Iuzyo lii likalenga antu yalondesya sana ukumanya icasuko. Baibo ikalanda ukuti Yeova akauvwa mapepo ndakai. Vino tukacita i vingalenga Leza auvwe mapepo itu nanti foo.

Yesu wakalipile ya simapepo apepanga nu usomvi; yalondanga sile ukuti antu yayalola kwati alungami. Walanzile ukuti antu yaa yapokelela “icilambu cao consi,” icikupiliula ukuti yaali nu kupokelela sile vino yalondanga sana, kuli kuti ukutemwikwa uku yantu, lelo yataali nu kupokelela vino yalondekwanga, kuli kuti Leza ataali nu kuvwa mapepo yao. (Mateo 6:5) Na ndakai kwene antu aingi yakapepa ukulingana nu kulonda kwao, asi kulingana nu kulonda kwakwe Leza. Yasiikako mano ku visinte vya muli Baibo vino itulandapo mpiti, nupya cico cikalenga ukuti Leza atauvwa mapepo yao.

Nga mwemo? Uzye Leza akauvwa nu kwasuka mapepo inu? Leza asiasuka mapepo ya muntu pa mulandu sile ni nkanda, kuno wavyalilwa nanti vino wamanyikwa umu wikazi. Baibo ikatunena ukuti: “Leza atakwata kapaatulula, lelo umu nko zyonsi umuntu aakamutiina nu kucita ivisuma akapokelelwa kuli aliwe.” (Milimo 10:34, 35) Uzye vikwene avino caya kuli mwemwe? Ndi cakuti mukatiina Leza, ala cikupiliula ukuti mwamucindika sana nupya musilonda ukumusosya. Ukucita ivilungame kukapiliula ukulonda ukucita vino Leza walanda ukuti ali visuma ukucila ukucita vino mweineco mukulonda nanti vino yauze yakulonda. Uzye mukalonda ukuti Leza auvwa mapepo inu? Baibo ikalanda vino mungacita pa kupepa pakuti Leza auvwa mapepo inu. *

Kwene antu aingi yakalonda ukuti Leza aasuka mapepo yao umu cizungusyo. Nanti sile umu nsita ino ivyalumbulwa muli Baibo vyacitikanga, asi lyonsi lino Leza wacitanga ivizungusyo vya musango uwo. Insita zimwi papitanga imyaka iingi ukufuma pano icizungusyo conga icalembwa muli Baibo cacitikila, pakuti na cuze cize cicitike. Nupya Baibo ikalanda ukuti iciputulwa ca nsita ino vizungusyo vyacitikanga cizile icisila umu manda ya yatumwa. (1 Kolinto 13:8-10) Uzye cii cikupiliula ukuti ndakai Leza asiasuka mapepo? Awe! Lolini vino Leza akaasuka amapepo yamwi.

Leza akapeela mano. Yeova ali Ntulo ya mano yonsi acumi. Akapeela amano yayo kuli yonsi aakalonda utunguluzi wakwe alino nu kuomvya amano yayo umu umi wao.—Yakobo 1:5.

Leza akapeela umupasi wakwe uwa muzilo alino ni visuma vyonsi ivikafuma uku mupasi wa muzilo. Umupasi wa muzilo a maka yakwe Leza akaomba. Kutaya amaka acila pa maka yayo. Umupasi wa muzilo ukatwazwa ukuzizimizya intazi. Ukatwazwa ukuya nu mutende lino tukucula. Nupya ukatwazwa ukuya ni miyele yuze isuma iingalenga kuti Leza atutemwe. (Galatiya 5:22, 23) Yesu wanenyile alondezi yakwe ukuti Leza akaitemelwa ukupeela upe kwene uu.—Luka 11:13.

Leza akapeela mano kuli yano yakamulonda. (Milimo 17:26, 27) Umu nsi yonsi mwaya antu akalondesya sana icumi. Yakalonda ukumanya Leza, ukumanya izina lyakwe, vino akalonda insi na antunze ukuya, alino na vino yangapalama kuli aliwe. (Yakobo 4:8) Ilingi ya Nte Yakwe Yeova yakakomanya antu ya musango uwo nupya yakauvwa ningo ukuyalanga amasuko amuli Baibo uku mauzyo yayo.

Uzye ali mulandu uno imupokela magazini wii? Uzye mukulonda ukumanya Leza? Limwi ikwene ingaya ali nzila ino akwasukilamo ipepo linu.