KAYÀ nga ammuan na aru nga totolay nu gigginnan anna tattabbagan na Dios i pakimalloda ira. Kagian na Biblia nga talaga gigginnan ni Jehova i pakimallo ira ta kaggawattam. Ngem nakadepende nittam nu ginnanna yatun onu ari.

Nivuya ni Jesus i lider ira na relihion ta kaggawanna. Inagalanna ira nga minaggappappe megafu ta makimallo laman ira tapenu dayawan na totolay. Kinagina nga danatun nga lallaki ay “inalawada ngana i baloda.” Kayà kagian natun nga dayawan ira na totolay ngem ari vuluvuga ginnan na Dios i pakimalloda ira. (Mateo 6:5) Kunnatun gapa ta kaggawattam. Aru i makasarili anna ipakimalloda laman i kayàda. Ngem ariadda ipakimallo i uray na Dios. Megafu ta ariadda tuttulan i prinsipio ira na Biblia, ari ira vuluvuga ginnan na Dios.

Ngem kunnasi ka gapa? Ginnan anna tabbagan kari na Dios i pakimallo mu ira? Ari nga nakadepende yatun ta lahi mu onu ta nononopan na tanakuan nga totolay meyannung nikaw. Ipasiguradu na Biblia nittam: “I Dios ay arian na nga padduma-ruman i pangikakua na ta totolay. Ta alawatan na i sinni laman nga matunung anna minakkimoray sa, maski nu anni nga rasa i naggafuan na.” (Kingngua 10:34, 35) Kunnatukka kari gapa? Nu maganassikka ta Dios, monag i pangikakuam nisa anna manaki mu yayya nga mapalussaw. Nu matunung ka gapa, kuammu nu anni i kagian na Dios nga fustu, ari tu i ammum onu kakkagian na totolay nga fustu. Kayà mu kari talaga nga ginnan na Dios i pakimallo mu ira? Ituddu na Biblia nu anni i mawag nga kuammu. *

Siempre, kayà na aru nga mammilagro i Dios tapenu tabbaganna i pakimalloda ira. Ngem maski paga ta tiempo na Biblia, tallutaggi laman nga kingngua na Dios i kunnatun. Nu mittan paga lagu, ginatu labbi nga dagun i mappasa nige nga egga i mesimmu nga tumunug nga milagro. Tapus, ipasingan gapa na Biblia nga nangultimu i tiempo na pammilagro tagga ta kaggawan na apostol ira. (1 Corinto 13:8-10) Kayà kari kagian natun nga ari ngana nga tabbagan na Dios i pakimallo tam ta maddaggun? Ari! Innattam i karuan nga pakimallo ira nga tattabbaganna.

Mangiyawa i Dios tu sirib. Naggafu kani Jehova i ngamin nga kurug nga sirib. Vuka-palag nga iyawana yatun turi ira ta makimallo para tatun anna mayà nga usan yatun ta pattoleda.​—Santiago 1:5.

Iyawa na Dios i masanto nga espirituna anna i ngamin nga benefisio natun. I masanto nga espiritu i aktibo nga fuersa na Dios. Awan ngana tu fuersa nga mas masikan anne tatun. Uffunan ittam natun tapenu maattammattam i kapurueba. Yatun gapa i mangiyawa tu imammo nittam nu mavuru-vurung ittam. Makoffun gapa yatun tapenu mapeggan ittam tu tanakuan paga ira nga makasta nga kualidad. (Galacia 5:22, 23) Ipasiguradu ni Jesus ta tagatuttulna ira nga vuka-palag nga iyawa na Dios yatun nga regalu.​—Lucas 11:13.

Uffunan na Dios danuri napafutuan nga magaleg nisa. (Kingngua 17:26, 27) Ta interu mundo, egga i totolay nga napafutuan nga magala-aleg ta kinakurug. Kayàda nga ammuan i meyannung ta Dios—nu anni i ngaganna, nu anni i gakkagna para ta davvun anna para ta totolay, anna nu kunnasi ira mabbalin tu madukko nisa. (Santiago 4:8) Aru i kunnatun nga totolay nga masimmuan na Saksi ira ni Jehova anna magayayya ira nga ikagi i tabbag na Biblia tatun ira nga pakkiavu.

Yatun kari i rason nu ngatta bibbibbigammu yaw nga magazina? Ala-alegammu kari i Dios? Posible nga yaw i tabbagna ta pakimallo mu.