MUŨTCHI i duü̃ü̃gü nagu irüĩnüẽ i ngematchiga. Rü Tupanaarü Ore nüü̃ nawe na Tupana aicuma tüü̃ naĩnü i nhuꞌma. Tchi yiema meü̃ iügügu nüma ya Tupana tüü̃ naĩnü, notürü tchi yiema tchieü̃ iügügu tama Tupana tüü̃ naĩnü.

Ngetchutchu nüü̃ nawe na ngúeẽẽruü̃gü i ore i mugüwa nguꞌẽẽtaegüü̃ rü paritchéugü yeguma nayumüẽgügu togü i duü̃ü̃güpeꞌewa meã imaẽnetaü̃. Nümagü rü nanawaꞌemare na togüpeꞌewa meã maẽnetaü̃rüü̃ niĩgü. Rü Ngetchutchu nüü̃ niu “rü ngẽma na duü̃ü̃gü nüü̃ daugüü̃ĩcatama niĩ i norü ãmare”. Rü yema nhaü̃tchiga niĩ na yema ga duü̃ü̃gü togücaꞌ name notürü Tupanacaꞌ tama name. (Mateu 6:5) Nhuma rü ta yema nangupetü. Muẽma ya duẽẽgü ngẽguma nayumüẽgügu norü ngútchaü̃gu narüĩnüẽmare, rü tama Tupanaarü ngútchaü̃gu narüĩnüẽ. Nagagu na tama Tupanaga naĩnü, Tupana tama ngema duü̃ü̃güü̃ naĩnü i norü yumüẽgü.

Rüena Tupana aicuma cuü̃ naĩnü i curü yumüẽgü? Nüma ya Tupana tama cuü̃ naĩnü nagagu ngetácü̃ãꞌ cuiĩ rü bai muãrü dĩẽruã́cü. Rü Tupanaarü ore nhanagürü: “Na Tupanacaꞌ nawüiguü̃ i guü̃ma i duü̃ü̃gü erü nüma rü aicuma guãü̃ma nangetchaü̃. Rü nüma rü wüitchigü i natchiü̃ãnewa nanade i ngẽma duü̃ü̃gü i nüü̃ ngetchaü̃güü̃ rü meü̃ ügüü̃.” (Puracügü 10:34, 35) Rüeꞌna ngema ore cucaꞌ name? Rü yíema Tupanaü̃ ngetchaü̃güü̃ rü meü̃ ügüü̃, guü̃guma nanawaꞌe Tupanaü̃ nataãẽẽẽ. Rü ta yíema weguꞌcümaü̃ rü Tupanaarü ngútchaü̃ nanaütchaü̃, tama to i duü̃ü̃güarü ngútchaü̃ naütchaü̃ rü bai norütama. Rüeꞌna cuma aicuma nanawaꞌe na Tupana cuü̃ naĩnü? Tupanaarü ore cuü̃ narüngü̃ẽẽ tá i ngematchiga. *

Muü̃tchi i duü̃ü̃gü nanawaꞌe na Tupana nangãü̃ norü yumüẽgü namaã meü̃ i Tupanaicatama üü̃. Notürü, nũcüma ga Tupana tama guü̃guma nanaü ga yema. Yeguma ga yema meü̃ i Tupanaicatama üü̃ nangupetügu rü nanũcü na togü nangemaü̃caꞌ. Rü ta, Tupanaarü ore nüü̃ niu na yema meü̃ i Tupanaicatama üü̃ inajarüo yeguma Ngetchutchuarü ngúeü̃gü nayuegu. (1 Corĩ́tiucü̃ãꞌ 13:8-10) Nhumatchi, rüeꞌna ngema nhaü̃tchiga niĩ na Tupana tama nangãü̃ i torü yumüẽgü i nhuma? Tama niĩ i ngema! Ngĩã nüü̃ tadau na nhuãcü Tupana nangãü̃ i torü yumüẽgü.

Tupana tüna naã i Norü cuaꞌ. Tupana rü nüĩcatama niĩ i Tupana yiĩü̃, rü nüĩcatama niĩ i guü̃ü̃ nacuáü̃. Yeuwa niĩ na ngútchaü̃maã tüna naã norü cuaꞌ na teécaꞌ nüna nacaꞌ taca i cuaꞌ rü ta Tupanaga taĩnüẽ. — Tiagu 1:5.

Tupana tüna naã i Norü naãẽ i üüneü̃. Rü naãẽ i üüneü̃ Tupanaarü pora niĩ. Natauma i to na yeera pora niĩ. Rü Tupanaãẽ i üüneü̃ tüü̃ rüngü̃ẽẽ ngẽguma gutchaü̃gü nangupetügu. Rü ta tüü̃ narüngümüẽẽ ngẽguma taoegaãẽgu. Rü ta tüü̃ rüngü̃ẽẽ na yeeraãcü narüme i torü namecümagü. (Gárataanecü̃ãꞌ 5:22, 23) Rü guãma ya yíema Tupanaü̃tawa naãẽ i üüneü̃caꞌ ícae, rü tá tüna nanaã — nhanagürü ga Ngetchutchu. — Luca 11:13.

Tupana tüü̃ nananguéẽẽ na yíema aicuma Nacaꞌ tadaugüü̃caꞌ. (Puracügü 17:26, 27) Naanearütawa, nangema muema ya duẽẽgü na aicuma Tupanacaꞌ tadaugü. Ngema duẽẽgü nüü̃ tacuaꞌgüü̃ i Tupanatchiga — Norü naéga, rü Norü ngútchaü̃ Naanecaꞌ rü ta guãma i duẽẽgücaꞌ, rü nhuãcü Tupanana tangaicamagü. (Tiagu 4:8) Mueꞌpüꞌcüna, Yeuwaarü Orearü Uruü̃gü nüü̃ inayangauü̃ ngema duü̃ü̃gü i pregaçãowa rü tataãẽgü na nüü̃ tanguéẽẽ i Tupanaarü oretchiga.

Rüeꞌna aicuma Tupanaü̃ cucuaꞌtchaü̃? Eꞌna ngemagagu nhaa popera cunayau? Bemana ngema cucaꞌ niĩ Tupanaarü ngãü̃ na curü yumüẽcaꞌ.