EPURIRO ndi ri kombanda mba mari eta onyuṋe nokunana ombango yetu. Ombeibela i raisa kutja Jehova u puratena kozongumbiro. Kutja eye wa zuvire ozongumbiro zetu poo indee tji zikama tjinene ku eṱe.

Jesus wa hungira ohunga novanane vozongamburiro voruveze rwe, kutja owo ovanatjavivi, indu tji mave kumbu ve ripurira kokumunika otjovasemba komurungu wovandu. Jesus wa tja ovarumendu otja imbwo “ondjambi yawo ve i pewa rukuru,” pu mape hee kutja mave munu imbi aviyerike mbi ve vanga tjinene, mbi ri ombango yovandu. Nungwari, Mukuru ka puratene kozongumbiro zawo tji tji ri otjiṋa tji ve hepa. (Mateus 6:5) Momuano otjingewo ndino, ovandu ve kumba otja kombango yawo nu kaondji oya Mukuru. Owo kave kongorere omirari vyOmbeibela mbi twa hungirire ko, ku nao Mukuru ka puratene kozongumbiro zawo.

Nu hapo tjike na ove? Mukuru ma puratene nokuzuvira kozongumbiro zoye? Eziriro kepuriro ndo kari nokurekareka kombazu yoye, koṋa ku wa za, poo kotjihako tji u na tjo mokati kotjiwaṋa. Ombeibela i tu raera kutja: “Ndjambi u vara ovandu avehe pu pe ṱeki pamwe. Eye u yakura omundu auhe ngu nondira ku Ye, nu ngu tjita ousemba, nangarire kutja eye owotjiwaṋa kaaṋi ho.” (Oviungura 10:34, 35) Hapo omambo ngo maye hungirire kove? Okukara nondira ku Mukuru, ku heya okumuvara pondondo yokombanda nokutira okumuhihamisa. Okutjita ousemba ku kamburira mo okutjita imbi Mukuru mbye tja ovisemba, pendje nokutjita ombango yetu oveni poo okukongorera ovandu. Hapo ove tjiri mo vanga kutja Mukuru ma puratene kozongumbiro zoye? Ombeibela i tu raisira omuano mu matu yenene okukumba kutja Mukuru ma puratene. a

Otjingaperi kutja ovandu ovengi ve vanga kutja Mukuru ma zire ozongumbiro zawo mokutjita otjihimise. Nandarire moruveze rwOmbeibela, Mukuru kaa tjiti ovihimise tjinene. Nu povikando tjiva aape kapita ozombura ozengi indu otjihimise tjarwe tji matji katjitwa. Wina Ombeibela i raisa kutja oruveze indu ovihimise tjaavi tjitwa rwa yanda moruveze rwovaapostele. (1 Ovakorinte 13:8-10) Hapo iho matji hee kutja Mukuru ndino ka ziri ozongumbiro? Kako katjiperi. Tara kozongumbiro tjiva nḓe zira.

Mukuru u yandja ounongo. Jehova ongu ri Omburo younongo watjiri. Eye u yandja ounongo nouharupu ku imba mbu mave vanga omuhunga nokuhupa otja kounongo we.—Jakobus 1:5.

Mukuru u yandja ombepo ondjapuke. Ombepo ondjapuke omasa wa Mukuru. Kape nomasa warwe otja ingo. Ombepo ndjo mai yenene okutuvatera okutuurunga omauzeu. Nu mai yenene okutupa ohange indu tji twa u momuinyo. Wina mai yenene okutuvatera okukara novikaṋena vyarwe oviwa. (Ovagalate 5:22, 23) Jesus wa raera ovemukongorere kutja Mukuru u yandja otjiyandjewa ho nouharupu.—Lukas 11:13.

Mukuru u yandja ounongo ku imba mbe mu paha tjiri. (Oviungura 17:26, 27) Ongondoroka mouye pe novandu tjiri mbe paha ouatjiri. Owo ve vanga okutjiwa kutja ena ra Mukuru otjikwaye, ondando ye kombanda yehi na kovandu oyatjike, nomuano owo mu mave yenene okutumbuka popezu na ye. (Jakobus 4:8) Ovahongonone va Jehova potuingi ve hakaena pu novandu mbe ri nao, nu ve kara nonḓero yokuveraera omaziriro okuza mOmbeibela komapuriro otja ingo.

Hapo ove u paha Mukuru, nu opu wa zu okukambura okambo nga? Mape ya imbwi oomuano Mukuru mbwa ziri ongumbiro yoye.

[Omambo wokehi]