Lemo

7 Be Nyasaye Winjo Kendo Dwoko Lemowa?

PENJO moket malo kaeni en mamiyo ji bedo gi ilo ka gidwaro ng’eyo dwoko. Muma nyiso ni Jehova winjo lemo e ndalogi. Mondo owinj kata kik owinj lemowa, luwore gi kaka wawegi watimo.

Yesu nokwedo jotend din me kindene ma ne lemo mana e yor wuondruok mondo ginyisre e wang’ dhano ni gin joma oluoro Nyasaye. Nowacho ni joma kamago ne biro ‘yudo pokgi,’ matiendeni ne gibiro yudo mana gima ne gidwaro ahinyano, ma ne en pak mag dhano, to ne ok gidhi yudo gima ne dwarore ni giyud moloyo, ma ne en ni Nyasaye owinjgi. (Mathayo 6:5) Kamano bende e kindewagi, ji mang’eny lemo kaluwore gi dwachgi giwegi to ok dwaro mar Nyasaye. Nikech gichayo puonj mag Muma mwasewuoyoegi, Nyasaye ok winjgi.

To nade in? Be Nyasaye biro winjo kendo dwoko lemo magi? Dwoko ok otenore kuom oganda miwuokie, piny midakie, kata kaka ing’eri e kind oganda. Muma singonwa ni: “Nyasaye ok odewo wang’ ji; to kuom ogendini duto ng’at moluore, kendo ma timo tim makare, e moyiego.” (Tich Joote 10:34, 35) Be in ng’at ma kamano? Ka iluoro Nyasaye, imiye luor mamalo chuth kendo iluoro timo gima ok more. Timo gima kare tiende en dwaro timo gima Nyasaye wacho ni ni kare, kar luwo mana dwachi iwuon kata dwaro mag dhano weteni. Be idwaro gadier ni Nyasaye owinj lemoni? Muma nyisi kaka inyalo timo mano. *

Onge kiawa ni ji mang’eny dwaro ni Nyasaye odwok lemogi e yor hono. Kata mana e kinde mag Muma, Nyasaye ne timo honni mana ka dichiel. Kinde moko higini miche ne kalo kapok otim hono moro. E wi mano, Muma nyiso ni kinde mag timo honni norumo bang’ joote. (1 Jo Korintho 13:8-10) Be mano nyiso ni koro Nyasaye ok dwok lemo mitimo kindewagi? Ok en kamano ngang’! Non ane lemo moko modwoko.

Nyasaye chiwo rieko. Jehova e Soko mar rieko madier duto. Ochiwo rieko e yo malach, kotimo kamano gi chuny mang’won ne ji duto madwaro ni otagi kendo madwaro luwo kaka owacho.​—Jakobo 1:5.

Nyasaye chiwo roho mare maler kaachiel gi ber duto ma roho kelo. Roho en teko mar Nyasaye. Onge teko maloyo mano. Tekono nyalo konyowa nano e bwo tem. Onyalo pong’o chunywa gi kuwe sama wachandore. Onyalo konyowa nyago kido mamoko mabeyo. (Jo Galatia 5:22, 23) Yesu nosingo ne jolupne ni Nyasaye oikore chiwo michni e yo malach.​—Luka 11:13.

Nyasaye chiwo rieko ne joma manye gi kinda. (Tich Joote 17:26, 27) E piny mangima, nitie jogo mamanyo adiera gi chuny maler. Gidwaro ng’eyo Nyasaye​—nyinge, gimomiyo nochweyo piny gi dhano, koda kaka ginyalo sudo machiegni kode. (Jakobo 4:8) Joneno mag Jehova romo gi joma chalo kamago kinde ka kinde, kendo gimor miyogi dwoko mowuok e Muma kuom penjo machalo kamago.

Be mano e momiyo isomo gasedni? Dibed ni idwaro ng’eyo Nyasaye? Nyalo bedo ni ma e yo ma Nyasaye dwokogo lemo mari.

[Weche moler piny]