QORI na taro e dau lomatarotarotaka e levu nira via kila na kena isau. Na iVolatabu e tukuna ni o Jiova e dau rogoca na masu nikua. E vakatau sara ga vei keda na nona rogoca na noda masu se sega.

A vakacalai ira na iliuliu ni lotu ena nona gauna o Jisu ni dau veivakaisini na nodra masu; era vinakata me laurai e matanalevu na nodra yalododonu. A tukuna o Jisu ni o ira qo era sa “taura sara tiko ga na kedra isau,” e kena ibalebale nira na rawata ga na ka era vinakata vakalevu, oya mera dokai. Ia qori e sega ni ka era gadreva dina, me rogoci ira na Kalou. (Maciu 6:5) Nikua, e levu era masulaka ga na ka e lomadra, sega ni loma ni Kalou. E sega gona ni rogoci ira na Kalou nira sega ni muria na ivakavuvuli vakaivolatabu sa da veivosakitaka oti.

Ia vakacava na nomu masu? Ena rogoca na Kalou qai vakayacora na nomu kerekere? Na isaunitaro qori e sega ni vakatau ena matatamata se vanua o cavutu mai kina, se na nomu itutu vakavanua. E vakadeitaka na iVolatabu: “[E] sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.” (Cakacaka 10:​34, 35) O cakava tiko qori? Ke o doka na Kalou o na kauaitaka vakabibi na nona rai o na sega ni via cakava na ka ena vakacudrui koya. Ke o caka dodonu o na cakava gona na ka e vinakata na Kalou, o na sega ni cakava na ka ga o vinakata se ra vinakata na tamata. O vinakata dina me rogoca na Kalou na nomu masu? Na iVolatabu ena dusimaki iko ena ka mo cakava. *

Era vinakata e levu me sauma vakacakamana na Kalou na nodra masu. Ia ena gauna mada ga vakaivolatabu, a tutuyadua me cakava qori na Kalou. So na gauna ena sivi e vica vata na senitiuri na volatukutukutaki ni kena vakayacori e dua na cakamana mai na dua tale. E kaya tale ga na iVolatabu ni gauna eratou mate kina na yapositolo sa mai mudu tale ga e keri na vakayacori ni cakamana. (1 Korinica 13:​8-10) Kena ibalebale qori ni sa sega ni rogoca nikua na Kalou na masu? E dau rogoca! Qo eso na ivakaraitaki ni nona dau rogoca na masu.

E veivakavukui na Kalou. O Jiova na iVurevure duadua ga ni vuku dina. E lomasavu ni solia na vuku vei ira era kerea na nona veidusimaki, ra muria sara.​—Jemesa 1:5.

E solia na Kalou na yalona tabu, qai levu na kena yaga. Na yalo tabu e igu tawarairai ni Kalou, e sega ni vakatauvatani rawa na kena kaukaua. E dau vukei keda meda vosota na veika dredre. Nida nuiqawaqawa ena vakacegui keda, ena vukei keda tale ga meda bucina na veitovo qoroi qai talei. (Kalatia 5:​22, 23) A vakadeitaka o Jisu vei ratou na nona imuri ni Kalou ena solia na isolisoli qo vei ira era kerea vua.​—Luke 11:13.

E vakatakila na ka dina na Kalou vei ira era vakasaqarai koya. (Cakacaka 17:​26, 27) Era tu e veiyasa i vuravura o ira e vu mai lomadra na nodra via kila na ka dina. Era via kila na Kalou​—na yacana, na nona inaki me baleta na vuravura kei na kawatamata, kei na sala mera toro voleka kina vua. (Jemesa 4:8) Era dau sotava vakalevu na iVakadinadina i Jiova eso era va sara ga qori ra qai marau ni saumi vakaivolatabu na nodra taro.

Oya beka na vuna o taura kina na mekesini qo? O vakasaqara tale tiko ga na Kalou? Rairai qo e dua na sala e sauma kina na Kalou na nomu masu.