Pure

7 E faaroo e e pahono anei te Atua?

E FAAARA teie uiraa i te anaanatae e te maere rahi. Ia au i te Bibilia, e faaroo iho â Iehova i te pure i teie mahana. Tei ia tatou noa e faaroo ai oia aore ra eita.

Ua faahapa Iesu i te mau aratai haapaoraa i to ˈna ra tau o tei pure ma te haavarevare; ua haapao noa ratou ia hiˈohia to ratou paieti. Ua parau oia e “ua noaa ta ratou utua,” oia hoi ua fanaˈo noa ratou i ta ratou i hiaai roa ˈˈe, ia itea mai e te taata, eiaha râ i te mea faufaa mau, ia faaroo te Atua ia ratou. (Mataio 6:5) I teie mahana atoa, te pure ra e rave rahi ia au i to ratou iho hinaaro, eiaha râ i to te Atua. No to ratou tâuˈa ore i te mau faaueraa tumu Bibilia ta tatou i hiˈo mai, eita te Atua e faaroo ia ratou.

E oe? E faaroo e e pahono anei te Atua i ta oe mau pure? E ere tei to oe opu fetii, nunaa, aore ra tiaraa totiare te pahonoraa. Te haapapu maira te Bibilia: “E ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) No oe anei teie mau parau? Mai te peu e te mǎtaˈu ra oe i te Atua, te faatura roa ra ïa oe ia ˈna, a ore atu ai e faaoto ia ˈna. Mai te peu e te tapi ra oe i te parau-tia, te imi ra ïa oe i te rave i te mea maitai i te aro o te Atua, eiaha râ i te pee i to oe iho hinaaro aore ra to vetahi ê. E hinaaro iho â anei oe ia faaroo te Atua i ta oe mau pure? Te faaite ra te Bibilia e nafea oe. *

Parau mau, e hinaaro e rave rahi ia pahono semeio te Atua i ta ratou mau pure. I tahito râ, mea varavara te Atua i te faatupu i te mau semeio. I te tahi taime, e mairi e rave rahi senekele i rotopu i te hoê semeio e te tahi atu. Te faaite atoa ra te Bibilia e ua ore te mau semeio i muri aˈe i te tau o te mau aposetolo. (Korinetia 1, 13:8-10) Te auraa anei ïa e eita te Atua e pahono i te mau pure i teie mahana? E ere roa ˈtu! Teie te tahi mau pure ta ˈna e pahono.

E horoa te Atua i te paari. O Iehova te Tumu hoê roa o te paari mau atoa. E horoa noa oia i te reira i te feia e hinaaro ra i ta ˈna aratairaa e e faaitoito ra i te ora ia au i te reira.—Iakobo 1:5.

E horoa te Atua i to ˈna varua moˈa e te mau maitai atoa o te reira. Te varua moˈa, o te puai ohipa ïa o te Atua. Aita ˈtu e puai rahi aˈe. E tauturu mai te reira ia faaoromai i te mau fifi. E horoa mai i te hau ia ahoaho tatou. E tauturu mai ia atuatu i te tahi atu mau huru nehenehe e te au maitai. (Galatia 5:22, 23) Ua haapapu Iesu i ta ˈna mau pǐpǐ e e horoa noa te Atua i teie ô.—Luka 11:13.

E horoa te Atua i te ite i te feia e imi maite ra ia ˈna. (Ohipa 17:26, 27) I te ao nei, te vai ra te taata e imi ra iho â i te parau mau. Te hinaaro ra ratou e ite i te Atua, to ˈna iˈoa, ta ˈna opuaraa no te fenua e te huitaata, e te ravea no te haafatata ˈtu ia ˈna. (Iakobo 4:8) Te farerei pinepine nei te mau Ite no Iehova i tera mau taata e te oaoa nei i te faaite i te mau pahonoraa Bibilia i teie mau uiraa.

Te tumu paha ïa i fanaˈo ai oe i teie vea. Te imi ra anei oe i te Atua? Teie paha ïa ta ˈna ravea no te pahono i ta oe pure.

[Nota i raro i te api]