ŴANTHU anandi akhumbisiska kumukika fumbu lenili. Bayibolu lilongo kuti Yehova watuvwa ndipuso wamuka mapempheru mazuŵa nganu. Kweni kuti iyu wavwisiyi mapempheru ngidu, vithemba vo taŵeni tichita.

Pa nyengu yo Yesu wenga pacharu, wanguchenya alongozgi a chisopa wo apempheranga mwachinyengu. Yiwu akhumbanga waka kujiwonesa kuti mbarunji ndipu akuziŵa kupemphera. Yesu wangukamba kuti ŵanthu ŵenaŵa “alonde limu mphotu yawu yosi.” Yapa Yesu wangulongo kuti yiwu alondiyanga vo avikhumbisiskanga ukongwa, kung’anamuwa kulumbika ndi ŵanthu, kweni Chiuta wavwanga cha pamwenga kumuka mapempheru ngawu. (Mateyu 6:5) Mwakuyanana waka, ŵanthu anandi mazuŵa nganu apemphera mwakukoliyana ndi khumbu lawu kweni laku Chiuta cha. Yiwu alondo cha fundu za mu Bayibolu zo takambiskana, ndipu Chiuta nayu watuvwa cha mapempheru ngawu.

Nanga yimwi? Kumbi Chiuta wangavwa ndi kumuka mapempheru nginu? Kuti Chiuta wamuki mapempheru nginu vithemba mtundu, fuku pamwenga unandi wa ndalama zo mwe nazu cha. Bayibolu lititisimikizgiya kuti: “Chiuta walivi sankhu, kweni iyu walondere munthu wakutuliya mu mtundu wewosi yo watimuwopa ndi kuchita urunji.” (Machitidu 10:34, 35) Kumbi namwi muchita vo lemba ili lakamba? Kopa Chiuta kung’anamuwa kumutumbika ukongwa ndipuso kuleka kuchita vinthu vo vingamuguŵiska. Ndipu kuchita urunji kung’anamuwa kuyesesa kuchita vo Chiuta wawona kuti vakwenere mumalu mwakuchita vo yimwi pamwenga ŵanthu akhumba. Kumbi mukhumba nadi kuti Chiuta wavwengi mapempheru nginu? Bayibolu likamba mo mungapemphere. *

Ŵanthu anandi mazuŵa nganu akhumba kuti Chiuta wamukengi mapempheru ngawu mwakuchita vakuziziswa. Kweni kumbukani kuti chinanga mphanyengu yo Bayibolu lalembekiyanga, Chiuta wavichitanga kaŵikaŵi cha vakuziziswa. Pajumphanga vyaka vinandi kutuliya po wachitiya chakuziziswa chinyaki kuti wachiti so chinyaki. Kweniso Bayibolu likamba kuti nyengu ya vakuziziswa yikumala akutumika ŵati ŵafwa. (1 Akorinto 13:8-10) Sonu kumbi venivi ving’anamuwa kuti Chiuta wakuleka kumuka mapempheru? Awa! Wonani mapempheru nganyaki ngo iyu wamuka.

Chiuta wapereka zeru. Yehova ndiyu chisimi cha zeru. Ndipu iyu wanola cha, kweni wapaska weyosi yo wamupempha ulongozgi kweniso yo wapenja kuchita vo iyu wakhumba.—Yakobe 1:5.

Chiuta wapereka mzimu waki kuti utiwovyi. Mzimu wakupaturika ndi nthazi yaku Chiuta. Palivi nthazi yinyaki yo yiluska mzimu wakupaturika. Mzimu wakupaturika Ungatiwovya kukunthiyapu masuzgu. Ungatipaska chimangu asani tisuzgika maŵanaŵanu. Ungatiwovya so kuja ndi mijalidu yinyaki yamampha ukongwa. (Agalatiya 5:22, 23) Yesu wangusimikiziya akusambira ŵaki kuti Chiuta wangatinola cha mphasu yeniyi.—Luka 11:13.

Chiuta watovya ŵanthu wo atimupenja ndi mtima wosi kuti amuziŵi. (Machitidu 17:26, 27) Pacharu chapasi pe ŵanthu wo akhumbisiska kuziŵa uneneska. Yiwu akhumba kuziŵa zina laku Chiuta, chifukwa cho wakulenge ŵanthu ndipuso charu chapasi, kweniso vo angachita kuti aje nayu pa ubwezi. (Yakobe 4:8) Kanandi Akaboni aku Yehova akumana ndi ŵanthu a nge ŵenaŵa ndipu atiŵalongo vo Bayibolu limuka.

Kumbi namwi mwalonda magazini iyi kuti panyaki mungamukika mafumbu nginu? Kumbi mupenja Chiuta? Panyaki yeniyi ndiyu nthowa yo iyu wakumukiyani pempheru linu.