ASHTACA gentecunami Taita Dios ñucanchi oraciongunata uyajta o na uyajta yachangapaj munan. Taita Diosca oraciongunata uyashpapash na tucui oraciongunata uyanllu. Shinaca Taita Dios ñucanchi oraciongunata uyachunga ¿imatata rurana capanchi?

Jesuspa tiempopica religionda ñaupaman pushajcunaca gentecunapi ali ricuringapallami Taita Diostaca mañan carca. Chaita ricushpami Jesusca chaica nalipacha cashcata paicunataca nirca. Chaimandami Jesusca paicunaca ñami caipillata alicachi tucushca can nircami. Paicunaca Taita Dios uyachun munashpaca na shina mañanajurcachu. Gentecunapa ñaupapi ali ricuringapallami shina mañanajurca. Chaimandami Taita Diosca paicunapa mañashcacunataca na uyarca (Mateo 6:5). Cunan punllapi ashtaca gentecunapash Taita Diosta mañashpapash paicunapilla pensarishpami mañan. Chaishuj temacunapica Taita Dios munashcashna mañana cashcatami yachajurcanchi. Shinaca Taita Dios munashcashna na mañashcamandami Taita Diosca paicunapa oraciongunataca na contestan.

Cutin ñucanchi oraciongunataca ¿uyashpa contestangacha? Taita Diosca ñucanchi oraciongunata contestangapaca ñucanchicuna maijan llactamanda cashcata o charij o na charij cashcataimanga na ricujunllu. Bibliapica “Taita Diosca na pitapash ñavita ricushpalla chasquinllu” ninmi. Ashtahuanpash “maijan llactapi cashpapash paita manllashpa, imatapash cashcatapacha rurajtami Diosca alicachin” ninmi (Hechos 10:34, 35). Cai textopi nishcashcaca Diosta manllashpa causaj gentecunaca Dios nalicachishca cosascunataca nimamanda na rurangapaj munanllu. Shinallata alita ruraj gentecunaca Taita Diospa munaita siempre rurangapajmi esforzarin. Shinaca Taita Dios ñucanchi oraciongunata uyachunga Diospa Shimi Biblia ima nishcatami siempre cazuna capanchi. *

Ashtaca gentecunami Taita Diosca paicunapa oraciongunata uyashpa shuj milagrota rurashpa contestachun munan. Pero punda tiempocunapipash Taita Diosca huaquinbillami milagrocunata rurashpa contestan carca. Shinallata Taita Dios shuj milagrota rurashca tiempomanda cutin shuj milagrota rurangacamanga ashtaca tiempomi yalin carca. Bibliapica apostolcuna huañushca jipaca milagrocuna ñana tiashpa catina cashtami ricuchin (1 Corintios 13:8-10). Shina cashpapash Taita Diosca ñucanchi oraciongunata uyashpaca contestanmi. Cunan punllacunapi Jehová Dios ñucanchi oraciongunata imashina contestajta ricupashun.

Taita Diosca ali yachaitami caran. Taita Diosca ali yachaita charij Dios caimandami ñucanchicuna paipa ayudata mascajpi pai munashcashna causangapaj esforzarijpica ali yachaitaca na mitsashpami caran (Santiago 1:5).

Taita Diosca paipa espíritu santota cushpami ayudan. Espíritu santoca Taita Diospa fuerza o podermi can. Taita Diospa espíritu santo ayudajpimi llaquicunata charishpapash ñaupaman catita ushapanchi. Shinallata imamandapash preocupado cajpica tranquilo sintirichunmi ayudan. Y cai espíritu santo ayudajpimi ñucanchicunaca ali cualidadcunata ricuchi ushapanchi (Gálatas 5:22, 23). Jesusca ñucanchicuna minishtijuj horaspi Taita Dios paipa espíritu santotaca carangallami nircami (Lucas 11:13).

Taita Diosca paita rijsingapaj munaj gentecunataca paimanda yachajuchunmi ayudan. Hechos 17:26, 27​pi nishcashnaca ashtaca gentecunami Taita Diosmanda yachajungapaj munaita charin. Paicunaca Taita Diospa shuti maijan cajta, jipa punallacunapi cai alpahuan, gentecunahuanbash ima pasanata, Taita Diosman quimiringapaj imata rurana cashcatami yachangapaj munan (Santiago 4:8). Testigo de Jehovacunaca casi siempremi Taita Diosmanda yachajungapaj munaita charij gentecunahuan tuparinchi. Shina gentecunahuan tuparishpaca cushijushpami Bibliamandaca yachachinchi.

¿Taita Diosta rijsingapa munaimandachu cai revistataca chashquiparcangui? Taita Diosca cai revistapi ayudacunahuanmi tal vez quiquinba oraciondaca contentajunga.