1 Korin 13:​8-​10) Asinain Pathian nih tuchan ah kan thlacamnak cu a ngai lo tinak a si maw? A si lo. Pathian nih a ngaihmi thlacamnak cheukhat kha zohhmanh hna u sih.

Pathian nih fimnak a kan pek. Jehovah cu a hmaanmi fimnak hrampi a si. A lamhruainak kha a zul i mah ningin a nunnak ah a hmangmi hna cu Pathian nih fimnak kha siang ngaiin a pek hna.​—Jeim 1:5.

Pathian nih a thiang thlarau le mah nih a chuahtermi ṭhatnak vialte kha a kan pek. Thiang thlarau timi cu Pathian lawng nih a ngeihmi ṭhawnnak a si. Mah nakin a ngan deuhmi ṭhawnnak a um lo. Thiang thlarau nih hneksaknak kha inkhawh awkah a kan bawmh. Cun sifah harnak kan ton tikah lungdaihnak a kan ngeihter. A dang ziaza ṭha hna zong ngeih awkah a kan bawmh khawh. (Galati 5:​22, 23) Jesuh nih a zultu pawl kha Pathian nih a thiang thlarau kha siang ngaiin aan pek hna lai tiah bia a kamh hna.​—Luka 11:13.

Pathian nih lungtak tein amah a kawlmi hna kha fimnak a pek hna. (Lamkaltu 17:26, 27) Vawleicung pumpi ah lungtak tein biatak a kawlmi hna an um. Annih nih Pathian kong, Pathian min, vawlei le minung kong he aa tlaiin Pathian tinhnak le Pathian naih khawh ning kong hna kha hngalh an duh. (Jeim 4:8) Jehovah Tehte Hna nih anmah pawl kha an ton hna i lunglawm tein an biahalnak a phi kha Baibal in an chimh hna.

Cu bantuk biahalnak na ngeih caah mah mekazin hi na cohlanmi a si maw? Pathian kha na kawl maw? Mah mekazin na hmuh tikah na thlacamnak kha Pathian nih aan leh tiah na ruat maw?