ITINEKWAGH ne ka mpin u a doo ior kpishi shi ve keren mlumun sha mi yô. Bibilo tese ér Yehova ongo mbamsen nyian kpaa. Nahan kpa, ka gbenda u se er msen la una ungwa shin una ungwa ga ye.

Yesu yange puu mbatesen kwaghaôndo mba sha shighe na, mba ve eren msen sha atseregh la; kwagh u yange gba ve ishima cii yô, lu u tesen perapera ve ér ior ve nenge. Yesu kaa ér ambaaior la nahan “ngohol injar ve bee,” kwagh kera shi sha ci ve ga; inja na yô, vea zua a kwagh u ve hembe soon la tseegh. (Mateu 6:5) Nyian kpa, ior kpishi mba eren msen sha akaa a sha ishima i Aôndo ga, ka ve eren msen sha akaa a sha ishima ve. Er ve eren sha akaawan a Bibilo a se lam sha mi ne ga yô, Aôndo keghen ato u ungwan mbamsen vev ga.

We di ye? Aôndo una ungwa mbamsen ou shi una er kwagh sha mi kpa? Saa u lu orbuter shin or-ill ve Aôndo una ungwa msen wou ga, shi Aôndo una ungwa msen wou sha ci u ijiir i u due her shin ian i u lu sha mi la ga. Bibilo ôr a vese wang ér: “Aôndo sangen a sange ga, kpa ken hanma ikyurior cii, or u nan cie un shi nan eren kwagh u vough yô, una lumun nan.” (Aerenakaa 10:34, 35) U ngu imba or laa? Aluer u ngu or u cian Aôndo yô, u naan un icivir i hemban cii, shi u cian u eren kwagh u vihin un. Aluer u ngu eren perapera yô, u eren ishima you shin i ior ga, kpa u keren u eren kwagh u Aôndo a kaa ér ka u vough la. Mimi je, u soo wer Aôndo a ungwan mbamsen ou wee? Bibilo ngi tesen we er u er msen ve Aôndo una ungwa yô. *

Ior kpishi ka ve soo ér vea er msen yô, Aôndo a er ivande u tesen ér a ungwa. Nahan kpa, sha ayange a i ngeren Bibilo la je kpa, lu hanma shighe Aôndo eren ivande u tesen ér un ungwa msen ga. Yange una er nahan kpa, i tsa anyom uderi imôngo cii ve shi a va ungwa msen sha imba gbenda la ye. Heela tseegh ga, Bibilo tese ér shighe u eren uivande la kure sha ayange a mbaapostoli la. (1 Mbakorinte 13:8-10) Nahan, kwagh ne tese ér Aôndo kera ungwan mbamsen asev nyian ga shinii? Ei, ka nahan ga cii! Nenge ase igbenda i Aôndo a ungwan mbamsen ne.

Aôndo ne se kwaghfan. Ka hen Yehova jighilii se zuan a kwaghfan u mimi la ye. Ka a na un wuee, shi ne mba ve keren kwaghwan na shi ve soo u dondon un ken uma ve la.—Yakobu 1:5.

Aôndo ka a na se icighan jijingi na sha igbenda i jijingi shon a wasen se la cii. Icighan jijingi ka tahav mbu Aôndo a eren tom a mi yô. Tahav mbu gen môm hemba icighan jijingi ga. Icighan jijingi una na se mmem shighe u ishima i lu zan se iyol sha ma kwagh yô. Shi una wase se u lun a aeren a dedoo, a aa na ior vea soo kwagh wase yô. (Mbagalatia 5:22, 23) Yesu yange ôr a mbadondon un ér Aôndo ne iyua i icighan jijingi ne a iyoltangen shio.—Luka 11:13.

Aôndo ne mba ve keren un sha mimi la mfe u mimi. (Aerenakaa 17:26, 27) Ior mba sha ajiir kposo kposo sha tar, mba ve lu keren mfe u mimi la a ishima ve i môm yô. Ve soo u fan iti i Aôndo kua awashima na sha ci u uumace, man kwagh u a we ishima u eren a tar u se tem sha u ne kpaa, kua er vea er ve vea fatyô u kporom hen a na yô. (Yakobu 4:8) Mbashiada mba Yehova ka ve shi zuan a ambaaior la, shi ka i doo ve u pasen ve kwagh u Bibilo i tese sha akaa a ve soo u fan la kpaa.

Ka nahan ve u ngohol magazin ne yee? U soo u fan Aôndo? Adooga ka gbenda u una ungwa msen wou je ne.