КАДЭВА вопросо фартэ интересно. Андэ Библия ԥэнэнпэ, кай о Иегова ашунэл и молитвы и андэ амарэ деса. Но ашунэла о Дэл амарэ молитвы чи най, зависит амэндар.

Кала о Иисусо сас пэ ԥув, во сындояс лэ барэ манушэн андэ веры важ лэндирэ молитвы. Васо? Важ кода кай лэндирэ молитвы сас най анда оди. Вонэ мангэнаспэ, кай лэ манушэнди тэ дицол, кай вонэ патян андо Дэл. О Иисусо ԥэндя, кай кадэлэ манушэнди «ужэ динэ лэнго лашимос». Через кадэла алава о Иисусо дя тэ полэн, кай кадэлэ манушэндэ авэла кати кода, со вонэ камэн, када кай и мануша пэр лэндэ тэ шон сама. Но лэндэ на авэла кода, со лэнди трэбуй па чачимастэ, када кай о Дэл пэр лэндэ тэ шол сама (Матфея 6:5). Кадяжэ и адес бут мануша мангэнпэ кадя, сар екжэнэ камэн, ай най кадя, сар о Дэл камэл. О Дэл на ашунэл лэндирэ молитвы, важ кода кай вонэ на шон сама пэ принцыпоря, пала савэ сас пистромэ май англал.

Ай со можно тэ ԥэнас пала тутэ? Ашунэл о Дэл тирэ молитвы и атвечает пэр лэндэ чи най? Када нэ зависит кодэлэстар, сави тутэ нацыя или культура. Андэ Библия пистромэ: «О Дэл на диқэл, сави кай о мануш нацыя. Но андэ кажно народо исин кодэва, ко дарал лэстар и ритярэл лэско законо, ко кадя терэл чалёл лэсти» (Деяния 10:34, 35). Поджан кадэла алава каринг тутэ? Если ту стос патив по Дэл, андярэс лэстири время и на терэс кода, через со лэсти можэт тэ авэл ԥарэс по ди, тоди ту дарас лэ Дэвлэстар. Ту андярэс пэс праведно, если старыиспэ тэ терэс кода, со правильно андэ лэ Дэвлэстирэ яқа, ай най андэ тирэ яқа или инке варикастирэ. Камэс ту, кай о Дэл тэ ашунэл тирэ молитвы? И Библия можэт тути андэ када тэ поможый.

Канешно, бут мануша камэн, кай о Дэл тэ атвечает пэ лэндирэ молитвы через и чуда. Но о Дэл ридко терэлас чудеса дажэ андэ библейско время. Дэкала машкар ек чуда и авэр прожанас фартэ бут бэрша. Кадяжэ андэ Библия пистромэ, кай посли кода, сар мулинэ и апостолоря, чудеса будэр на сас (1 Коринфянам 13:8—10). Тоди сыкавэл када, кай адес о Дэл нэ атвечает пэ амарэ молитвы? Канешно, най! Подам дума пала молитвы, пэ савэ во атвечает.

О Дэл дэл мудрость. О Иегова када кодэва, кастар жал всавори чачуни мудрость. Во анда оди дэл ла кодэлэнди, ко родэл лэстири руководства и камэл тэ жувэл кадя, сар во ԥэнэн (Иакова 1:5).

О Дэл дэл о свынто духо и блаӷословении, савэ исин через лэстэ. О свынто духо, када лэ Дэвлэско зор, через саво во терэл вся. Блаӷодаря кадэлэ зорэсти амэ можэм тэ виритярас любо ԥаримос. О свынто духо можэт тэ дэл спокойство по ди, кала амэ пала варисо пэрэжываем. Ай кадяжэ во можэт тэ поможый амэнди тэ парудювас андэ лащи риг (Галатам 5:22, 23). О Иисусо дя алав пэстирэ учениконэнди, кай о Дэл дэла кадэва духо кодэлэнди, ко мангэл лэс (Луки 11:13).

О Дэл дэл тэ уӷанэн пала лэстэ кодэлэнди, ко родэл лэс. Па вся и люма исин мануша, савэ камэн тэ уӷанэн о чачимос пала Дэл (Деяния 17:26, 27). Вонэ камэн тэ ӷанэн, сар ақарэн лэ Дэвлэс, со во загиндосардя важ и мануша и важ и ԥув, и сар вонэ моӷут тэ авэн май пашэ каринг Лэстэ (Иакова 4:8). Лэ Иеговастирэ свидетеля часто диқэн кацавэ манушэн и анда оди росԥэнэн лэнди пала библейски атветоря пэ кадэла вопросоря.

Можэт, важ када ту и ритярэс кадэя публикацыя андэ вас? Ту родэс лэ Дэвлэс? Возможно, када и исин атвето пэ тири молитва.