ONỌ rọhe obenu na kẹ ihwo buebun omavwerhovwẹn vẹ ẹwẹn rẹ ayen vwọ riẹn kpobarophiyọ. Baibol na djerephia nẹ Jihova ghene kpahanphiyọ ẹrhovwo nonẹna. Sẹ Jihova kpahenphiyọ ẹrhovwo rẹ avwanre yerẹ ọ kpahenphiyọ-ọ, obọ avwanre yen ọ hepha.

Jesu sen ilori rẹ ẹga re herọ vwẹ ọke rọyen re nẹrhovwo rẹ ophiẹnvwe. Obo rẹ ayen davwerhọn rọyen yen ayen vwo djephia kẹ ihwo nẹ ayen riẹn obo ra nẹrhovwo. Ọ tare nẹ ihwo tiọyena “reyọ osa rayen nure” ro mudiaphiyọ nẹ ayen cha mrẹ oborẹ ayen ma guọnọ na rọ dia oniso rẹ ihworakpọ, ẹkẹvuọvo ọ dia Ọghẹnẹ vwọ kpahenphiyọ ẹrhovwo rayen yen ayen guọnọre-e. (Matiu 6:5) Ọtiọyen ọ je hepha nonẹna, ihwo buebun nẹrhovwo nene ọhọre romobọ rayen, ọ dia ọhọre rẹ Ọghẹnẹ-ẹ. Ọghẹnẹ kpahenphiyọ ẹrhovwo rẹ ihwo ri gbobọnyẹ iyono ri Baibol ra fuẹren re na-a.

Kẹ owẹ vwo? Ọghẹnẹ cha kerhọ je kpahenphiyọ ẹrhovwo wẹn? E mu ẹkpahọnphiyọ rẹ onọ nana kpahen asan wo nurhe yẹrẹ ẹkuotọ wo nurhe, yẹrẹ oborẹ akpọ yovwẹn uwe te-e. Baibol na kẹ avwanre imuẹro nẹ, “Ọghẹnẹ ghwẹ oma hẹ abọvo jẹ ọvo vwo-o; ẹkẹvuọvo vwẹ ẹgborho kẹgborho ohwo rọ djẹ oshọ rọye ro de ru obo ri shehọ ọye ọ reyo.” (Iruo Rẹ Iyinkọn Na 10:34, 35) Eta nana dje oka rẹ ohwo ru wọ hepha? Ra vwọ djẹ oshọ rẹ Ọghẹnẹ mudiaphiyọ nẹ e che muọghọ kẹ je kẹnoma kẹ obo ri miovwo ivun. E vwo ru obo ri shephiyọ mudiaphiyọ ra vwọ davwẹngba vwo ru oborẹ Ọghẹnẹ tare nẹ ọ gbare ukperẹ e vwo ru obo ri shephiyọ vẹ ọhọre rẹ avwanre yẹrẹ ihworakpọ efa. Wọ ghene guọnọ nẹ Ọghẹnẹ kerhọ rẹ ẹrhovwo wẹn? Baibol na dje kẹ wẹ obo wọ nẹrhovwo wan Ọghẹnẹ da kerhọ wẹn. *

Vwọrẹ uyota, ihwo buebun guọnọre nẹ Ọghẹnẹ kpahenphiyọ ẹrhovwo rayen vwẹ idjerhe rẹ igbevwunu. Ọke re vwo si Baibol na, ọ dia ọkieje yen Ọghẹnẹ vwo ru emu rẹ igbevwunu-u. Ọkiọvo, o de ru igbevwunu ọvo nu, ẹgbukpe ujorin buebun wanvrẹ tavwen o ki ru ọfa. Kpobarophiyọ, Baibol na djerephia nẹ ọke rẹ igbevwunu vwoba vwẹ ẹdẹ rẹ iyinkọn na. (1 Kọrẹnt 13:8-10) Ọnana ko mudiaphiyọ nẹ Ọghẹnẹ rha kpahenphiyọ ẹrhovwo nonẹna-a? Ẹjo, kakaka! Roro kpahen ẹrhovwo evo rọ kpahanphiyọ.

Ọghẹnẹ kẹ ihwo aghwanre. Jihova yen obọdẹn rẹ Esiri rẹ uvi rẹ aghwanre eje. Ọ vwọ kẹ ihwo ghwologhwolo, ihwo re guọnọ odjekẹ re je guọnọ yeren akpọ nene aghwanre rọyen, ọ vwọ kẹ ayen ọphẹ.—Jems 1:5.

Ọghẹnẹ vwẹ ẹwẹn ọfuanfon na vẹ erere ri no cha vwọ kẹ ihwo. Ẹwẹn ọfuanfon na yen ẹgba rẹ Ọghẹnẹ vwo ruiruo. O vwo ẹgba ọfa rọ gan vrẹ-ẹn. Ọ sa chọn avwanre uko vwo chirakon rẹ edavwini. Ọ sa kẹ avwanre ẹwẹn ri dọe ọke rẹ ẹwẹn rẹ avwanre da hra te otọ. Ọ sa chọn avwanre uko vwo vwo omamọ rẹ iruemu. (Galesha 5:22, 23) Jesu vwẹ imuẹro vwọ kẹ idibo rọyen nẹ Ọghẹnẹ vwẹ okẹ nana vwọ kẹ ihwo ghwologhwolo.—Luk 11:13.

Ọghẹnẹ vwẹ erianrien kẹ ihwo re guọnọ vughe. (Iruo Rẹ Iyinkon Na 17:26, 27) Vwẹ akpọneje, o vwo ihwo re ghene guọnọ riẹn uyota na. Ayen guọnọ vughe Ọghẹnẹ—odẹ rọyen, ọhọre rọyen vwọ kẹ otọrakpọ na vẹ ihworakpọ vẹ oborẹ ayen se vwo sikẹrẹ. (Jems 4:8) Ọkieje yen Iseri ri Jihova vwọ mrẹ ihwo tiọna, oma je vwerhen ayen rẹ ayen vẹ ihwo tiọyena vwọ fuẹrẹn ẹkpahọnphiyọ rẹ enọ yena kuẹgbe vwo nẹ Baibol na cha.

Ọyena yen oboresorọ wọ vwọ reyọ ọbe nana? Wọ guọnọ riẹn Ọghẹnẹ? Ọkiọvo ọnana yen idjerhe rẹ Ọghẹnẹ vwọ kpahanphiyọ ẹrhovwo wẹn na.