ANDŨ aingĩ nĩ mendaga kũmenya kana Ngai nĩ aiguaga na agacokia mahoya maitũ. Bibilia yonanagia atĩ Jehova nĩ athikagĩrĩria mahoya. No Jehova gũthikĩrĩria kana kwaga gũthikĩrĩria mahoya maitũ kwĩhocetie harĩ ithuĩ.

Jesu nĩ aamenereirie atongoria a mahinda make na akĩmeeta hinga tondũ maahoyaga nĩguo meyonanie kũrĩ andũ. Aaugire atĩ andũ ta acio nĩ marĩkĩtie kwamũkĩra “kĩheo kĩao gĩothe,” kuonania atĩ mangĩamũkĩrire o kĩrĩa meendaga, kuonwo nĩ andũ, no Ngai ndagĩathikĩrĩirie mahoya mao. (Mathayo 6:5) O na ũmũthĩ, andũ aingĩ mahoyaga kũringana na wendi wao no ti wendi wa Ngai. Andũ mangĩaga gwathĩkĩra ũrĩa Bibilia yugĩte, Ngai ndangĩthikĩrĩria mahoya mao.

Ĩ nawe? Hihi Ngai nĩ arĩiguaga na agacokia mahoya maku? Macokio ma kĩũria kĩu matiraringana na rũrĩrĩ rwanyu, kũrĩa uumĩte, kana ũrĩa andũ makuonaga. Bibilia ĩtwĩraga: “Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.” (Atũmwo 10:34, 35) Hihi ũguo nĩguo ũhaana? Angĩkorũo nĩ wĩtigĩrĩte Ngai, nĩ ũrĩmũheaga gĩtĩo, na ndũrĩkaga ũndũ o wothe ũngĩmũrakaria. Gwĩka ũrĩa kwagĩrĩire nĩ kuuga atĩ nĩ ũrĩĩrutanagĩria gwĩka ũrĩa Ngai oigĩte nĩ kwagĩrĩire, no ti ũrĩa wee kana andũ angĩ mareciria. Hihi nĩ ũrenda Ngai athikagĩrĩrie mahoya maku? Bibilia nĩ yonanĩtie ũrĩa ũngĩka nĩguo Ngai athikagĩrĩrie mahoya maku.

Andũ aingĩ mendaga Ngai acokie mahoya mao na njĩra ya kũmaringĩra ciama. O na kũrĩ ũguo, o na mahinda-inĩ ma Bibilia ti kaingĩ Ngai aacokagia mahoya na njĩra ya kĩama. Rĩmwe na rĩmwe, mĩaka mĩingĩ nĩ yahĩtũkaga Ngai ataringĩte kĩama. Makĩria ma ũguo, Bibilia yonanĩtie atĩ ciama nĩ ciathirire thutha wa mahinda ma atũmwo. (1 Akorintho 13:8-10) Hihi ũguo nĩ kuuga atĩ Ngai ndacokagia mahoya ũmũthĩ? Aca! Reke tuone mahoya mamwe acokagia.

Ngai nĩ aheanaga ũũgĩ. Jehova nĩwe Kĩhumo kĩa ũũgĩ wothe wa ma. Nĩ akenagĩra kũheana ũũgĩ wake kũrĩ arĩa mamũhoyaga na arĩa mendaga kũũhũthĩra ũtũũro-inĩ wao.—Jakubu 1:5.

Ngai nĩ aheanaga roho wake mũtheru na maũndũ mothe mega moimanaga naguo. Roho mũtheru nĩ hinya wa Ngai wa gwĩka maũndũ. Gũtirĩ hinya ũkĩrĩte ũcio. No ũtũteithie gũkirĩrĩria magerio. No ũtũhe thayũ rĩrĩa tũratangĩka. No ũtũteithie gũkũria ngumo ingĩ njega. (Agalatia 5:22, 23) Jesu eerire arũmĩrĩri ake atĩ Ngai aheanaga roho mũtheru arĩ na ũtaana.—Luka 11:13.

Ngai nĩ ateithagia arĩa mamũcaragia na kĩyo. (Atũmwo 17:26, 27) Thĩinĩ wa thĩ nĩ kũrĩ andũ macaragia ma marĩ na ngoro njega. Mendaga kũmenya maũndũ megiĩ Ngai—ũrĩa etagwo, muoroto wake harĩ thĩ na andũ nĩ ũrĩkũ, na ũrĩa mangĩmũkuhĩrĩria. (Jakubu 4:8) Aira a Jehova kaingĩ nĩ macemanagia na andũ ta acio, na nĩ makenaga kũmahe macokio ma ciũria ciao kuuma Bibilia-inĩ.

Hihi kĩu nĩkĩo kĩratũma ũthome ngathĩti ĩno? Hihi nĩ ũracaria Ngai? No kũhoteke ĩno nĩyo njĩra ĩrĩa arahũthĩra gũcokia mahoya maku.