AXÉ’ pel jant’oj axi yan i atikláb in lé’ kin exla’. I exóbna’its abal a Dios in ats’ál an oláb axi u t’ajchinal, pero yab patal. ¿Walám ne’ets kin ats’a’ an oláb axi wawá’ ki t’ajchij? Aníts, pero kwa’al ki t’aja’ jant’ini’ tin tomnál.

A Jesús in k’wiya’ talchik i atikláb axi ti biyál, kom expidh in t’ajálak i oláb abal ka tsu’tat k’al axi k’e’at. In uluw abal an alwa’taláb axi ne’etsakchik kin bats’uw expidh játs «ka tsu’tatchik k’al axi k’e’at». Jajá’chik yab in lé’ak abal ka ats’an k’al a Dios, expidh in lé’ak abal ka tsu’tat k’al an atiklábchik (Mateo 6:5). Xowé’ ta k’icháj yan i atikláb jayej in t’ajál antsaná’. In ólonchal a Dios pero expidh in tsálpayal tin kwetémtal. Jayej, kom yab in t’ajál an oláb antsaná’ jant’ini’ tin ulal an Biblia, yab u tok’tsincháb.

Ani wawá’, ¿jant’oj kwa’al ki t’aja’? A Jehová in éjtowal kin tók’tsinchij in olábil jitákits tam atikláb al jawákits tam bichow o al jawákits tam kwenchaláb. An Biblia in ulal abal a «Dios yab u pok’odh tsu’ux k’al an atiklábchik». «In báts’uwal jitákitsk’ij tam inik axi k’ak’nax k’al Jajá’ ani in t’ajál alwa’ jant’ini’ in lé’ Jajá’ (Hechos 10:​34, 35). An atikláb axi in k’ak’nal a Dios in tsápnanchal kin t’aja’ jawa’ tekedh kom yan in lé’ kin k’ibchij. Jayej, in tsápnanchal kin t’ajchij in kulbétal a Dios, yab jawa’ jajá’ in lé’ o jawa’ u uchnal k’al k’e’at i atikláb. Tam, max i lé’ abal a Jehová tu ku ats’anchij i olábil, kwa’al ki t’aja’ jawa’ Jajá’ tu konchal ti Biblia. *

Yan i atikláb in aychal kin tsu’uw jun i labidh t’ajbiláb abal kin exla’ abal tók’tsinchat in olábil. Pero max ki tsalpay, lej wé’ i ­kalel in eyendha’ a Dios i labidh t’ajbiláb abal kin tók’tsiy i oláb. Jayej, an Biblia in ulal abal yabáts ne’etsak ka wa’tsin i labidh t’ajbiláb talbél tam ka tsemets an abatwálejchik (1 Corintios 13:8-10). Pero a Dios tu tók’tsinchal i  olábil. Ki tsu’uw jant’ini’ a Jehová in tók’tsiyal an oláb xowé’ ta k’icháj.

In binál i tsalpadhtaláb. A Dios játs axi in kwa’al patal an tsalpadhtaláb, Jajá’ in pidhál jita’chik in tsápnanchal kin t’aja’ jawa’ tekedh ani jita’chik in jilál ka exóbchat (Santiago 1:5).

In binál i espíritu santo. An espíritu santo játs an tsapláb axi in eyendhál a Dios abal kin t’aja’ yan jant’oj. Jayej in éjtowal kin eyendha’ abal tu ku tólmiy ki támetna’ jun i k’ibataláb, tu pidhál i koyattaláb tam i ats’ál u t’e’pidh ani tu tólmiyal abal ki jalk’uy jant’ini’ i ey (Gálatas 5:22, 23). A Jesús in uluw abal a Dios ne’ets tu ku pidha’ i t’okat tsapláb max wawá’ ki konchij (Lucas 11:13).

In exóbchal jita’chik in lé’ kin exla’ an chubaxtaláb. Ti Hechos 17:26, 27, tu tejwamédhanchal abal yan i atikláb k’wajat in aliyal a Dios. In lé’chik kin exla’ jant’ini’ in bij a Dios, jant’oj in tsálpayal kin t’aja’ k’al an Tsabál, k’al an atiklábchik ani jant’ini’ in éjtowal ka uteychik k’al a Dios (Santiago 4:8). An ólchixchik k’al a Jehová in elál i atikláb axi in lé’ kin exla’ a Dios ani in kulbetnál kin tók’tsinchij k’al an Biblia jawa’ in lé’chik kin exla’.

Ani tatá’, ¿a lé’ ka exla’ tin kwéntaj a Dios? ¿Walám jaxtám ta bats’uw axé’ xi revista? Walám játs antsaná’ jant’ini’ a Dios k’wajat ti tók’tsinchal a olabil.