ТА ЮАН троссэ сюлмаськытэ. Библиысь адӟиське, Иегова вӧсяськеммес кылэ шуыса. Но вань вӧсяськонъёсты со уг кылы. Со милемыз мед кылоз шуыса, милемлы мае ке но лыдэ басьтоно.

Одӥг пол Иисус тэргаз со вакытэ улӥсь религиозной кивалтӥсьёсты. Со соосты чеберъяськисьёс шуыса нимаз, малы ке шуоно соос вӧсяськизы калык азьын чеберъяськон понна гинэ. Со вераз: «Асьсэлэсь медзэс-кузьымзэс соос басьто ини». Та кылъёсын Иисус вераз, та религиозной кивалтӥсьёслэн потэ, адямиос соосты мед адӟозы шуыса, мед адӟозы, макем соос оскисесь но соосты мед ушъялозы шуыса. Зэм, адямиос сое адӟизы но ушъязы соосты, но Инмарлы соослэн вӧсяськемзы ӧз яра (Матфей 6:5). Озьы ик туннэ но, адямиос вӧсясько Инмарлы, кызьы асьсэлэн потэ, но соос уг малпасько, яра-а со Инмарлы. Таӵе адямиослэсь Инмар вӧсяськемзэс уг кылы, малы ке шуоно соос лыдэ уг басьто Библиысь возетъёсты, кудъёсыз сярысь асьмеос азьлогес верамы вал ини.

Нош мар вераны луоз тӥ сярысь? Кылэ-а Инмар тӥлесьтыд вӧсяськемдэс? Кыӵе гинэ калыкысь тӥ медад луэ, узыресь-а тӥ, куанересь-а, Инмар тӥлесьтыд вӧсяськемдэс кылэ. Библия вера: «Инмар адямиосты вылтус шоры учкыса улӥё-вылӥё уг кары. Котькуд калык пӧлысь Солэсь кышканэн, шонерлыко улӥсь муртъёс Солы кельшымонэсь-ярасесь луо» (Апостолъёслэн ужъёссы 10:34, 35). Тӥ сярысь вераны луоз-а, тӥ Инмарлэсь кышканэн но шонерлыко улӥськоды шуыса? Тӥ Инмарез данъяськоды ке но сое ӝоже уськытэмды уг поты ке, озьыен, тӥ Инмарлэсь кышканэн улӥськоды. Тӥ лэсьтӥськоды ке сое, мае Инмар шонерен лыдъя, а не сое, мае адямиос шонерен лыдъяло, озьыен, тӥ шонерлыко улӥськоды. Потэ-а тӥляд, Инмар вӧсяськемдэс мед кылоз шуыса? Библия тӥледлы юрттыны быгатоз.

Трос адямиослэн потэ, Инмар, кыӵе ке паймымон уж лэсьтыса, вӧсяськемзылы ответ мед сётоз шуыса. Но Инмар вашкала дыръёсы но паймымон ужъёс туж шер лэсьтылэ вал. Куддыръя одӥг паймымон уж дырысен мукет паймымон уж дырозь трос сю аръёс ортчо вал. Со сяна, Библиын верамын, апостолъёс кулэм бере паймымон ужъёс ӧз лэсьтӥське ни шуыса (1 Коринфъёслы 13:8—10). Соку туннэ Инмар вӧсяськеммес уг кылы-а? Кылэ. Эскеромы вӧсяськонъёсты, кудъёссэ Инмар кылэ.

Инмар визьлык сётэ. Зэмос визьлык Иегова бордысь потэ. Со визьлыксэ сётэ ваньмызлы, кинъёс солэсь кивалтэтсэ утчало но кинъёслэн солэн визь-кенешъёсызъя улэмзы потэ (Иаков 1:5).

Инмар аслэсьтыз святой духсэ сётэ. Святой дух — со Инмарлэн кужымез. Святой духлэсь кужмо номыр но ӧвӧл ни. Святой духлы луыса, ми быгатӥськомы котькыӵе шуг-секытъёсты чиданы. Куке милемыз курадӟонъёс зӥбо, Инмар святой дух пыр милемлы каньыллык сётэ. Со сяна, святой духлы луыса, ми быгатӥськомы умой сямъёс будэтыны (Галатъёслы 5:22, 23). Иисус оскытӥз аслэсьтыз дышетскисьёссэ, соос куризы ке, Инмар соослы одно ик святой духсэ сётоз шуыса (Лука 11:13).

Инмар тодон-валан сётэ солы, кин Инмарез утча. Быдэс дунне вылын вань адямиос, кудъёсыз Инмарез утчало (Апостолъёслэн ужъёссы 17:26, 27). Соослэн тодэмзы потэ, кызьы Инмарлэн нимыз, мар со дасяз адямиослы, кызьы соос Инмар доры матэгес кариськыны быгато (Иаков 4:8). Иеговалэн Адӟись-Ивортӥсьёсыз ӵемысь пумитало таӵе адямиосты. Соос соослы шумпотыса та юанъёслы Библиысь валэктонъёс сёто.

Оло нош, тӥ но Инмарез утчаськоды, соин ик та публикациез кияды возиськоды. Тазьы Инмар тӥляд вӧсяськемдылы ответ уг сёты меда?