NE trʼønꞹ nge k’ꞹ nee ra mba̱ra̱ji na punkjꞹ ntee. A ro nuji ke e Tsʼitajensʼe ⱥrⱥ yo oración, pe dya trʼexe. Nuʼma, ¿ra dyⱥrⱥ ma ri øtꞹji? Ja̱a̱, ma ra øtꞹji kʼua ja nzi ga nee angeze.

E Jesús dya mi nuu na joo ma mi kjaji oración kʼo mbøkjimi kʼo mi ka̱ra̱ mi jingua, na ngeje ngextrjo mi neji ke yo ntee ro jñanrraji ke angezeji me mi matrʼꞹjikjimi. Ñe e Jesús bo mama ke angezeji “ya chunꞹji kʼꞹ to̱jo̱ji”. Kʼo mbøkjimi dya mi pɇspiji nguenda ma e Palesito ajensʼe ro dyⱥrⱥ o maxke iyo, angezeji ngextrjo mi neji ke kʼo dyaja ntee ro jñanrraji kʼo mi kjaji, ngekʼua ngextrjokʼo kʼo mi søø ro mbɇsʼiji (Mateo 6:5, NTD). Yo paa ke ri ka̱ra̱jidya xo kjogꞹ akjanu, yo ntee kjaji oración pe dya enchʼeji o mꞹbʼꞹ e Yose, mbeñetsʼɇji kʼo neji angezeji dya nge kʼo nee e Tsʼitajensʼe. Ngekʼua e Palesito ajensʼe dya trjꞹrꞹ nu oración ke kjaji.

Ñezgøji, ¿pje søø ra manji? E Jehová ra dyⱥrⱥ kʼo ri øtꞹji zø ja ri menzumꞹji, zø naño jñaa ri ñaji. Kja ne Biblia mama ke e Tsʼitajensʼe “dya juajnꞹ kjo ra sʼiya”, xo mama ke zø ja menzumꞹ na ntee, “pero ma ra zu̱u̱ e Mizhokjimi ñe ra tsjaa ja kʼo nzi ga nee [...] nuʼma ra mⱥpⱥ Mizhokjimimakʼo” (Hechos 10:34, 35). Ja̱a̱, na ntee ke su̱u̱ e Diosi dya nee ra tsjaa kʼo na sʼoo na ngeje nee ra mⱥpⱥ o mꞹbʼꞹ angeze. Ñe na ntee ke nee ra tsjaa ja kʼo nzi ga nee angeze, ra mimi na joo ja ga nee e Tsiʼtajensʼe, dya nge ja nzi ga netsjɇ. Ngekʼua ma ri negøji ke e Yose ra dyⱥrⱥ ma pje ri øtꞹji, ra pɇspiji nguenda ja ga mama ne Biblia a.

Na punkjꞹ ntee neji ke e Diosi ra ndꞹrꞹ nu oración ke kjaji ñe ke ra tsjaa na milagro. Pe xo ñeje kʼo paa ma o dyopjꞹji ne Biblia janzitrjo vez go nrrꞹrꞹ akjanu e Palesito ajensʼe. Ñe ma mi kjaa na milagro, mi mezhe na punkjꞹ kjɇɇ ke ro yepe ro ndꞹrꞹ ko na milagro. Kja ne Biblia mama ke kʼo milagro ke o tsjaa mi jingua dya kja ro kjogꞹ ma ro nrru̱u̱ kʼo apóstole (1 Corintios 13:8-10). Nuyo, dya nee ra mama ke e Diosi dya ⱥrⱥ ma pje ri øtꞹji. Ra nuji ja ga ñetse ke yo paa ke ri ka̱ra̱jidya e Tsʼitajensʼe ⱥrⱥ ma pje ri øtꞹji.

Pjøxkꞹji ra trjumbeñeji na joo. Ngextrjo e Palesito ajensʼe kʼꞹ na kjuana me nzhamba̱rꞹ søø ra mbøxkꞹji ra pa̱ra̱ji texe kʼo na joo ma ra øtꞹji, xo ñeje ma ri ⱥtⱥji kʼo mama angeze ra dyakꞹji kʼo me ni jyodʼꞹ ra pa̱ra̱ji (Santiago 1:5).

Dakꞹji o zɇzhkjimi. Dya bʼꞹbʼꞹ daja ke dyotrjobi nu espíritu santo, ke nge o zɇzhi e Mizhokjimi, ko nu espíritu santo angeze kjaa texe o bʼɇpji. Xo ñeje ko nu espíritu santo pjøxkꞹji ra sɇchiji yo nrrumꞹ ke ri kjogꞹjidya, kjakꞹji ra soya in mꞹbʼꞹji ma pje nrre ri kjogꞹji ñe pjøxkꞹji ra minji janzi ga nee e Jehová (Gálatas 5:22, 23). E Jesús bo mama ke e Diosi ra dyakꞹji o espíritu santo ma ra øtꞹji (Lucas 11:13).

Pjøxkꞹji ra pa̱rgøji kʼo na kjuana. Nzakja mama kja Hechos 17:26, 27, na pꞹnkjꞹ ntee kja ne xoñijomꞹ jodʼꞹji e Diosi. Nee ra mba̱ra̱ji pje ni chju̱u̱ e Yose, pje ra tsjaa ko ne xoñijomꞹ, ja rga mimi yo ntee yo paa yo ba e̱je̱, ñe pje ra tsjaji ngekʼua ra chɇzhiji ko e Mizhokjimi (Santiago 4:8). Yo testigo e Jehová, ri totrʼꞹjme na punkjꞹ ntee ke nee ra mba̱ra̱jiyo, xo me ti mⱥkjøjme ma ri jichijme yo ntee ngekʼua ra mba̱ra̱ji pje trjꞹrꞹ ne Biblia.

¿Xo gi nee ri mba̱ra̱ kʼo na kjuana ngekʼua gi xorꞹ ne skuamadya? ¿Gi nee ri chɇzhi ko e Yose? Bʼꞹma e Diosi bo unꞹ nguenda ke gi nee ri pa̱rge, ngekʼua nee ra mbøxkʼꞹ ko ne skuamadya.