TE JOJKʼOYEL ini, jaʼ te bin ya skʼan ya snaʼbeyik skʼoplal te ants winiketike. La kiltikix te ya yaʼiy te oración te Diose, pero ma spisiluk. Jich yuʼun, ¿yabal yaʼiy te kuʼuntike? Jaʼ chikan bin yuʼun te ya jkʼopontike.

Te Jesús la yal ta jamal te ma stojiluk te bitʼil ya skʼoponik Dios te jwolwanejetik yuʼun religión, melel jaʼnax ya skʼan ya stoy sbaik ta stojol te ants winiketik ta swenta te schʼuunejik Dios ta skʼopike. Te Jesús la yaltiklanbey te «yichʼojiquix te smahtanique». Te kʼalal ya skʼoponik Dios te jwolwanejetik-abi, jaʼnax ya skʼanik te yakuk x-ilotik yuʼun te ants winiketik, ma jaʼuk te ya x-aʼiybot skʼopik yuʼun te Diose, jich yuʼun yichʼojikix kʼoem te smajtanike (Mateo 6:5). Jaʼnix jich ta kʼajkʼal ini bayal ants winiketik jaʼnax ya skʼoponik Dios yuʼun te ay bin ya skʼanike. Ta skaj te ma stʼunik te bin ya yal te Biblia jich bitʼil la kiltikix tal ta yantikxan articuloetik, maba ya sutbotik te skʼopike.

Jaxan te joʼotike, ¿yabal sutbotik te jkʼoptike? Te Jehová ya sutbotik te jkʼoptik manchukme yanyantik jtsʼumbaltik, jlumaltik, manchukme pobreotik o jkʼulejotik. Te Biblia jich ya yal: «Mayuc machʼa nax tsahbil yuʼun Dios, ta spisil nacionetic lec yoʼtan yuʼun te machʼa yichʼoj ta mucʼ soc te toj bin ya spas» (Hechos 10:34, 35). «Te machʼa yichʼoj ta mucʼ» te Diose maba ya skʼan ya spas te bin ma smulane. Sok te machʼa «toj te bin ya spas» jaʼ ya skʼan ya spas te skʼanojel yoʼtan te Diose, ma jaʼuk te bin ya skʼan yoʼtan stukele o te skʼanojel yoʼtan te ants winiketike. Jaʼ yuʼun, teme ya jkʼantik te ya yaʼiy jkʼoptik te Jehová, ya skʼan ya jpastik te bin ya yalbotik te Biblia. *

Bayal ants winiketik ya skʼanik te yakuk sutbotik sok jun milagro te s-oracionike. Pero ta namey kʼinal, ma spisiluk-ora jich la spas te Diose. Te bin ya yal te Biblia ya yakʼ ta ilel te ay ya xkʼax bayal jaʼbil yuʼun ya spas jun milagro. Te Biblia jaʼnix jich ya yal te kʼalal ya xlajik te jpuk-kʼopetike tey ya xlaj skʼoplal-euk-a te milagroetik (1 Corintios 13:8-10). Jaʼ-abi ma skʼan ya yal te ma sutbotik jkʼoptik te Diose. Kiltik bin-utʼil ya sutbotik jkʼoptik ta kʼajkʼal ini.

Ya yakʼ pʼijil oʼtanil. Te smelelil pʼijil oʼtanil talem ta stojol te Diose, ya yakʼbey spʼijil te machʼatik ya spasik tulan ta schʼuunbeyel te skʼope (Santiago 1:5).

Ya yakʼ chʼul espíritu. Maʼyuk bin pajal sok te chʼul espíritu, te jaʼ te yuʼel te Diose. Bayal bin-utʼil ya skoltayotik te chʼul espíritu, jich bitʼil ya skoltayotik yuʼun ya xkujch kuʼuntik te pruebaetik, ya yakʼ slamalil koʼtantik kʼalal ayotik ta mel-oʼtan sok ya skoltayotik ta yakʼel ta ilel tʼujbil taleliletik (Gálatas 5:22, 23). Te Jesús la yal te ya yakʼbotik te schʼul espíritu te Dios jaʼ chikan jayeb ya xtuun kuʼuntik (Lucas 11:13).

Ya spʼijubtes te machʼatik ya skʼan ya snaʼik te smelelile. Jich bitʼil ya yal Hechos 17:26, 27, bayal ants winiketik ta swolol Balumilal ya skʼan ya snaʼbeyik sba te Diose, ya skʼan ya snaʼbeyik te sbiil, te skʼanojel yoʼtan ta swenta te Balumilal sok ta stojol te ants winiketik soknix ya skʼan ya snaʼik bin-utʼil ya xjuʼ ya xnoptsajik ta stojol (Santiago 4:8). Te testigoetik yuʼun Jehová sok spisil yoʼtanik ya snojptesik ta Biblia te ants winiketik te ya skʼan ya snaʼbeyik sba te Diose.

¿Jaʼbal yuʼun la atsak te revista ini yuʼun te ya akʼan ya anaʼbey sba te Diose? Teme jiche, jaʼniwan sujtib te bin la akʼanbey ta oracione.