ONỌ ọrana ọ yẹ ọwan omamerhomẹ, ọrhẹ ẹhẹn re ne rhe ẹkpahenrhọ ye. Baibol na o djephia taghene Osolobrugwẹ ọ kerhọ ẹrhomo ihworho inyenana. Oborẹ a nẹrhomo na lele, yo no djephia sẹ Osolobrugwẹ ọnọ kpahenrhọ ye yanghene ọ kpahanrhọ ye-e.

Jesu ọ ghwọghwu ilori ẹga ri havwiẹ ọke ọnẹyen ra nẹrhomo omeru; aye e ruẹ ọnana neneyo awọrọ i ha omamọ ukẹro ni aye. Jesu ọ tare taghene aruẹ ihworho enana ina mẹrẹn “osẹkwa aye vuọnvuọn,” nọyẹ aye ina mẹrẹn oborẹ aye a guọlọ ọvo ro rhiẹ ujiri ituakpọ, ọrẹn aye i vwo ekwerhọ Osolobrugwẹ-ẹ. (Matthew 6:5) Omaran ọ ji havwọ inyenana, ihworho buebun a nẹrhomo lele ọhọre aye ukperẹ ono rhiẹ ọhọre Osolobrugwẹ. Omarana, aye i vwa rha mẹrẹn ekwerhọ Osolobrugwẹ-ẹ, nime aye i tiẹn iruemru-urhi ọnẹyen.

Wẹwẹ vwo? Osolobrugwẹ ono rhon ẹrhomo ọnọ ji kpahenrhọ ye? Ẹkpahenrhọ na o sekpahen ekete wu nurhe, ophianroma wu vwori, yanghene ẹrhẹ wu havwọ-ọ. Baibol na ọ yẹrẹ ọwan imwẹro taghene: “Osolobrugwẹ o vwo ni ohworho ruẹ-ẹ, ọrẹn, kohworho kohworho rọ zofẹn yen jeghwai ru oborẹ ọgbare uvuẹn egbamwa na ephian ye ọye o rhiabọ dede.” (Acts 10:34, 35) Ẹmro enana i dje aruẹ ohworho wu havwọ? Wu rhe vwo ofẹnzẹ Osolobrugwẹ, wu na họghọ riẹn ji kẹnoma rẹn oborẹ ọnọ lẹrhuọ ruẹ ọdandan hasuiẹ. Ne wu ki sabu rhiẹ ọvwata, wu na vi damoma rhe ruẹ oborẹ oserhọ uvuẹn ikẹro Osolobrugwẹ, ukperẹ ono rhiẹ oborẹ owẹwẹ yanghene awọrọ i guọlọre. Wu ghini guọlọ nẹ Osolobrugwẹ ọ kerhọ ẹrhomo ọnọ? Baibol na o dje oborẹ wu na nẹrhomo lele nẹ Osolobrugwẹ ọ kpahenrhọ ye. *

Itiọrurhomẹmro, ihworho buebun i guọlọre taghene Osolobrugwẹ ọ kpahenrhọ ẹrhomo aye izede igbevwunu. Uvuẹn ọke i Baibol na dede, Osolobrugwẹ o vwo kiki ruẹ aruẹ igbevwunu enana-a. Ọkezẹko ẹgbukpe buebun a vrẹn vwẹre a ki mẹrẹn iyẹnrẹn igbevwunu. Omarana, Baibol na no djephia taghene irueruo igbevwunu o vwoba ọke inyikọ na. (1 Corinthians 13:8-10) Ọnana no mevirhọ taghene Osolobrugwẹ ọ vwọ kpahanrhọ ẹrhomo inyenana-a? Ẹjo! Roro kpahen ẹrhomo ezẹko rẹ Osolobrugwẹ ọ kpahenrhọ.

Osolobrugwẹ o tiobọnu ẹghwanren. Jehova yẹ Esiri obọdẹn ẹghwanren ephian. O tiobọnie ghwologhwolo rẹn ihworho ra guọlọ ọkpọvi ọnẹyen jeghwai haye ruiruo.—James 1:5.

Osolobrugwẹ o tiobọnẹ ẹhẹn ọfuanfon ọnẹyen ọrhẹ ekwakwa irhorhomu re lelie sa. Ẹhẹn ọfuanfon na yẹ omẹgbanhon rẹ Osolobrugwẹ ọ ha wian. O vwo omẹgbanhon ọrọrọ rọ gbanhon ghwẹ ye-e. Ọnọ sabu ha userhumu rẹn ọwan din ebẹnbẹn. Ọnọ sabu lẹrhẹ ọwan vwo ufuoma uvuẹn ọke egbogbanhon. Ọnọ ji sabu lẹrhẹ ọwan vwo emamọ iruemru eghoghanren erọrọ. (Galatians 5:22, 23) Jesu ọ yẹ idibo yi imwẹro taghene Osolobrugwẹ o tiobọnẹ ẹhẹn ọfuanfon na ghwologhwolo.—Luke 11:13.

Osolobrugwẹ o tiobọnẹ irherhe rẹn ihworho ra guọliẹ. (Acts 17:26, 27) Uvuẹn akpọ na ephian, o vwo ihworho buebun ri ghini guọlọ rhe urhomẹmro na. Aye i guọlọ rhe kpahen Osolobrugwẹ, odẹ ye, ọhọriẹ kpahen otọrakpọ na ọrhẹ ituakpọ, kugbe oborẹ aye ine ru sabu tikẹriẹ. (James 4:8) Iseri Jehova a vwa aruẹ ihworho enana, oma ọ ji merhan aye rẹ aye ine dje ẹkpahenrhọ na rẹn aye nẹ uvuẹn i Baibol na.

Ọrana yẹ ọsoriẹ wa ha imagazini ọnana? Wa guọlọ Osolobrugwẹ? Ọkezẹko nyoma izede ọnana yẹ Osolobrugwẹ ọ kpahenrhọ ẹrhomo ọnọ.