7

 Kana Mulimu U ka Utwa ni ku Alaba Litapelo za Luna?

PUZO ye fahalimu i hoha hahulu mamelelo ya batu ni ku ba tahiseza takazo ya ku bata ku ziba ze ñata. Bibele i bonisa kuli Jehova wa utwanga litapelo mwa miteñi ya luna. Mulimu wa kona ku utwa kamba ku sa utwa litapelo za luna ku likana ni mo lu lapelela.

Jesu na nyazize baeteleli ba bulapeli ba mwa miteñi ya hae ba ne ba lapelanga ka buipi; ili bao ne ba iponahazanga ku luka mwa meto a batu. Na bulezi kuli batu ba ba cwalo ne “ba ngile mupuzo wa bona,” ili ku talusa kuli ne ba ka fumana ze ne ba bata hahulu, ili ku bonwa ki batu, kono ne ba si ke ba fumana ze ne ba tokwa, ili ku utwiwa ki Mulimu. (Mateu 6:5) Ni kacenu batu ba bañata ba lapelanga mo ba latela isiñi mwa latela Mulimu. Bakeñisa kuli ha ba latelelangi likuka za Bibele ze lu nyakisisize, Mulimu ha utwangi litapelo za bona.

Mina bo? Kana Mulimu u ka utwa ni ku alaba litapelo za mina? Kalabo kwa puzo ye, ha i si ka itinga fa mushobo wa mina, naha ko mu simuluha, kamba mayemo a mina mwa bupilo. Bibele i lu kolwisa kuli: “Mulimu haa yi ka ku keta batu; kono mwa sicaba ni sicaba, ya mu saba mi a eza se si lukile, u lumelelwa ki Yena.” (Likezo 10:34, 35) Kana mwa saba Mulimu ni ku eza ze lukile? Haiba mwa saba Mulimu, fo ku talusa kuli mu mu fa likute le lituna ni ku saba ku eza lika ze ka mu nyemisa. Haiba mu eza ze lukile, fo ku talusa kuli mu bata ku eza za bulela Mulimu kuli li lukile isiñi ku eza mo mu latela kamba mo ba latela batu ba bañwi. Kana luli mu bata kuli Mulimu a utwe litapelo za mina? Bibele i bonisa mo mu kona ku lapelela kuli Mulimu a mi utwe. *

Batu ba bañata ba bata kuli Mulimu a alabe litapelo za bona ka makazo. Mwa linako ze ne i ñolwa Bibele, Mulimu na sa ezangi limakazo ze cwalo nako kaufela. Ka linako ze ñwi, ne ku fitanga lilimo ze ñata ku zwa fo i ezezwa makazo ye ñwi ku ya ku ye ñwi. Hape Bibele i bonisa kuli nako ya limakazo ne i felile hamulaho wa linako za baapositola. (1 Makorinte 13:8-10) Kana taba yeo i talusa kuli Mulimu ha alabangi litapelo mwa miteñi ya cwale? Batili! Ha mu nyakisise litapelo ze ñwi za alabanga.

Mulimu wa fanga butali. Butali kaufela bwa niti bu zwa ku Jehova. U fanga hahulu butali, mi u bu fanga kwa batu ba ba bata ku etelelwa ki yena ni ba ba bata ku pila ka butali bwa hae.—Jakobo 1:5.

Mulimu wa fanga moya wa hae o kenile ni lituso za wona kaufela. Moya o kenile ki maata a Mulimu a sebeza. Ha ku na maata a mañwi a fita maata a Mulimu. Moya o kenile wa kona ku lu tusa ku tiyela miliko. Wa kona ku lu tahiseza kozo ha lu katazwa ki lika ze ñwi. Wa kona ku lu tusa ku ba ni tulemeno to tuñwi to tunde. (Magalata 5:22, 23) Jesu na kolwisize balateleli ba hae kuli Mulimu wa fanga hahulu mpo ya moya o kenile.—Luka 11:13.

Mulimu wa fanga zibo kwa batu ba ba mu bata. (Likezo 17:26, 27) Mwa lifasi kaufela, ku na ni batu ba ba bata luli ku ziba niti. Ba bata ku ziba za Mulimu—libizo la hae, mulelo wa hae ka za lifasi ni batu kamukana, ni mo ba kona ku sutelela ku yena. (Jakobo 4:8) Lipaki za Jehova hañata ba kopananga ni batu ba ba cwalo mi ba tabelanga ku ba bonisa likalabo za mwa Bibele kwa lipuzo zeo.

Kana kona ze mu amuhelezi magazini ye kuli mu zibe ze i bulela Bibele ka za lipuzo za mina? Kana mu sweli mwa bata Mulimu? Mwendi ye ki yona nzila yeo Mulimu a alaba tapelo ya mina.

[Litaluso za kwatasi]