MIAKEJ maseualmej kinekij kimatisej ni tlamantli. Kej ya tikitakej, maske miakej maseualmej momaijtouaj, toTeotsij amo nochi kintlakakilia. Uan tojuantij, ¿techtlakakilia? Tlaj tijnekij ma techtlakakili moneki tijchiuasej se keski tlamantli.

Jesús kikualankamakayaya kema se keskij katli tlayakanayayaj ipan religiones kinekiyayaj kinextisej kuali tlaneltokayayaj kema momaijtouayayaj, yeka kiijtok “toTeko axkintlaxtlauis”. Nopa tlayakananij amo kichiuayayaj kampeka ma kintlakakili toTeotsij, san kinekiyayaj maseualmej kuali ma kinitakaj. Yeka toTeotsij amo kema kuali kinitak (Mateo 6:⁠5). Ipan ni tonali nojkia miakej maseualmej amo kichiuaj kampeka ma kintlakakili toTeotsij uan san moiljuiaj ipan inijuantij. Uan pampa amo kichiuaj kej tikitakej ipan nopa sekinok tlamachtili, toTeotsij amo kinnankilia.

Uan tojuantij, ¿kenijkatsa timomaijtouaj? Tlaj tijnekij toTeotsij ma techtlakakili, amo moneki tiitstosej ipan se pilaltepetsi o ipan se ueyi altepetl, titlatominpiasej o amo. Biblia kiijtoua “toTeko axtechchikoiknelia titlakamej. Uan ipan kampa ueli tlali yajaya kinselia nopa tlakamej tlen kitlepanitaj uan tlen kichiuaj tlen kuali” (Hechos 10:​34, 35). Se akajya katli tlauel kitlepanita toTeotsij amo kichiua tlen kiyolkokoua. Katli kichiua tlen xitlauak, kichiua kampeka monejnemiltis kej toTeotsij kipaktia, amo mosentlalia kichiuas tlen ya kineki, yon tlen sekinok maseualmej kinekij. Uajka, tlaj tijnekij ma techtlakakili toTeotsij kema timomaijtouaj, moneki tijchiuasej tlen Biblia kiijtoua. *

Miakej maseualmej kinekij toTeotsij ma kinnankili ika se ueyi tlamantli kema momaijtouaj. Maske kiampa kinekij, uejkajkia amo nochi kiampa kinnankilik katli kinojnotsayayaj. Ipan Biblia kiijtoua kema toTeotsij kichiuayaya se ueyi tlamantli, kemantika panoyaya miak xiuitl uan teipa kichiuayaya seyok. Nojkia, ipan Biblia kiijtoua nopa uejueyi tlamantli tlamiskia kema Cristo itokilijkauaj mikiskiaj (1 Corintios 13:​8-10). Ni amo kiijtosneki toTeotsij amo technankilia kema timomaijtouaj. Ma tikitakaj se keski tlamantli kampa kinextia kenijkatsa Jehová technankilia ipan ni tonali.

Techmaka tlalnamikilistli. San toTeotsij tlauel tlalnamiki, yeka kinmaka tlalnamikilistli katli kitlajtlaniaj uan kichiuaj kampeka kineltokasej (Santiago 1:⁠5).

Techmaka itonal. ToTeotsij itonal eli ichikaualis, uan san ya nopa techpaleuia ma tikixnamikikaj tlaouijkayotl, techmaka tlaseuilistli kema timotekipachouaj, uan techpaleuia ma tijnextikaj kuajkuali tlamantli (Gálatas 5:​22, 23). Jesús kiijtok toTeotsij techmakas itonal kema monekis (Lucas 11:13).

Kinmaka tlalnamikilistli katli kinekij momachtisej Biblia. Kej kiijtoua Hechos 17:​26, 27, miakej maseualmej katli kuali ininyolo uan kampa ueli itstokej kinekij kiixmatisej toTeotsij, kinekij kimatisej itoka, tlake mosentlalijtok kichiuas ipan Tlaltipaktli, kenijkatsa kinpaleuis maseualmej uan kenijkatsa uelis kinechkauisej (Santiago 4:⁠8). Jehová itlajtoltemakauaj nochipa kinpantiaj maseualmej katli kinekij kimatisej nochi ni tlamantli uan yeka kinmachtiaj ika Biblia.

¿Tijselik ni amatlajkuiloli pampa tijneki tijmatis se keski tlamantli? ¿Tijneki tikixmatis toTeotsij? Tlaj kena, uelis toTeotsij kiampa mitsnankilia.