Pikakasi

7 Kasin Dedengelen tan Eebatan na Dios Iray Pikakasi?

DAKEL so naiinteresan ed satan a tepet. Ipapanengneng na Biblia ya anggad natan et talagan dedengelen nen Jehova iray pikakasi. Balet ta akadepende met ed sikatayo no kasin dengelen na Dios iray pikakasi tayo odino andi.

Imbaga nen Jesus a say pampipikasi na saramay lider na relihyon ed panaon to et pansimpisimpitan labat. Labay dan isipen na totoo ya masanto ira. Imbaga nen Jesus a saratan a lalaki et “inawat da lan amin so tumang da.” Say “tumang” da labat et say atension na totoo, ta satan met so labalabay da. Balet ta ag-ira dengelen na Dios. (Mateo 6:5) Ontan met natan, dakel iray manpipikasi base ed panlabayan da, aliwan unong ed linawa na Dios. Lapud ibabaliwala da iray prinsipyo na Biblia a naamtaan tayo’d inmuunan artikulo, agdengelen na Dios iray pikakasi da.

Sika balet ey? Kasin dengelen tan ebatan na Dios iray pikakasim? Say ebat ed satan et ag-akadepende ed no antoy bansam, no kasin mayaman o mairap ka, odino no kasin de-aral ka o andi. Oniay ipapaseguro na Biblia: “Say Dios et agmanangidumaduma, noagta diad balang nasyon et makapaliket ed sikato so toon ontatakot ed sikato tan manggagawa na inkatunong.” (Gawa 10:34, 35) Kasin ontan ka a too? Walay takot mo ed Dios no talagan baleg so respetom ed sikato tan agmo labay a napaermen. Manggagawa ka na inkatunong no pansasagpotan mon gawaen no antoy ibabaga na Dios a duga imbes ya unoren moy dilin labay mo odino say labay na kaparam ya too. Talaga ta’n labay mon dengelen na Dios iray pikakasim? Ipapanengneng na Biblia no panoy nepeg mon pampikasi pian dengelen ka na Dios. *

Dakel so malabay ya ebatan na Dios so pikakasi ra panamegley na milagro. Balet diad tua, anggan nensaman et mataltalag labat a nanmilagroy Dios. Wala ni ingen iray pankanawnawan kayari na sakey a milagron nirekord ed Biblia et pigaran siglo ni linmabas antis a wala lamet so nirekord a milagro. Sakey ni, ipapanengneng na Biblia ya angangga la iray milagro kayari impatey na saray apostol. (1 Corinto 13:8-10) Labay kasin ibaga na saya ya ag-eebatan na Dios iray pikakasi diad panaon tayo? Andi! Nia ray pigaran pikakasi ya eebatan na Dios.

Iiter na Dios so karunongan. Si Jehova so Lapuan na amin a tuan karunongan. Maliket ton iiter itan, ya agto isisiblet ed saramay onkekerew na direksion to tan mansasagpot a manguunor ed satan.​—Santiago 1:5.

Iiter na Dios so masanton espiritu to tan amin a gunggona na satan. Say masanton espiritu so aktibon puersa na Dios. Anggapo lay mas mabiskeg nin puersa nen say saya. Ontulong itan pian nasarag tayo ray subok. Satan so makapangiter na deen na nonot sano naproproblema itayo. Tan ontulong met itan pian nawalaan itayoy mararakep a kualidad. (Galacia 5:22, 23) Pinaseguroan nen Jesus iray patumbok to ya maliket so Dios a mangiter ed sayan regalo.​—Lucas 11:13.

Iiter na Dios so kakabatan ed saramay maseet a manaanap ed sikato. (Gawa 17:26, 27) Diad interon mundo, walaray totoon maseet a manaanap na katuaan. Labay dan nakabat so Dios​—no antoy ngaran to, no antoy gagala to parad dalin tan ed totoo, tan no panon iran onapit ed sikato. (Santiago 4:8) Mabetbet a makakapitongtong iray Tasi nen Jehova ed ontan iran totoo tan labalabay dan ibangat so ebat na Biblia ed saratan a tepet.

Kasin satan so rason no akin ya inawat mo iyan magasin? Kasin aanapen moy Dios? Ompan aya la so ebat ed pikakasim.

[Paimano ed leksab]