Sambela

7 Nzapa ayeke mä nga lo kiri tënë na ni?

HUNDANGO tënë so agbu bê ti azo mingi na ala yeke gi ti hinga kiringo tënë ni. Bible afa so laso Jéhovah ayeke mä asambela. E la e yeke sara si Jéhovah alingbi ti mä asambela ti e wala lo mä ni pëpe.

Jésus asigigi na nda ti akota zo ti bungbi ti vorongo nzapa ti ngoi ti lo so ayeke sambela ti handa lê ti azo; ala yeke sara ye gi ti fa na lê ti azo so ala la ayeke mbilimbili. Lo tene so mara ti azo tongaso “awara futa ti ala kue awe”, so ti tene ye so ala ye mingi, so ayeke ti tene azo abâ ala, ala wara ni awe. Me ala wara pëpe ye so ala yeke na bezoin ni so ayeke ti tene Nzapa amä ala (Matthieu 6:5). Laso nga, azo mingi ayeke sambela ndali ti ye so bê ti ala wani aye me pëpe ndali ti ye so bê ti Nzapa aye. Ala sara sanka ti aye so Bible afa so e sara tënë na ndo ni fade, ye so asara si Nzapa amä ala pëpe.

Me ka ti mo, Nzapa ayeke mä asambela ti mo na lo yeke kiri tënë na ni? Kiringo tënë ni andu pëpe tënë ti kodoro ti mo, mara ti mo wala kamba ti kusala ti mo. Bible adë bê ti e atene: “Nzapa ayeke sara kangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.” (Kusala 10:34, 35). Mo nga kue mo pensé tongaso? Tongana mo kpe mbeto ti Nzapa, mo yeke bâ lo na nene ni mingi nga mo yeke kpe ti mû vundu na lo. Tongana mo ye mbilimbili, mo yeke gi ti sara ye so ayeke na lege ni na lê ti Nzapa ahon ti sara gi ye ti bê ti mo wala ti azo. Mo ye biani ti tene Nzapa amä asambela ti mo? Bible ayeke fa na mo tongana nyen ti sambela si Nzapa amä mo. *

Tâ tënë, azo mingi aye ti tene Nzapa akiri tënë na sambela ti ala na lege ti miracle. Ye oko, même na ngoi ti giriri Nzapa ayeke sara ka amiracle hio hio pëpe. Na ambeni ngoi tongana lo sara mbeni miracle, a yeke ninga angu ngbangbo mingi na pekoni si lo kiri lo sara mbeni. Na ndo ni, Bible afa so na peko ti kuâ ti abazengele amiracle ahunzi (1 aCorinthien 13:8-10). So aye ti tene so Nzapa ayeke kiri tënë na asambela laso pëpe? A yeke tongaso pëpe! Bâ ambeni sambela so Nzapa akiri tënë na ni.

Nzapa amû ndara na zo. Tâ ndara alondo gi na Jéhovah. Lo yeke mû ni senge senge na azo so ayeke gi fango lege ti lo na ayeke sara ye alingbi na ni.​—Jacques 1:5.

Nzapa ayeke mû na zo yingo vulu ti lo na aye ti nzoni kue so aga na pekoni. Yingo vulu ti Nzapa ayeke ngangu ti lo. Mbeni ngangu ti hon ni ayeke dä pëpe. A lingbi ti mû maboko na e ti kanga bê na gbele atara. A lingbi ti sara si e wara siriri na ngoi ti aye ti ngangu. Yingo ti Nzapa ayeke mû maboko na e ti duti na ambeni nzoni sarango ye nde (aGalate 5:22, 23). Jésus adë bê ti adisciple ti lo so Nzapa ayeke mû matabisi so na zo senge senge.​—Luc 11:13.

Nzapa ayeke mû hingango ye na azo so ayeke gi lo na bê ti ala kue. Na ndo ti sese kue, a yeke wara azo so ayeke gi na bê ti ala kue ti hinga tâ tënë (Kusala 17:26, 27). Ala ye ti hinga ye na ndo ti Nzapa: iri ti lo, ye so lo leke ti sara teti sese nga na azo, nga tongana nyen ala lingbi ti ga nduru na lo (Jacques 4:8). A-Témoin ti Jéhovah ayeke tingbi mingi na mara ti azo tongaso na ala yeke na ngia ti fa na azo ni akiringo tënë ti Bible na ahundango tënë so.

A yeke ndali ni la mo wara mbeti so? Mo yeke gi ti hinga Nzapa? Peut-être a yeke mbeni lege so Nzapa akiri tënë na sambela ti mo la.

[Kete tënë na gbe ni]