LAHTA na ga san gaw myit kahpra shangun nna chye mayu myit byin shangun ai. Anhte hpyi ai akyu hpyi ga hpe Yehowa Karai Kasang madat ya ai ngu ai hpe Chyum Laika hta tsun da ai. Anhte a akyu hpyi ga hpe Karai Kasang madat ya na, n madat ya na ngu ai gaw anhte hta sha madung ai.

Akyu hpyi masu ai nawku htung ningbaw ni hpe Yesu jahpoi asawng wa ai. Shanhte gaw masha ni yu kaba hkra sha makam masham myit kaba ai zawn galaw ma ai majaw re. Dai zawn masha hpe “tinang a shabrai lu la” na re ngu nna Yesu tsun wa ai. Tsun mayu ai gaw, shanhte lu mayu ai masha a myiman sha lu la nna, shanhte ra kadawn ai Karai a myiman gaw lu la na n re. (Mahte 6:5) Dai ni aten hta mung, masha law law gaw Karai a myit ra lam hta na, tinang a myit ra ai lam hpe sha shawng tawn ma ai. Shanhte gaw Chyum Laika npawt tara ni hpe n hkan sa ai majaw, akyu hpyi ga ni gaw madat hkrum na n re.

Nang gaw gara hku kun? Na a akyu hpyi ga ni hpe Karai Kasang madat ya na kun? Dai gaw amyu bawsang, amyu rusai, masha nga pra lam ni hta n madung ai. Chyum Laika hta ndai hku tsun da ai: “Karai Kasang masha myi man n tau ai gaw, ya ngai gaja wa chye se ai: amyu baw shagu hta shi hpe hkrit hkungga ai hte ding man ai amu galaw ai wa gaw, shi kaw myi man pa nga ai.” (Kasa 10:34, 35) Dai ga gaw nang hte mung seng ai kun? Karai Kasang hpe hkrit ai ngu ai gaw, shi hpe grai hkungga lara nna, shi n ra sharawng na hpe hkrit tsang ai re. Dinghpring ai lam hta hkawm sa ai ngu ai gaw, tinang myit ra ai lam (sh) kaga ni a myit ra lam hta na Karai Kasang a myit ra lam hkan galaw ai hpe tsun ai re. Na a akyu hpyi ga ni hpe Karai Kasang madat ya na hpe ra sharawng ai kun? Gara hku akyu hpyi yang Karai Kasang madat ya na ngu nna Chyum Laika hta tsun dan da ai. *

Masha law law gaw tinang a akyu hpyi ga ni hpe mauhpa lam ni hte Karai Kasang mahtai jaw ya na hpe ra sharawng ma ai. Raitim, Chyum Laika prat hta pyi, Karai Kasang gaw mauhpa amu galoi shagu gaw n galaw dan wa ai. Kalang lang mauhpa amu langai hte langai lapran kaw pyi, shaning grai gang mat chye ai. Dai sha n-ga, mauhpa amu ni galaw dan ai prat gaw, Kasa ni prat hpang hta htum mat sai ngu nna Chyum Laika hta tsun da ai. (1 Korinhtu 13:8-10) Rai yang, dai ni aten hta anhte a akyu hpyi ga ni hpe Karai Kasang mahtai n jaw ya sai ngu ai lachyum kun? N re. Karai Kasang mahtai jaw ya ai akyu hpyi ga nkau hpe dinglik yu ga.

Nyan Hpaji Hpe Karai Kasang Jaw. Jet ai nyan hpaji yawng a npawt gaw Yehowa Karai Kasang re. Shi a lam matsun hpe ra sharawng nna, dai hte shakut hkan sa ai ni hpe sharawng awng let nyan hpaji jaw ya ai.​—Yaku 1:5.

Chyoi Pra Ai Wenyi Hte De A Majaw Byin Pru Wa Ai Shaman Chyeju Yawng hpe Karai Kasang Jaw. Chyoi pra ai wenyi gaw Karai Kasang langai sha madu ai atsam langai re. Dai hta grau kaba ai atsam n nga ai. Chyoi pra ai wenyi gaw chyam dinglik lam ni hpe hkamjan lu shangun ai. Dai sha n-ga, yakhkak jamjau lam ni hpe anhte hkrum ai shaloi hta mung, myit simsa lam lu shangun ai. Kaga atsam ningja ni hpe shalat lu shangun ai. (Galati 5:22, 23) Chyoi pra ai wenyi shaman chyeju hpe sharawng awng let Karai Kasang jaw na re ngu nna, sape ni hpe Yesu ama hkam wa ai.​—Luka 11:13.

Shi Hpe Shakut Shaja Let Hkan Tam Ai Ni Hpe Machye Machyang Karai Kasang Jaw. (Kasa 17:26, 27) Teng man ai tara hpe myit majing hte hkan tam ai masha mungkan ting hta nga ai. Shanhte gaw Karai Kasang a lam, Karai Kasang a amying, mungkan ga hte shinggyim masha ni hte seng ai shi a yaw shada lam, shi hpang de gara hku sit sa mai ai lam ni hpe chye mayu ma ai. (Yaku 4:8) Dai zawn re ai masha ni hte Yehowa Sakse Ni hkrum chye nna shanhte a ga san ni hpe Chyum Laika hte kabu gara let mahtai jaw ya ma ai.

Nang hta mung dai zawn ga san nga ai majaw, ndai magazine hpe hkap la wa ai rai na re. Nang mung Karai Kasang hpe tam nga ai wa kun? Ndai laika buk hpe lu la ai gaw, na a akyu hpyi ga hpe Karai Kasang mahtai jaw ya ai lam mai byin ai n rai?