MBUDZISO i re afho nṱha i a nyanyula na u vusa dzangalelo ḽa u ṱoḓa u ḓivha. Bivhili i sumbedza uri Yehova u a thetshelesa thabelo na ṋamusi. Zwauri u a pfa thabelo dzashu kana ha dzi pfi zwi ḓo ḓisendeka nga zwine ra zwi ita.

Yesu o sasaladza vharangaphanḓa vha vhurereli vha misini yawe vhe vha vha vha tshi rabela nga muhoyo; vhe vha vha vha tshi takalela u vhonwa nga vhathu sa vho lugaho. O amba uri vhathu vhenevho vho vha vha tshi ḓo wana “mutendelo wavho,” zwine zwa amba uri vho vha vha tshi ḓo wana zwe vha vha vha tshi zwi ṱoḓesa nga maanḓa, u vhonwa nga vhathu, hu si zwe vha vha vha tshi zwi shaya, u pfiwa nga Mudzimu. (Mateo 6:5) Nga hu fanaho na ṋamusi, vhathu vhanzhi vha rabela u ya nga zwine vha funa zwone, hu si zwine Mudzimu a funa zwone. Arali vha sa londi maitele a Bivhili ane ra kha ḓi tou bva u a haseledza, Mudzimu a nga si vha thetshelese.

Naho zwo ralo, hu pfi mini nga inwi? Naa Mudzimu u ḓo thetshelesa na u fhindula thabelo dzaṋu? Phindulo ya mbudziso yeneyi a i ḓitiki nga muvhala, lushaka kana vhuimo vhune na vha naho tshitshavhani. Bivhili i a ri khwaṱhisedza musi i tshi ri: “Mudzimu ha ṱaluli muthu, atsina kha tshakha dzoṱhe, ané a mu ofha a ita zwo lugaho, u a mu funa.” (Mishumo 10:34, 35) Naa eneo maipfi a ṱalusa zwine inwi na vha zwone? Arali ni tshi ofha Mudzimu, ni ḓo mu dzhia e wa nṱhesa vhukuma, nahone ni ḓo ofha u mu pfisa vhuṱungu. U ita zwo lugaho zwi amba u ṱoḓa zwine Mudzimu a amba uri zwo luga, nṱhani ha u tevhela zwine inwi kana vhaṅwe vhathu vha funa zwone. Naa ni a ṱoḓa zwa vhukuma Mudzimu a tshi thetshelesa thabelo dzaṋu? Bivhili i ni vhudza zwine na fanela u zwi ita u itela uri Mudzimu a thetshelese thabelo dzaṋu. *

I ngoho, vhathu vhanzhi vha ṱoḓa Mudzimu a tshi fhindula thabelo dzavho nga lwa vhuṱolo. Na misini ya Bivhili, Mudzimu o vha a sa sokou fhindula thabelo nga lwa vhuṱolo. Nga zwiṅwe zwifhinga ho vha hu tshi fhela maḓana manzhi a miṅwaha hu sa athu itea na vhuṱolo na vhuthihi. Zwiṅwe hafhu, Bivhili i sumbedza uri vhuṱolo ho guma nga murahu ha tshifhinga tsha vhaapostola. (1 Vha-Korinta 13:8-10) Naa zwenezwi zwi amba uri Mudzimu ha fhinduli thabelo ṋamusi? A hu khou ambiwa zwenezwo na luthihi! Ṱhogomelani dziṅwe dza thabelo dze a dzi fhindula.

Mudzimu u ri ṋea vhuṱali. Yehova ndi ene Tshisima tshihulwanesa tsha vhuṱali ha ngoho. U na mafunda nahone ha badelisi musi a tshi ṋea vhathu vhane vha ṱoḓa vhulivhisi hawe vhutshiloni havho.—Yakobo 1:5.

Mudzimu u ṋea muya mukhethwa wawe na mbuyelo dzawo dzoṱhe. Muya mukhethwa ndi maanḓa a Mudzimu a shumaho. A hu na maṅwe maanḓa a fhiraho eneo. A nga ri thusa u konḓelela milingo. A nga ri ṋea mulalo musi ro sedzana na vhuleme. A nga ri thusa u ṱahulela dziṅwe pfaneleo dzavhuḓi dzine ra ḓo dzula ri nadzo. (Vha-Galata 5:22, 23) Yesu o khwaṱhisedza vhatevheli vhawe uri Mudzimu u ṋea tshenetshi tshifhiwa nga mafunda.—Luka 11:13.

Mudzimu u ṋea vha mu ṱoḓaho nḓivho. (Mishumo 17:26, 27) Shangoni ḽoṱhe, hu na vhathu vha ṱoḓaho u ḓivha mafhungo-ngoho zwi tshi bva mbiluni. Vha ṱoḓa u ḓivha Mudzimu—dzina ḽawe, ndivho yawe nga ha ḽifhasi, nḓila ine vha nga sendela ngayo tsini nae. (Yakobo 4:8) Ṱhanzi dza Yehova vha anzela u ṱangana na vhathu vho raloho, nahone vha a takalela u vha ṋea phindulo dzi bvaho Bivhilini dza mbudziso dzenedzo.

Naa zwenezwo a si zwone zwo itaho uri ni wane yeneyi magazini? Naa ni khou ṱoḓa u ḓivha Mudzimu? Khamusi yeneyi ndi yone nḓila ine a khou fhindula thabelo yaṋu ngayo.