Qinuneq – Guutip qinnutivut tusaajumallugillu akiumavai?
APEQQUTIP tamatuma akissutaa inuppassuarnit soqutigineqarpoq. Biibilimi erserpoq ullumikkut Jehova qinnutinut tusarnaartartoq. Qinnutsinnik tusarnaarnersoq tusarnaannginnersorluunniit uagut nammineq aalajangiisooqataavugut.
Jiisusip taamanikkut upperisarsiornikkut siuttut ilumoortuusaarlutik qinummata avoqqaarai; upperluarpasinnertik takoqqussaarutigiinnarpaat. Oqarpoq inuit taamaattut “akissarsiassartik” pereeraat. Tassa imaappoq kissaatiginerusartik, inunnit malugineqarneq, kisiat pissagaat — pisariaqartitartik, Guutimit tusarneqarnissaq, pinnagu. (Matthæusi 6:5) Ullumikkuttaaq inuppassuit nammineq piumasartik qinnutigisarpaat, Guutip piumasaa qinnutiginagu. Najoqqutassianik Biibilimeersunik matumani eqqartukkatsinnik sumiginnaammata Guutip tusarumanngilai.
Illimmi? Guutip qinnutitit tusaajumallugillu akiumavai? Tamatuma akissutaanut naggueqatigiinnut inuiaqatigiinnullu sorlernut ilaanerluni, innuttaaqatigiinniluunniit inissisimaffik, apeqqutaanngilaq. Biibilimi uppernarsaavigineqarpugut “Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq”. (Apustilit Suliaat 10:34, 35) Illit taamaattuuit? ‘Guutimik mianerinninneq’ isumaqarpoq taassuminnga ataqqinningaarneq iluarinngisaanillu iliornissamik mianersorneq. ‘Iluartuliorneq’ isumaqarpoq Guutip naapertuilluartuuneragaanik maleruaaniarneq, namminerlu allalluunniit kissaataannut maleruutiinnannginneq. Kissaatigiviuk qinnutitit Guutip tusassagai? Biibilimi erserpoq qanoq iliussasutit. *
Ilumoorpoq inuppassuit qinnutimik tupinnartuliornikkut Guutimit akineqarnissaat kissaatigigaat. Biibilip nalaani Guutip taamatut tupinnartuliortarnera qaqutigoorpoq. Ilaannikkut ukiuni hundredelikkuutaani tupinnartuliorneq ajorpoq. Aammattaaq Biibilimi paasinarsisinneqarpoq apustilit toqunerisa kingorna tupinnartuliortoqartarunnaassasoq. (1 Korinthimiut 13:8-10) Tamanna isumaqarpa Guuti qinnutinik akisisarunnaartoq? Naamerluinnaq, akisisarpoq! Qinnutinik akisisarnera misissoriartigu.
Guuti ilisimassuseqalersitsisarpoq. Ilisimassuseq piviusoq tamarmi Jehovameersuuvoq. Ilisimassuserminik imminit siunnersorneqarusuttunut siunnersorneqarnermissullu inuuniarsarisunut tamanut tunisisarpoq. — Jaaku 1:5.
Guuti anersaaminik illernartumik tamatumalu iluaqutissartaanik tamanik tunisisarpoq. Anersaaq illernartoq tassaavoq Guutip nukinga sulisoq. Nukimmit tamatumannga sakkortunerusoqanngilaq. Misilinneqarnerni pinertusaarnissamut iluaqutigisinnaavarput. Annikilliornitsinni eqqissinissamut iluaqutigisinnaavarput. Pissuserineqartussanik nuannersunik iluarinartunillu allanik pigiliussinissamut iluaqutigisinnaavarput. (Galatiamiut 5:22, 23) Jiisusip ajoqersukkani uppernarsaavigai Guutip tunissummik tamatuminnga tukkorluni tuniumaarai. — Lukasi 11:13.
Guutip ilumoorlutik imminik ujarlersut paasisaqartittarpai. (Apustilit Suliaat 17:26, 27) Silarsuarmi sumi tamaani inoqarpoq ilumoorlutik sallusuissummik ujarlersunik. Guuti pillugu paasisaqarusupput — qanoq ateqarnersoq, nunarsuarmut inunnullu qanoq siunertaqarnersoq qanorlu taassumunnga qanillisoqarsinnaanersoq. (Jaaku 4:8) Jehovap Nalunaajaasui inunnik taamaattunik naapitsigajupput apeqqutillu taamaattut akissutaannik Biibilimeersunik tusarlernissaat nuannaarutigaat.
Tamanna pissutigalugu atuagassiaq una tiguiuk? Guuti ujarpiuk? Immaqa qinnutinnut tamanna akissutaavoq.
^ imm. 5 Guutimit tusarneqarluni qanoq qinusoqassanersoq pillugu paasisaqarnerorusukkuit takuuk atuakkami Biibilimi sorpiaat ajoqersuutigineqarpat?-mi kapitali 17. Jehovap Nalunaajaasuinit saqqummersinneqartoq.