‘OKU langa‘i ‘e he fehu‘i ‘i ‘olungá ‘a e mahu‘inga‘ia lahi ‘aupito mo e fie‘ilo. ‘Oku fakahaa‘i ‘e he Tohi Tapú ‘oku fanongo mai ‘a Sihova ki he lotú ‘i he ‘ahó ni. Ko ‘ene fanongo mai ki he‘etau ngaahi lotú pe ‘ikaí ‘oku makatu‘unga lahi ia ‘iate kitautolu.

Na‘e fakahalaia‘i ‘e Sīsū ‘a e kau taki lotu ‘i hono taimí ‘a ia na‘a nau lotu mālualoí; na‘a nau tokanga pē ki he‘enau hā mā‘oni‘oni atu ki he kakaí. Na‘á ne pehē ko e kakai peheé ‘e ‘kakato ‘a e totongi te nau ma‘ú,’ ‘a ia ko hono ‘uhingá te nau ma‘u pē ‘a e me‘a na‘a nau holi lahi taha ke ma‘ú, ‘a e tokanga ‘a e tangatá, kae ‘ikai ko e hōifua ‘a e ‘Otuá. (Mātiu 6:5) ‘Oku tatau pē mo e ‘ahó ni, ‘oku lotu ‘a e tokolahi ‘o fakatatau pē ki he me‘a ‘oku nau loto ki aí kae ‘ikai ko e me‘a ‘oku finangalo ki ai ‘a e ‘Otuá. ‘I hono tukunoa‘i ‘a e ngaahi tefito‘i mo‘oni Fakatohitapu na‘a tau ‘osi lāulea mai ki aí, ‘oku ‘ikai ai ke fanongo mai ‘a e ‘Otuá kiate kinautolu.

Kae fēfē koe? ‘E fanongo mai ‘a e ‘Otuá pea tali ho‘o ngaahi lotú? Ko e talí ‘oku ‘ikai makatu‘unga ia ‘i ho matakalí, fonuá pe ‘i ho lakangá. ‘Oku fakapapau‘i mai ‘e he Tohi Tapú: “‘Oku ‘ikai ke filifilimānako ‘a e ‘Otuá, ka ‘i he pule‘anga kotoa pē, ko e tangata ko ia ‘oku manavahē kiate ia mo fai ‘a e me‘a ‘oku totonú, ‘okú ne tali ia.” (Ngāue 10:34, 35) ‘Oku fakamatala‘i ‘e he ngaahi lea ko iá ‘a koe tonu? Kapau ‘okú ke manavahē ki he ‘Otuá ‘okú ke fakamahu‘inga‘i lahi ‘aupito ai ia, ‘o manavahē ke ta‘efakahōifua kiate ia. Kapau ‘okú ke ngāue ‘i he mā‘oni‘oní, ‘okú ke feinga ai ke fai ‘a e me‘a ‘oku tala mai ‘e he ‘Otuá ‘oku tonú kae ‘ikai ko e muimui pē ‘i he me‘a ‘okú ke loto ki aí pe me‘a ‘oku loto ki ai ho kaungā-fa‘ahinga ‘o e tangatá. ‘Okú ke fiema‘u mo‘oni ke fanongo mai ‘a e ‘Otuá ki ho‘o ngaahi lotú? ‘Oku fakahaa‘i ‘e he Tohi Tapú ‘a e founga ke ke a‘usia ai ení. *

Ko e mo‘oni, ko e tokolahi ‘oku nau loto ke tali ‘e he ‘Otuá ‘enau ngaahi lotú ‘aki ha mana. Ka na‘a mo e ‘i he taimi ‘o e Tohi Tapú, na‘e tātātaha ke fakahoko ‘e he ‘Otuá ha ngaahi mana pehē. ‘I he taimi ‘e ni‘ihi na‘e ‘osi atu ha laui senituli ia ‘e fiha mei ha mana pea toki fakahoko leva ha fo‘i mana ‘e taha. ‘Ikai ko ia pē, ‘oku fakahaa‘i ‘e he Tohi Tapú na‘e ngata ‘a e taimi ‘o e maná ‘i he taimi ‘o e kau ‘apositoló. (1 Kolinitō 13:​8-​10) Ko ia, ‘oku ‘uhinga ení, ‘oku ‘ikai ke tali ‘e he ‘Otuá ia ‘a e ngaahi lotu ‘i he ‘aho ní? Mole ke mama‘o! Vakai angé ki he ngaahi lotu ‘e ni‘ihi ‘okú ne talí.

‘Omai ‘e he ‘Otua ‘a e poto. Ko Sihova ‘a e Matavai pē taha ‘o e poto mo‘oni kotoa pē. ‘Okú ne nima-homo ‘o ne vahevahe tau‘atāina ia mo e fa‘ahinga ‘oku nau fiema‘u ‘ene tatakí pea feinga ke mo‘ui‘aki iá.​​—Sēmisi 1:5.

‘Oku ‘omai ‘e he ‘Otuá hono laumālie mā‘oni‘oní mo hono ngaahi ‘aongá kotoa. Ko e laumālie mā‘oni‘oní ‘a e ivi ngāue ‘o e ‘Otuá. ‘Oku ‘ikai ha toe ivi ‘e mālohi ange ai. ‘E lava ke ne tokoni‘i kitautolu ke kātekina ‘a e ngaahi ‘ahi‘ahí. ‘E lava ke ne fakafonu‘aki kitautolu ‘a e nonga ‘i he taimi ‘oku tau loto-mo‘ua aí. ‘E lava ke ne tokoni‘i kitautolu ke fakatupulekina ‘a e ngaahi ‘ulungaanga faka‘ofo‘ofa kehe mo fakamānako foki. (Kalētia 5:​22, 23) Na‘e fakapapau‘i ange ‘e Sīsū ki hono kau muimuí ‘oku foaki nima-homo ‘e he ‘Otuá ‘a e me‘a‘ofa ko ení.​​—Luke 11:13.

‘Oku foaki ‘e he ‘Otuá ‘a e ‘iló ki he fa‘ahinga ‘oku nau kumi tōtōivi kiate iá. (Ngāue 17:26, 27) Takatakai ‘i he māmaní, ‘oku ‘i ai ‘a e kakai ‘oku nau kumi loto-mo‘oni ki he mo‘oní. ‘Oku nau loto ke ‘ilo fekau‘aki mo e ‘Otuá​—ko hai hono huafá, ko e hā ‘ene taumu‘a ki he fo‘i māmaní mo e fa‘ahinga ‘o e tangatá, mo e founga ‘e lava ke nau ‘unu‘unu ofi ai kiate iá. (Sēmisi 4:8) ‘Oku fa‘a fetaulaki ‘a e Kau Fakamo‘oni ‘a Sihová mo e kakai pehē pea ‘oku nau fiefia ke vahevahe ‘a e tali ‘a e Tohi Tapú ki he ngaahi fehu‘i ko iá.

Ko e ‘uhinga ia ‘okú ke ma‘u ai ‘a e makasini ko ení? ‘Okú ke fekumi ki he ‘Otuá? Mahalo ko e founga eni ‘okú ne tali ai ho‘o lotú.