TAJE toj ep jech tskʼan tsnaʼik li krixchanoetike. Laj xa jchantik tal ti mu skotoluk orasionetik chaʼi li Diose. Pe ¿mi chaʼi van Dios li orasion cha pas voʼote? Jaʼ me te chvinaj ti kʼuyelan cha pase.

Li Jesuse laj yal ti chopol li kʼuyelan tspasik orasion li jnitvanejetik ta relijion ta skʼakʼalile, yuʼun jaʼ noʼox oy ta yoʼontonik chakʼik ta ilel ti yichʼojik xa ta mukʼ yilel li Diose. Laj yal xtok ti «yichʼoj xa o smotonic ti jech tspasique». Li jnitvanejetik ta relijion taje, maʼuk oy ta yoʼontonik ti x-aʼibatik yuʼun li Diose, jaʼ oy ta yoʼontonik ti lek x-ilatik yuʼun li krixchanoetike, taje jaʼ li smoton la staike (Mateo 6:5). Jechtik chkʼot ta pasel li avi eke. Ep krixchanoetik kʼalal tspasik orasione muʼyuk te ta yoʼontonik li Diose, jaʼ noʼox batem ta yoʼontonik li kʼusi tskʼan stukike. Jech xtok, ta skoj ti muʼyuk tstsakik ta venta li beiltaseletik ta Vivlia jech kʼuchaʼal laj xa jchantik tal li ta yan mantaletike, muʼyuk chtakʼbatik li s-orasionike.

¿Mi ta van stakʼbutik Jeova li orasion ta jpastike? Sventa stakʼbutike, mu persauk jkʼulejutik o povreutik, mi jelel jtsʼunbaltik o jlumaltik. Li Vivliae chal ti «muc tʼujbiluc bochʼo chcʼuxubin li Diose». Moʼoj, yuʼun chal ti «buyuc noʼox banamilal oy li cristianoetique lec ta xʼilatic yuʼun Dios me ta xichʼic ta muqʼue, me tspasic cʼusi tuqʼue» (Hechos 10:34, 35). Jaʼ yuʼun, kʼalal ta xichʼ ta mukʼ Dios li jun krixchanoe, muʼyuk kʼusi chopol tspas sventa tsokesbe yoʼonton li Diose. Li buchʼu tspas kʼusi tukʼe, chakʼbe yipal spasel li kʼusi tskʼan yoʼonton Diose, maʼuk li kʼusi tskʼan yoʼonton stuke o li yan krixchanoetike. Jaʼ yuʼun, mi ta jkʼantik chaʼi j-orasiontik li Diose skʼan xkakʼtik akʼo sbeiltasutik li sKʼope. *

Ta melel, epal krixchanoetik smalaojik ti ta skʼelobil juʼelal chichʼik takʼbel li s-orasionike. Pe li ta voʼnee, bakʼintik noʼox jech la stakʼ li Diose. Li loʼiletik ta Vivliae, chakʼ ta ilel ti ta sienal noʼox jabil jelav bateltik sventa xkʼot ta pasel yan skʼelobil juʼelale. Jech xtok, li sKʼop Diose chakʼ ta ilel ti te laj skʼoplal li skʼelobiltak juʼelal kʼalal cham li jtakboletike (1 Corintios 13:8-10). Pe taje maʼuk skʼan xal ti muʼyuk tstakʼ j-orasiontik li Diose. Jkʼeltik batel junantik kʼuxi tstakʼbutik Jeova li avie.

Chakʼ jpʼijiltik. Li Diose, ti jaʼ te chlik talel ta stojolal li melel pʼijilale, ta slekil yoʼonton chakʼbe li buchʼutik tsaʼ beiltasel ta stojolale xchiʼuk ti chakʼik persa chchʼunbeik li smantale (Santiago 1:5).

Chakʼbutik chʼul espiritu. Muʼyuk kʼusi xkoʼolaj-o li chʼul espiritue, ti jaʼ li yip Dios ch-abteje. Yuʼun chakʼ kipaltik ta stsalel li prevaetike, tspat koʼontontik kʼalal chkat koʼontontike xchiʼuk tskoltautik ta xchʼiesel lekil talelaletik (Gálatas 5:22, 23). Maʼuk noʼox taje, li Jesuse laj yal ti Diose chakʼbutik ti kʼuyepal chtun kuʼuntik li xchʼul espiritue (Lucas 11:13).

Tskolta li buchʼutik tskʼan chojtikinik ta melel li kʼusi chal Vivliae. Jech kʼuchaʼal chal li Hechos 17:26, 27, oy ep krixchanoetik ta sjunul balumil ti oy ta yoʼontonik tsaʼik li Diose. Tskʼan chojtikinbeik li sbie, li kʼusi tskʼan tspas ta sventa li Balumile xchiʼuk ta stojolal li krixchanoetike xchiʼuk oy ta yoʼontonik tskʼan tsnaʼik kʼuxi xuʼ xnopajik ta stojolal (Santiago 4:8). Li yajrextikotak Jeovae nopolik noʼox jech ta staik krixchanoetik kʼuchaʼal taje xchiʼuk ta sjunul yoʼontonik tstakʼik ta Vivlia li kʼusi tskʼan tsnaʼike.

¿Mi jaʼ van ta skoj ti la achʼam li revista liʼe? ¿Mi yakalot saʼel li Diose? Mi jeche, xuʼ van jaʼ senyail ti laj xa stakʼbot a-orasion li Diose.