ATZUN xjel lu in nul toj kywiʼ nim xjal ex kyaj tuʼn tok kybʼiʼn tzaqʼwebʼil tiʼj. Ma tzʼel qnikʼ tiʼj qa in tzaj tbʼiʼn Jehová qe naʼj Dios. Pero ¿tiʼ jaku bʼant quʼn tuʼn ttzaj tbʼiʼn qnaʼj Dios?

Tzaj tqʼoj Jesús kyiʼj nejenel kye okslabʼil tuʼnju mintiʼ e naʼn Dios toj tumel. Oʼkx e ximen tiʼj tuʼn kyjaw nimsaʼn kyuʼn xjal. Tqʼama Jesús jlu kyiʼj: «Oʼkxtzun chʼin chojbʼil kyeju». Nyatoq nim toklen toj kywitz nejenel kye okslabʼil tuʼn ttzaj bʼiʼn kynaʼj Dios, tuʼnju oʼkx kyajtoq tuʼn kyok keʼyin kyuʼn xjal. Ex atzun jlu ok te «chʼin chojbʼil» xi qʼoʼn kye (Mateo 6:5). Chʼixme ax jlu in bʼaj toj ambʼil jaʼlo. Nim qe xjal oʼkx in che ximen kyiʼjx aj kynaʼn Dios. Ex mintiʼ in tzaj bʼiʼn kynaʼn Dios tuʼnju mintiʼ in che ok lepeʼ tiʼjju in tzaj tqʼamaʼn Tyol Dios ik tzeʼn ma tzʼel qnikʼ tiʼj kyoj xnaqʼtzbʼil ma che kyaj.

Yajtzun qe, ¿tiʼ kbʼantel quʼn tuʼn ttzaj tbʼiʼn Jehová qnaʼj Dios? Mintiʼ in nok tqʼoʼn Jehová twitz tiʼj qyajil, tiʼj qtnam nix tiʼj alkye tten qanqʼibʼil aj ttzaj ttzaqʼweʼn qnaʼj Dios. In tzaj tqʼamaʼn Xjan Uʼj qa «mintiʼ in tkeʼyin Dios aju kyxilen xjal». Sino «in tzalaj kyiʼj xjal at tchi [...] kye tuj tkyaqil nasyon, ex in kybʼinchaʼn aju tzʼaqlxix» (Hechos 10:34, 35). Qa at tchiylal Dios te jun xjal, in nok tqʼoʼn toklen ex nya taj tuʼn tkubʼ tbʼinchaʼn jun tiʼ jaku tzaj tbʼis tuʼn. Aju xjal taj tuʼn tkubʼ tbʼinchaʼn aju tzʼaqlixix, in nok tilil tuʼn tuʼn tbʼant tajbʼil Dios tuʼn ex nya aju te tajbʼil moqa aju kyajbʼil txqantl. Tuʼntzunju, qa qaj tuʼn ttzaj tbʼiʼn Jehová qnaʼj Dios, nim toklen tuʼn qok lepeʼ tiʼjju in tzaj tqʼamaʼn Tyol. *

Ateʼ nim xjal kyaj tuʼn ttzaj tzaqʼweʼn kynaʼj Dios tuʼn jun milagr. Noqtzun tuʼnj, noq junjun maj bʼant jlu tuʼn Dios toj ambʼil ojtxe. Kyoj qe txʼolbʼabʼil tkuʼx toj Xjan Uʼj, in tzaj yekʼin qa ikʼ nim ambʼil kyxol qe milagr bʼant tuʼn Dios. Ax ikx, in tzaj tqʼamaʼn Tyol Dios qa ya mlaytoq che bʼant milagr tej kykyim apóstol (1 Corintios 13:​8-10). Pero mintiʼ in tzaj tyekʼin jlu qa mintiʼ in tzaj tbʼiʼn Jehová qe naʼj Dios. Qo xnaqʼtzan kyiʼj junjun techel tiʼj tzeʼn in tzaj ttzaqʼweʼn Jehová qnaʼj Dios toj ambʼil jaʼlo.

In tzaj tqʼoʼn qnabʼil. At nim tnabʼil Jehová, ex in tzaj tqʼoʼn kynabʼil qeju in che jyon onbʼil tukʼil ex in nok tilil kyuʼn tuʼn kynimen te (Santiago 1:5).

In tzaj tqʼoʼn xewbʼaj xjan qe. Aj qyolin tiʼj xewbʼaj xjan, atz in qo yolin tiʼj tipumal Dios, ex mintiʼ juntl tiʼ jaku tzʼok qmojbʼaʼn tukʼil jlu. In nonin xewbʼaj xjan qiʼj tuʼn qex twitz nya bʼaʼn, tuʼn miʼn ttzaj bʼaj qkʼuʼj ex tuʼn kyten tbʼanel qmod (Gálatas 5:​22, 23). Ex kyaj tqʼamaʼn Jesús qa tzul tqʼoʼn Jehová xewbʼaj xjan qe, noq jteʼxku maj kxel qqanin te (Lucas 11:13).

In tzaj tqʼoʼn kyojtzqibʼil xjal in che jyon tiʼj axix tok. In tzaj tqʼamaʼn Hechos 17:​26 ex 27 qa nim qe xjal in che jyon tiʼj Dios twitz tkyaqil Txʼotxʼ. Kyaj tuʼn tel kynikʼ tiʼj tbʼi ex tiʼj tiʼ t-ximbʼetz at tiʼj Txʼotxʼ ex kyiʼj xjal. Ax ikx kyaj tuʼn tel kynikʼ tiʼj tzeʼn jaku che ok laqʼeʼ ttxlaj (Santiago 4:8). In che kanet nim xjal kyuʼn testigos de Jehová kyaj tuʼn tel kynikʼ tiʼj Dios ex in che tzalaj aj kyonin kyiʼj tuʼn tel kynikʼ tiʼj Tyol.

¿Axpe jlu in bʼaj tiʼja? ¿Mape kyaj tiʼna uʼj lu tuʼnju in jyona tiʼj Dios? Qa ikju, bʼalo jun yekʼbʼil jlu tiʼj qa ma tzaj tzaqʼweʼn tnaʼj Diosa.