Samba

7 Keti Nzambi Tawa mpi Tapesa Mvutu Kana Beto?

NGYUFULA yai kebasisaka mawi mingi ya kyese mpi mpusa ya kuzaba mambu mingi. Biblia kemonisa nde Yehowa kewaka mpenza bisambu bubu yai. Sambu yandi kuwa bisambu na beto to ve, yo ketadila kaka beto mosi.

Yezu kutungululaka bantwadisi ya mabundu ya bilumbu na yandi sambu bo vandaka kusamba ti luvunu; bo vandaka kudibanza kaka na kumonisa na meso ya bantu nde bo vandaka bantu ya lunungu. Yandi tubaka nde bantu yai zolaka kubaka “matabisi na bo,” disongidila nde bo zolaka kubaka kaka mambu yina bo vandaka kuzola mingi, dikebi ya bantu, kansi ve mambu yina bo vandaka na yo mfunu, nde Nzambi kuwa bisambu na bo. (Matayo 6:5) Mutindu mosi bubu yai, bantu mingi kesambaka na kutadila luzolo na bo mosi, kansi ya Nzambi ve. Sambu bo ketulaka ve dikebi na minsiku ya Biblia yina beto mekatuka kutubila, Nzambi kewaka ve bisambu na bo.

Ebuna nge? Keti Nzambi tawa mpi tapesa mvutu na bisambu na nge? Mvutu ketadila ve mpusu na nge ya nitu, insi na nge, to kisika ya nge kele na yo na kimvuka ya bantu. Biblia kendimisa beto nde: “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.” (Bisalu 10:34, 35) Keti bangogo yai ketadila mpi nge? Kuzitisa Nzambi ketendula kutina yandi boma mpi kubuya kupesa yandi mpasi. Kusala mambu ya mbote ketendula kusosa kusala mambu yina Nzambi ketuba nde yo kele mbote na kisika ya kulanda luzolo na nge mosi to ya bantu yankaka. Keti nge kezola mpenza nde Nzambi kuwa bisambu na nge? Biblia kemonisa nge mutindu ya kusamba na mpila nde Nzambi kuwa bisambu na nge. *

Ya kyeleka, bantu mingi kezolaka nde Nzambi kupesa mvutu na bisambu na bo na nzila ya kidimbu ya nkumbwa. Kansi, ata na ntangu ya ntama, Nzambi vandaka kusala ve bidimbu yai ya nkumbwa mbala mingi. Bantangu yankaka, bamvu-nkama mingi vandaka kuluta na kati ya kidimbu ya nkumbwa mosi ti yankaka. Dyaka, Biblia kemonisa nde ntangu ya bidimbu ya nkumbwa kusukaka na nima ya bilumbu ya bantumwa. (1 Korinto 13:8-10) Ebuna, keti yo ketendula nde bubu yai Nzambi kepesaka ve mvutu na bisambu? Yo kele buna ve! Yandi kepesaka mvutu na bisambu! Beto tadila mwa bisambu yina yandi kepesaka bamvutu.

Nzambi kepesaka mayele. Yehowa kele Nto ya mayele yonso ya kyeleka. Yandi kepesaka mpi kekabaka yo ya ofele na bantu yina kezolaka lutwadisu na yandi mpi bayina kesosaka na kuzinga na kuwakana ti yo.​—Yakobo 1:5.

Nzambi kepesaka mpeve santu na yandi mpi mambote na yo yonso. Mpeve santu kele ngolo ya kisalu ya Nzambi. Kele ve ti ngolo ya meluta ngolo yai. Yo lenda sadisa beto na kukanga ntima na bampasi. Yo lenda pesa beto ngemba mingi ntangu beto kekudiyangisa na mabanza. Yo lenda sadisa beto na kuyedisa bikalulu yankaka ya kitoko mpi ya zola. (Galatia 5:22, 23) Yezu kundimisaka balongoki na yandi nde Nzambi kepesaka dikabu yai na luzolo yonso.​—Luka 11:13.

Nzambi kepesaka nzayilu na bantu yina kesosaka yandi na masonga yonso. (Bisalu 17:26, 27) Na ntoto ya mvimba, kele ti bantu yina kesosaka kyeleka na masonga yonso. Bo kezolaka kuzaba mambu ya metala Nzambi​—zina na yandi, lukanu na yandi sambu na ntoto ti bantu, mpi mutindu bo lenda kwenda penepene na yandi. (Yakobo 4:8) Mbala mingi, Bambangi ya Yehowa kekutanaka ti bantu ya mutindu yai mpi bo kevandaka na kyese ya kupesa bamvutu ya mekatuka na Biblia na bangyufula ya mutindu yai.

Keti yo yina kikuma ya nge mezwa zulunalu yai? Keti nge ke na kusosa Nzambi? Ziku yai kele mutindu yandi mepesa mvutu na kisambu na nge.

[Noti na Nsi ya Lutiti]