FAGNONTENEAGNE mahaliagne ndaty maro io, sady azo fantaregne soa ty vale’e. Mirehake ty Baiboly fa tena mijanjigne vavake ty Jehovah amy izao. Faie miankigne amy ty ataontikagne ty hijanjigna’e antikagne ndra tsy hijanjigna’e antikagne.

Nanao soamiatreke ty mpitarike fivavahagne tamy ty andro i Jesosy naho fa nivavake, le nimelohe i Jesosy. Te hisehoseho avao iareo tie tea mivavake. Nirehake areke ty Jesosy “fa azo’e ty valesoa’e iaby”, ty dika izay ze raha nirie’e mafe, le ty ho voamare o ndaty. Tsy nahazo ze raha tena nipalia’e reke, le tihoe ho janjignen’Andrianagnahare. (Matio 6:5) Hoe izay ka ty amy izao. Manao ze tea’e ty ndaty maro naho fa mivavake, fa tsy mivavake mifagnarake amy ty zoton’arofon’Andrianagnahare. Tsy janjignen’Andrianagnahare iareo satria tsy miraharaha i toro lala ty Baiboly nidinehentikagne teo rey.

Akore ty ama’o? Hijanjigne naho hamale ty vavake atao’o vao ty Andrianagnahare? Tsy miankigne amy ty foko’o ndra ty firenena’o ndra ty fari-piaigna’o zay. Mirehake ty Baiboly tie: “Tsy magnavakavake ty Andrianagnahare, fa amy ty firenena iaby, ze ndaty matahotse aze sady manao ty maregne ro ankasitraha’e.” (Asan’ny Apostoly 10:34, 35) Matahotse aze naho manao ty maregne vao rehe? Tihoe matahotse an’Andrianagnahare le midika fa, tena magnaja aze, sady matahotse aze kera tsy hampifale aze. Tihoe manao ty maregne ka, le midika fa mikezake manao ze saontsien’Andrianagnahare tie soa fa tsy manao ze tea’e avao ndra ze tea o ndaty avao. Naho tea’o ho janjignen’Andrianagnahare areke ty vavake atao’o, le oriho ze ampanoe ty Baiboly azo. *

Ndaty maro ty magniry tie, hanao fahagagagne ty Andrianagnahare mba hamaleagne ty vavake atao’e. Faie ndra tamy ty andro taloha aza, le kindraike avao ty Andrianagnahare ro nanao fahagagagne. Mifagnelagnelagne taonjato maro ka rey kindraike. Rehafegne amy Baiboly ao ka fa tapetse ty fanoagne fahagagagne naho fa nimate i apostoly rey. (1 Korintianina 13:8-10) Midika vao zay fa tsy mamale vavake ty Andrianagnahare ty amy izao? Aha’a, tsy izay! Handineke valem-bavake tsy ampeampe nimein’Andrianagnahare tikagne:

Magnomey fahendreagne reke. I Jehovah ty Foto ty tena fahendreagne. Matarike reke, le magnomey fahendreagne ze te hahazo ty tari-dala’e naho ze te hiaigne mifagnarake amy izay.—Jakoba 1:5.

Magnomey fagnahy masigne reke. Hery ampiasaen’Andrianagnahare ty fagnahy masigne. Tsy misy hery matanjake mihoatse io. Afake magnampe antikagne hiaretse fitsapagne io, sady magnamaivagne antikagne naho fa managne olagne tikagne. Magnampe antikagne hanagne toetse soa naho mahafinaritse ka io. (Galatianina 5:22, 23) Nagnomey toky ty Jesosy fa homean’Andrianagnahare fagnahy masigne ze mpanonjohy ty lia’e.—Lioka 11:13.

Magnomey fahalalagne ze mazoto mipay aze reke. (Asan’ny Apostoly 17:26, 27) Magneran-tane, le misy ndaty tena mipay ty hamarenagne. Te hahafantatse an’Andrianagnahare iareo. Te hahafantatse ty tahina’e, ty raha safirie’e amy ty tane toy naho o ndatio, vaho ty fomba hagnarineagne aze. (Jakoba 4:8) Mateteke mifankatrea amy ty ndaty hoe izay o Vavolombelo i Jehovah-o, sady tena fale manoro iareo ty heve ty Baiboly miomba izay.

Te hahafantatse an’Andrianagnahare ka vao rehe, le izay ty mahavy azo handrambe ty gazete toy? Va’e tamy ty alala ty gazete toy varagne ty namalean’Andrianagnahare ty vavake natao’o.