Ṭawngṭaina

7 Pathianin A Ngaithlain A Chhâng Ang Em?

A CHUNGA zawhna khian phûrna leh hriat châkna nasa tak min neihtîr a. Pathian Jehova’n tûn laiah ṭawngṭaina a ngaithla ngei a ni tih Bible chuan a târ lang. Mahse, kan ṭawngṭaina a ngaihthlâk leh thlâk loh chu keimahniah a innghat thui hle a ni.

Isua chuan vervêk taka ṭawngṭai ṭhîn a hun laia sakhaw hruaitute chu a dem a; anni chuan vântlâng hmaa lan fel ringawt chu an buaipui a ni. Chûng mite chuan “an lâwmman chu an hmu zo tawh” tih Isua chuan a sawi a; a awmzia chu an duh ber—mite ngaihsakna lâk—chauh chu an hmu ang a; an mamawh tak—an ṭawngṭaina Pathian ngaihthlâksak—erawh an hlawh lo vang tihna a ni. (Matthaia 6:5) Chutiang bawkin, tûn laiah pawh mi tam tak chu Pathian duhzâwng ang ni lovin, anmahni duhzâwng angin an ṭawngṭai a. Kan sawiho tâk Bible thu bulte chu an hnâwl avângin Pathian ngaihthlâk an hlawh lo a ni.

Nang, eng nge i dinhmun ve? Pathianin i ṭawngtaina chu a ngaithlain, a chhâng che ang em? A chhânna chu i ram, i hnam, a nih loh leh i dinhmunah a innghat lo. Bible chuan: “Pathianin mi duhsak bîk a nei lo tih dik takin ka hria e; nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tih min tiam a ni. (Tirhkohte 10:34, 35) Hêng thute hian i nihna a hril em? Pathian i ṭih chuan amah chu i ngaihlu ang a, tihlâwm loh chu i hlau vang. Fel taka thil i tih chuan, nangmah emaw, mi dangte emaw duhzâwng zâwm lovin, Pathianin thil dik a tihte zawm chu i tum ang. I ṭawngṭaina Pathianin ngaithla se i ti tak zet em? Bible chuan Pathian ngaihthlâksak ni tûra ṭawngṭai dân min hrilh a ni. *

Mi tam tak chuan an ṭawngṭaina chu thilmaktihna hmangin Pathianin chhâng se an duh a. Mahse, Bible hun lai pawh khân, Pathian chuan chutiang thilmak chu a ti khât hle. Thilmak tih ṭhenkhat phei chu kum zabi engemaw zât danah a thleng chauh a ni. Chu bâkah, thilmak tihna hun chu tirhkohte an thih zawh hnu chuan a tâwp tawh tih Bible chuan a târ lang bawk. (1 Korinth 13:8-10) Chuti chu tûn laiah Pathianin ṭawngṭaina a chhâng tawh lo tihna em ni? Ni lo ve! A chhân ṭawngṭaina ṭhenkhat hi lo ngaihtuah ta ila.

Pathianin finna a pe. Pathian Jehova chu finna dik zawng zawng Hnâr a ni a. A kaihhruaina leh chu mi mila nung duhte hnênah chuan phal takin a pe ṭhîn.—Jakoba 1:5.

Pathian chuan a thlarau thianghlim leh chu mi zâra neih theih hlâwkna zawng zawng chu a pe. Thlarau thianghlim chu Pathian chakna che vêl reng a ni a. A aia chak zâwk engmah a awm lo. Chu chuan fiahnate tuar chhuak tûrin min ṭanpui thei a. Kan mangan laiin rilru thlamuanna min pe thei a. Mize dang ṭha leh duhawm takte nei tûrin min ṭanpui thei bawk. (Galatia 5:22, 23) Isua chuan a hnungzuitute chu Pathianin he thilpêk hi phal takin a pe ṭhîn dâwn tih a tiam a ni.—Luka 11:13.

Pathianin tih tak zeta amah zawngtute hnênah hriatna a pe. (Tirhkohte 17:26, 27) Khawvêl hmun tinah hian, tih tak zeta thutak zawng mi an awm a. Anni chuan Pathian chungchâng—a hming, lei leh mihringte tâna a thiltum, amah hnaih theih dân—chu hriat an duh a ni. (Jakoba 4:8) Jehova Thuhretute chuan chutiang mi chu an hmu fo va, an hnêna chûng zawhnate Bible-in a chhânna hrilhhriat chu nuam an ti hle.

He magazine i dawn chhan chu chutiang mi i nih vâng a ni em? Pathian i zawng em? He magazine hi i ṭawngṭaina a chhânna che pawh a ni thei asin. (w10-E 10/01)

[Footnote]