ACHKA runakunam tapukunku “¿Dios uyarinchu mañakusqayta icha manachu?”, nispanku. Yachamusqanchikman hinaqa wakin runakunapa mañakusqankutam Diosqa uyarin, wakinpatañataqmi mana. Chaynaqa, ¿qampa mañakusqaykita Dios uyarinmanchu? Mañakusqaykita Dios uyarinanpaqqa kikikimantam kanqa.

Jesuspa tiempopi religionpi punta apaqkunaqa iskay uyam karqaku. Mañakuspankupas runakuna qawanallankupaqmi mañakuqku. Chaytaqa Jesusqa manam allinpaqchu hapirqa, chaymi Jesusqa nirqa: “Paykunaqa lliw premionkutam chaskirunkuña”, nispa. Arí, chay religioso runakunaqa manam Dios uyariykunankuta munaspankuchu mañakuqku aswanqa runakuna qawanallankupaqmi (Mateo 6:5). Chaynam kay tiempopi runakunapas mañakuspankuqa mana Diosta hatunchanankupaqchu mañakunku. Astawanqa imatapas chaskiyta munaspallankum hinaspa kikillankupi piensaspankum. Chaymantapas Diospa munasqanman hina mana mañakusqankuraykum Diosqa mana paykunataqa uyarinchu.

¿Qampa mañakusqaykitaqa Diosqa uyarinmanchu? Jehova Diosqa mañakusqanchiktaqa uyariwanchikmanmi ima castamantaña, ima nacionmantaña, apuña utaq wakchaña kaptinchikpas. Bibliapim nin “Diosqa mana pimanpas sayapakuq kasqanta” aswanmi payqa chaskin “lliw nacionkunapi respetaqnin hinaspa allin ruwaq runataqa” (Hechos 10:34, 35). Diosta respetaq runaqa manam ima mana allintaqa ruwanchu Diosta piñachinanpaqqa. Hinaspa “allin ruwaq” kasqanraykum mana kikinpa munasqanman hinachu kawsakun. Aswanmi kallpanchakun Diospa munasqanman hina kawsakunapaq. Chaynaqa mañakusqanchikta Jehova Dios uyariykuwananchikta munaspaqa mañakunanchik sunqumantam hinaspa Diospa munasqanman hinam. *

Achka runakunam mañakusqankuta Dios milagrota ruwaspa contestamunanta munanku. Bibliapim ichaqa willakun ñawpaq tiempopipas wakillanpi Diosqa mañakusqankuta milagrokunawan contestamusqanta. Bibliaqa willawanchiktaqmi apostolkunapa wañukusqanku qipamanqa milagrokuna manaña kananmanta (1 Corintios 13:8-10). Milagrokunata manaña rikuspanchikqa manam nichwanchu “Jehova Diosqa manañachiki mañakusqanchikta contestamunñachu”, nispanchikqa. Qatiqninpim yachaykusunchik imaynata kay tiemponchikpi Jehova Dios mañakusqanchikta contestamusqanmanta.

Yachaytam quwanchik. Jehova Diosllam tukuy ima yachayniyuqqa. Chaymi paypa munasqanman hina kawsakuy munaqkunata hinaspa paypa nisqanta kasukuy munaqkunata yanapan yachayniyuq kanankupaq (Santiago 1:5).

Chuya espiritunwanmi yanapawanchik. Diospa chuya espiritunqa atiyninmi. Chay atiyninwanmi yanapawanchik sasachakuykunata atipanapaq hinaspa mana hukmanyarunapaq. Yanapawanchiktaqmi kuyakuq, llampu sunqu, llakipayakuq kananchikpaq (Galatas 5:22, 23). Jesusmi nirqa Diosta chuya espiritunta mañakuptinchikqa quykuwanachikmanta (Lucas 11:13).

Paymanta yachay munaqkunatam yanapan. Hechos 17:26, 27 nisqanman hinam achkallay-achka runakuna enterollan allpa pachapi Diosmanta yachayta munanku. Yachaytam munanku sutinmanta, imakuna pay ruwananmanta, hinaspa imaynata payman asuykunamanta (Santiago 4:8). Jehova Diospa testigonkunapas achka kutitam Diosmanta yachay munaq runakunata tarinku hinaspam bibliawan tapukuyninkumanta yachaykachinku.

Icha qampas Diosmanta yachayta munaspayki kay qillqata chaskikurqanki. Chayna kaptinqa ichapas Jehova Dios kay qillqawan mañakusqaykita contestamuchkan.