ПУ сурығ кӧп кізіні сағыссыратча. Библия Иегова пістің туста даа пазырыстарны исчеткенін кӧзітче. Че Худай пазырыстарыбысты истер бе, чох па ӧӧнінде піснең палғалыстығ.

Иисус позының тузындағы религиознай устағҷыларны чойырхос пазырыстарының ӱчӱн пыролаан. Олар Худайға киртінчеткеннерін кӧзідер ле ӱчӱн пазырҷаңнар. Иисус «олар постарының сыйыхтарын хаҷанох алып алғаннар» теен. Хайдағ сыйыхтаңар чоох? Олар иң тың хынған нимені — кізілернің хайиин — алып алғаннар. Че сынында оларға Худайның хайиин тілирге кирек полған (Матфей 6:5). Амғы туста кізілер ідӧк, Худайның кӧңнін санға албин, постарының кӧңнінҷе пазырчалар. Библиядағы піс ӱзӱрген принциптерге кізілернің киректері халбинча, аннаңар Худай оларның пазырыстарын испинче.

Сірердеңер чи, ниме тирге чарир? Сірернің пазырыстарыңны Худай исче бе паза оларға нандырча ба? Анзы расанаң, национальностьнаң паза социальнай положениенең палғалыстығ нимес. Библияда пазылча: «Худайның прай чоннарға пір син хайчатханын амды сынап кӧрчем. Аймах-пасха чоннарда Аны улуғлапчатханнар [«Аннаң хорыхчатханнар», НТ] паза орта ниме итчеткеннер Худайның кӧңніне кірче» (Илҷілернің 10:34, 35). Пӱ сӧстер сірердеңер пазылған тирге чарир ба? Худайны улуғлапчатсар паза аны хомзындырарға хынминчатсар, сірер аннаң хорыхчазар. Постарың алай кем-де орта тіп санапчатхан киректерні нимес, Худай орта тіп санапчатхан киректерні итчетсер, сірер орта тудынчазар. Сірернің пазырыстарыңны Худай иссін тіп хынчазар ба? Анзында сірерге Библия полыс полар.

Кӧп кізі Худай оларның пазырыстарына, хайхас идіп, нандырзын тіп хынча. Худай Библия пазылған туста даа хайхастар удаа итпеен. Пірееде хайхастар аразында чӱзер чыллар ирт парҷаң. Ағаа хоза, Библия хоостыра, илҷілер ӱреен соонда хайхастар тохтап парғаннар (1 Коринфтегілерге 13:8—10). Че анзы Худай пазырыстарыбысха нандырбинчатханын таныхтапча ба? Чох! Хайди нандырчатханын кӧр кӧреелер.

Худай хыйға сағыс пирче. Сын хыйғаны Иегова ла пир полар. Аның устағларын тілепчеткеннерге паза ол устағларҷа чуртирға хынчатханнарға Худай хыйға сағыс харанмин пирче (Иаковтың 1:5).

Худай позының ызых худын паза ол хутнаң палғалыстығ алғастарны пирче. Ызых хут — Худайның тоғынчатхан кӱзі. Ызых хуттаң кӱстіг кӱс чоғыл. Аның полызиинаң піс хайдағ даа сидіктерні тобыр поларбыс. Сағыссырастарға пастырчатсабыс, ол хут чӱрекке амыр пир полар паза аарлығ, чахсы качестволарны тилідерге полыс пирер (Галат чиріндегілерге 5:22, 23). Иисус ӱгренҷілеріне, ол хутты сурынзар, Худай хайди даа пирер теен (Лука 11:13).

Аны тілепчеткеннерге ол позынаңар пілістер пирче. Чирде Худайдаңар сынны тілепчеткен азых чӱректіг кізілер пар (Илҷілернің 17:26, 27). Олар Худайның адын, чирдеңер паза кізілердеңер аның сағын салған сағызын паза хайди Худайға чағдирын піліп аларға хынчалар (Иаковтың 4:8). Иегованың киречілері андағ кізілерге удаа тоғасчалар паза Библия пу сурығларға хайди нандырчатханын ӧрініснең кӧзітчелер.

Сірер аннаңар пу публикацияны хығырчазар, арса? Сірер Худайны тілепчезер бе? Пу публикация сірернің пазырыстарыңа нандырығ, арса.