7 Pe e Faafofoga ma Tali Mai le Atua i Tatalo?

UA MATUĀ faatupu e le fesili ua lāgā i luga le naunau fiafia ma le fia iloa. Ua faaalia i le Tusi Paia e faafofoga mai Ieova i tatalo i aso nei. E faalagolago iā i tatou lona faafofogaina pe leai o a tatou tatalo.

Na taʻusalaina e Iesu taʻitaʻi lotu i ona aso, o ē na tatalo ma le faafiaamiotonu ina ia faafoliga atu e amiotonu i luma o tagata. Na fetalai o ia o le a maua e na tane lo “latou taui atoatoa,” o lona uiga e na o le mea na latou mananaʻo i ai, o le viiga lea mai i tagata, ae e lē o le mea sa tatau ona latou maua, o le faafofogaina lea e le Atua o a latou tatalo. (Mataio 6:5) E faapena foʻi aso nei, e tatalo le toʻatele e tusa ma o latou loto ae lē tusa ma le finagalo o le Atua. Talu ai e latou te lē amanaʻia taʻiala a le Tusi Paia na tatou talanoaina, ua lē faafofogaina ai e le Atua a latou tatalo.

Ae faapefea oe? Po o le a faafofoga ma tali mai le Atua i au tatalo? E lē faalagolago le tali i lou lanu, atunuu po o le tulaga. Ua taʻua i le Tusi Paia: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.” (Galuega 10:34, 35) Pe e faapena oe? Pe afai e te mataʻu i le Atua, e te matuā faamamaluina o ia ma e te lē fia faatigā i lona finagalo. Pe a e faia le amiotonu, e te saʻili e fai le mea ua fetalai le Atua e saʻo, ae lē o lou lava loto po o mea e mananaʻo i ai isi tagata. Pe e te manaʻo moni lava e faafofoga le Atua i au tatalo? Ua taʻua i le Tusi Paia le auala e tatalo ai, ona faafofogaina ai lea e le Atua. *

E mananaʻo le toʻatele o tagata ia faavavega ona tali mai le Atua i a latou tatalo. Ae i taimi o le Tusi Paia na seāseā ona faia e le Atua ni na vavega. O nisi taimi, sa faitau senituri na va aʻi le faia o le isi vavega ma se isi vavega. Ua taʻua foʻi i le Tusi Paia na muta i aso o le ʻauaposetolo le faia o vavega. (1 Korinito 13:8-10) Po o lona uiga la e lē tali mai le Atua i tatalo i aso nei? E leai! Seʻi manatu i nisi o tatalo e tali mai ai o ia.

E foaʻi mai e le Atua le atamai. O Ieova o le Puna sili o le atamai moni. E finagalo o ia e matuā foaʻi mai le atamai i ē e mananaʻo i lana taʻitaʻiga, ma fia ola e tusa ai.—Iakopo 1:5.

E foaʻi mai e le Atua lona agaga paia ma ona aogā uma. O le agaga paia o le mana galue o le Atua. E leai se isi malosi e sili atu i lo lenā. E fesoasoani iā i tatou e onosaia ai faigatā. E aumaia ai iā i tatou le filemu pe a feagai ma popolega. E fesoasoani foʻi iā i tatou e atiaʻe ai isi uiga matagofie ma tāua. (Kalatia 5:22, 23) Na faamautinoa atu e Iesu i ona soo e matuā foaʻi mai e le Atua lenei meaalofa.—Luka 11:13.

E foaʻi mai e le Atua le poto i ē e matuā saʻili iā te ia. (Galuega 17:26, 27) E iai tagata i le lalolagi aoao o loo matuā saʻili i le upu moni. O loo latou fia iloa le Atua—lona suafa, lona finagalo mo le lalolagi ma tagata, ma le auala e mafuta vavalalata atu ai iā te ia. (Iakopo 4:8) E masani ona feiloaʻi Molimau a Ieova ma tagata faapena, ma e fiafia e faailoa atu mai i le Tusi Paia tali o na fesili.

Po o le māfuaaga lenā ua e mauaina ai lenei mekasini? Po o e fia aʻoaʻo e uiga i le Atua? Atonu o le auala lenei ua Ia tali mai ai i lau tatalo.

[Faaopoopoga i lalo]