ASƐMBISA yi kenyan enyigye kɛse, na ɔma hɛnho per hɛn dɛ yɛbɔhwehwɛ no ho mbuae. Bible no ma yehu dɛ, ndɛ so Jehovah tsie mpaabɔ ampa. Dɛ Nyankopɔn betsie hɛn mpaabɔ anaadɛ onnketsie no gyina hɛnara hɛn do.

Jesus kasaa tsiaa n’aber do nyamesom akandzifo a nna wɔbɔ ndabraba mpaa no; kwan a nna wɔbɛfa do ada hɔnho edzi dɛ wɔyɛ atseneneefo nkotsee na nna ohia hɔn. Ɔkãa dɛ nyimpa a wɔtse dɛm no ‘enya hɔn akatua dada,’ kyerɛ dɛ dza wɔpɛ ara nye dɛ nyimpa bohu hɔn na ɔnnyɛ dɛ Nyankopɔn betsie hɔn. (Matthew 6:5) Dɛmara na ndɛ so, nyimpa pii bɔ mpaa wɔ kwan a hɔnankasa wɔpɛ do na nnyɛ kwan a Nyankopɔn pɛ do. Osiandɛ wɔpow Bible mu afotusɛm a yeesusu ho yi ntsi, Nyankopɔn nntsie hɔn mpaabɔ.

Ɔwo so ɛ? Aso Nyankopɔn tsie wo mpaabɔ? Mbuae no nngyina ebusua a ifi mu, kasa a ekã, anaa gyinabew a ewɔ wɔ asetsena mu no do. Bible no ma hɛn awerɛhyɛmu dɛ: “Nyankopɔn nnhwɛ nyimpa enyim: na mbom ɔman biara mu nyia osuro no na ɔyɛ ndzeyɛtsenenee no, ɔpɛ dɛ ɔgye no.” (Asomafo Ndwuma 10:34, 35) Aso dɛm asɛm yi fa woho anaa? Sɛ isuro Nyankopɔn a, ibobu no kɛse, na ibosuro dɛ ebɛyɛ adze a ɔmmpɛ. Ndzeyɛtsenenee a ebɛyɛ no kyerɛ dɛ ebɔhwehwɛ dza Nyankopɔn kã dɛ ɔtsen, sen dɛ ebɛyɛ dza wankasa pɛ anaa dza wo nyɛnko nyimpa pɛ. Aso epɛ dɛ Nyankopɔn tsie wo mpaabɔ ankasa? Bible no kã dza eyɛ a ɔbɛma Nyankopɔn etsie wo mpaabɔ. *

Nokwasɛm nye dɛ, nyimpa pii pɛ dɛ Nyankopɔn yɛ anwanwadze dze bua hɔn mpaabɔ. Wɔ aber mpo a nna wɔrekyerɛw Bible no, nna Nyankopɔn nntaa nnyɛ anwanwadze dɛm. Sɛ nna ɔtɔfabi na ɔyɛ anwanwadze bi a, mfe ɔhaha pii twa mu ansaana ɔayɛ fofor. Nkyii so, Bible no kã dɛ wɔ asomafo no hɔn wu ekyir no, anwanwadze a nna wɔyɛ no baa n’ewiei. (1 Corinthfo 13:​8-​10) Aso dɛm asɛm yi kyerɛ dɛ Nyankopɔn nntsie mpaabɔ biara ndɛ? Ɔnntse dɛm koraa! Susu mpaabɔ ahorow bi a Nyankopɔn tsie no ho hwɛ.

Nyankopɔn ma nyansa. Jehovah yɛ nyansa nyina ne Farbaa. Ɔdze nyansa ma hɔn a wɔhwehwɛ n’akwankyerɛ nye hɔn a wɔpɛ dɛ wɔdze bɔ hɔn bra no kwa.​—James 1:5.

Nyankopɔn dze no sunsum krɔnkrɔn no boa hɛn ma yenya do mfaso. Sunsum krɔnkrɔn no yɛ tum a Nyankopɔn dze yɛ adze. Tum biara nnyi hɔ a ɔkyɛn no. Obotum aboa hɛn ma yeegyina nsɔhwɛ ahorow ano. Obotum ama yeenya asomdwee aber a yɛabotow no. Obotum aboa hɛn ma yeenya suban pa ahorow a ɔyɛ fɛw. (Galatiafo 5:​22, 23) Jesus maa n’ekyirdzifo awerɛhyɛmu dɛ Nyankopɔn dze dɛm akyɛdze yi ma kwa.​—Luke 11:13.

Nyankopɔn ma hɔn a wofi hɔn akoma mu hwehwɛ no no nyimdzee. (Asomafo Ndwuma 17:26, 27) Wɔ wiadze nyina no, nyimpa binom fi hɔn akoma mu hwehwɛ nokwar no. Wɔpɛ dɛ wohu Nyankopɔn yie​—ne dzin, ne tsirmpɔw a ɔwɔ ma asaase na nyimpa, nye kwan a wobotum afa do abɛn no. (James 4:8) Jehovah Adasefo taa hyia nyimpa a wɔtse dɛm, na hɔn enyi gye ho dɛ wɔbɛkyerɛ hɔn nsɛmbisa a ɔtse dɛm ho mbuae wɔ Bible no mu.

Aso ɔno ntsi na egyee magazine yi? Aso epɛ dɛ ihu Nyankopɔn yie? Bi a ɔnam dɛm kwan yi do ritsie wo mpaabɔ.