Orasaun

7 Maromak rona no hatán ka lae?

EMA barak hakarak tebes atu hetan resposta ba pergunta neʼe. Bíblia hatudu katak Maromak Jeová rona duni ema nia orasaun. Maibé, Maromak Jeová rona ita-nia orasaun ka lae, neʼe depende mós ba ita ida-idak nia hahalok.

Iha Jesus nia tempu, nia kritika ulun-naʼin relijiaun sira neʼebé halo orasaun ho laran-makerek. Sira buka oin hodi halo orasaun iha fatin neʼebé ema bele haree sira. Jesus hatete katak sira “simu ona sira-nia kolen”. Neʼe katak sira simu ona buat neʼebé sira hakarak, neʼe mak atu ema haree no gaba sira. Maibé sira la simu buat neʼebé sira husu husi Maromak, tanba Maromak la simu orasaun hanesan neʼe. (Mateus 6:5) Ohin loron mós, ema barak halo orasaun tuir sira rasik nia hakarak, laʼós hodi tuir Maromak nia hakarak. Tanba sira la halo tuir Bíblia nia matadalan neʼebé ita foin lee, Maromak la see tilun ba sira-nia orasaun.

Maibé, oinsá ho Ita? Maromak rona no hatán ba Ita-nia orasaun ka lae? Maromak rona ba ema nia orasaun la depende ba ema husi nasaun saida, ka sira-nia situasaun moris nian. Bíblia fó fiar mai ita hodi hatete: “Maromak la fihir ema. Maibé, iha nasaun hotu, Maromak simu hotu ema sira neʼebé taʼuk Nia no halo hahalok neʼebé loos.” (Apostolu 10:34, 35) Ita mós ema hanesan neʼe ka lae? Se Ita taʼuk ba Maromak, neʼe katak Ita respeitu tebes nia no lakohi halo nia laran-triste. Se Ita halo hahalok neʼebé loos, neʼe katak Ita hakaʼas an atu halo buat neʼebé loos tuir Maromak nia haree duké halo tuir Ita rasik nia hakarak ka ema seluk nian. Ita loloos hakarak Maromak atu rona Ita-nia orasaun ka lae? Bíblia hatudu saida deʼit mak Ita tenke halo atu Maromak rona Ita-nia orasaun. *

Baibain ema barak hakarak Maromak hatán sira-nia orasaun hodi halo milagre ruma. Maibé, tuir loloos iha Bíblia nia tempu mós Maromak la halo milagre barak. Kuandu Maromak halo tiha milagre ida, dala ruma nia la halo kedas milagre seluk tan, maibé liu tiha tinan atus ba atus mak nia halo fali milagre seluk. Liután neʼe, Bíblia hatudu katak tempu neʼebé milagre sira akontese beibeik sei ramata depois Jesus nia apóstolu sira mate. (1 Korinto 13:8-10) Entaun, neʼe katak ohin loron Maromak la rona ema nia orasaun? Lae, nia rona! Hanoin toʼok orasaun hanesan saida deʼit mak Maromak hatán.

Husu atu Maromak haraik matenek. Maromak Jeová mak hun ba matenek neʼebé loos. Nia laran-luak no prontu atu fahe ninia matenek ba sira neʼebé hakarak buka no moris tuir ninia matadalan sira.—Tiago 1:5.

Husu Maromak nia espíritu santu. Espíritu santu mak Maromak nia forsa. La iha buat ida neʼebé makaʼas liu Maromak nia forsa. Espíritu santu bele ajuda ita atu tahan hasoru susar sira; ajuda ita atu sente dame maski iha susar laran; no ajuda ita atu haburas hahalok furak sira. (Galasia 5:22, 23) Jesus fó fiar ba ninia dixípulu sira katak Maromak ho laran-luak haraik ninia espíritu ba sira.—Lucas 11:13.

Husu atu hatene didiʼak Maromak. (Apostolu 17:26, 27) Iha mundu tomak, ema barak buka namanas atu hatene lia-loos. Sira hakarak tebes atu hetan resposta ba pergunta sira kona-ba Maromak, hanesan: Nia naran saida? Saida mak ninia hakarak ba ema no mundu neʼe? No oinsá mak ema bele hakbesik ba Maromak? (Tiago 4:8) Dala barak Testemuña ba Jeová hasoru ema hanesan neʼe no Testemuña sira kontente atu hatudu resposta husi Bíblia kona-ba pergunta sira-neʼe.

Ita mós buka atu hatene liután kona-ba Maromak ka lae? Karik hodi hetan livru neʼebé Ita lee daudauk, neʼe mak dalan ida Maromak hatán Ita-nia orasaun.

[Nota–rodapé]