Sambu

7 Nga Nzambi Owanga yo Vana Mvutu za Sambu?

E KIUVU kiaki kisikamesanga luzolo lwa wantu ayingi. Nkand’a Nzambi uvovanga vo Yave owanga kikilu e sambu. Kansi, muna wa yovo lembi wa e sambu yeto, e diambu kwa yeto dina.

O Yesu watumba afidi a mabundu muna lumbu yandi ana basambanga kuna kuvùnina mu kuyisonga kaka kwa wantu. Wavova vo wantu awaya “batambwidi kala nsendo au,” i sia vo batambula kaka dina bavavanga, moneka kwa wantu, kansi, ke batambula ko dina balombanga, kadi e sambu yau ke yawakananga ko kwa Nzambi. (Matai 6:5) Diau adimosi mpe o unu, wantu ayingi vava besambanga, luzolo lwa yau kibeni besianga va fulu kiantete ke mu luzolo lwa Nzambi ko. Wau bevezanga e nkanikinu mia Nkand’a Nzambi mina miyikilu kala, o Nzambi kewanga sambu yau ko.

Adieyi tuvova mu kuma kiaku? Nga Nzambi owá yo vana mvutu za sambu yaku? Muna vana e mvutu za sambu, Nzambi ketalanga nsi ko, nkand’a nitu yovo mpila zingu kia muntu. Nkand’a Nzambi ukutusikidisanga vo ‘Nzambi ke swaswanesanga wantu ko, kansi muna zula yawonso, on’okumvumina yo vanga unsongi, wina ye dienga oku kena.’ (Mavangu 10:34, 35) Nga mvovo miami ngeye mpe miyikanga? Ndiona ovuminanga Nzambi, otoma kunzolanga yo mona wonga wa kunkendeleka. Avo unsongi ovanganga, ovav’o vanga edi diansongi vana meso ma Nzambi, ke mu vanga luzolo lwa ngeye kibeni ko yovo luzolo lwa akaka. Nga ozolele vo Nzambi ka wá kieleka e sambu yaku? Nkand’a Nzambi ulenda kusadisa mu vanga wo. *

Ndonga bevavanga vo Nzambi kavana e mvutu za sambu yau mu mpil’esivi. Kansi, kana nkutu muna lumbu ya selo ya Nzambi kuna nz’ankulu, o Nzambi mu tutu kavangilanga wo. Ezak’e ntangwa, vava Nzambi kavanganga esivi, kolo kiayingi kiaviokanga mu vanga esivi diakaka. Nkand’a Nzambi usonganga vo evangu dia vanga masivi diafokoka vava alongoki a Yesu bamana fwa. (1 Korinto 13:8-10) Nga diadi disongele vo Nzambi kevananga mvutu za sambu ko o unu? Ke wau ko. Badika eyaka sambu kavanina e mvutu o Nzambi.

Nzambi ovananga e ngangu. O Yave i Nto a ngangu za kieleka. Ovananga ngangu kuna mvevo wawonso kw’awana bevavanga luludiku lwandi yo lemvokela lo.—Yakobo 1:5.

Nzambi ovananga mwand’andi avelela. E mwand’avelela i ngolo za Nzambi. Ka vena ngolo zisundidi zazi ko. Ulenda kutusadisa mu zizidila e mpasi. Ulenda kutuvana luvuvamu vava tukalanga mu mpasi. Ulenda kutusadisa mpe mu yima e fu yambote. (Ngalatia 5:22, 23) Yesu wavovesa alandi andi vo Nzambi ovananga lukau lwa mwand’avelela kuna mvevo wawonso.—Luka 11:13.

Nzambi oludikanga awana bekumvavanga ye kwikizi kiawonso. (Mavangu 17:26, 27) Omu nza yawonso, vena ye wantu bevavanga ludi ye kwikizi kiawonso. Bazolele zaya ludi mu kuma kia Nzambi, nkumbu andi, y’ekani diandi mu kuma kia ntoto yo wantu yo vava zaya una balenda kumfinamena. (Yakobo 4:8) Nkumbu miayingi Mbangi za Yave bewanananga ye wantu a mpila yayi ye bekalanga y’etima diakubasonga e mvutu za yuvu yau muna Nkand’a Nzambi.

Nga ozolele zaya Nzambi? Nga e kiaki i kuma otambulwidi Eyingidilu diadi? Eyayi nanga i mpila ina Nzambi kavanini e mvutu za sambu yaku.

[Mvovo Vana Yand’a lukaya]