MARO olo tihahay valiny fan̈ontanian̈a io. Misy valiny tsarabe amy Baiboly ao. Koran̈inizio ao fa Jehovah ten̈a mitandren̈y vavakantsika. Fa izy fo ndraiky arakarakany raha ataontsika fo hitandrin̈esany atsika.

Nivolan̈iny Jesosy iro pitondra fivavahan̈a aby tamy zen̈y fotony iro nihatsaravelatsihy. Nivavaka iro, fotony iro tihatao olo pivavaka be. Zen̈y nahavy Jesosy nivolan̈a fa “efa nazondro radindro jiaby.” Dikanizen̈y efa nazondro raha ten̈a tiandro, iro tiho hita. Fa iro ndraiky tsy nahazo raha ten̈a nilaindro. Tsy nitandrin̈esany Zan̈ahary iro. (Matio 6:5) Olo izioty koa man̈ano erakany itiavandro izy fo, iro koa fa mivavaka. tsy mifan̈araka amy sitrapony Zan̈ahary foeky vavakandro. Tsy tandrin̈esany Zan̈ahary vavakandro, fotony iro tsy mijery toro lalan̈any Baiboly nidinihintsika tio in̈y.

Ke anao ke? Zan̈ahary ma mitandren̈y ndreky mamaly vavaka ataonao? Tsy karazan̈anao na firenenanao, na anao manan̈a na tsy manan̈a raha zahavany Zan̈ahary izy koa fa hamaly vavakanao. Volan̈iny Baiboly ao: “Zan̈ahary tsy man̈avakavaka, fa amy firenena jiaby, lan̈iany olo mavozo izy ndreky man̈ano ny marin̈y fo ankasitrahiny.” (Asan’ny Apostoly 10:34, 35) Asa anao mba an̈isanolo mavozo izy ndreky man̈ano ny marin̈y? Dikany mazovo Zan̈ahary zen̈y, man̈aja izy mare, avio mavozo tsao tsy hamparavoravo izy. Fa dikany man̈ano ny marin̈y zen̈y ndraiky, mifen̈y man̈ano raha volan̈iny Zan̈ahary fa tsara, avio tsy man̈ano zay raha tianolo na zay raha tianao fo. Ke izikoa tianao vavakanao mba tianao tandrin̈esany Zan̈ahary, ataova raha irahiny Baiboly ataonao. a

Mbala tianolo maro izikoa Zan̈ahary han̈ano fahagagan̈a hamalian̈a vavaka ataondro. Fa mahalan̈a fo Zan̈ahary man̈ano fahagagan̈a karaha zen̈y, nata taminy andra taloha tan̈y. Ndraikindraiky efa taonjato maro afarany nan̈anaovany fahagagan̈a izy vo man̈ano hafa koa. Avio, koran̈iny Baiboly koa fa izikoa fa naty iro apostoly aby io, tapitry koa fan̈anaovan̈a fahagagan̈a. (1 Korintianina 13:8-10) Ke Zan̈ahary izioty zen̈y efa tsy mamaly vavaka eky? Tsy zen̈y foeky! Alo baka atsika hizaha, akory ataony Zan̈ahary mamaly vavakanolo.

Izy man̈amia fahendrena. Baka amy Jehovah fahendrena io. Izy tsy matity, ke lan̈iany olo tihahazo taridalan̈anany ndreky tihiain̈y mifan̈araka amizio, amezany fahendrena edy.​—Jakoba 1:5.

Jehovah man̈amia fan̈ahy masin̈y. Fan̈ahy masin̈y io angovo ampiasainy Zan̈ahary. Tsisy angovo mahery mandilatra izio. Mahavita man̈ampy atsika hiaritry raha mitsapa finoan̈antsika izio, avio man̈ampy atsika ho kalma, izikoa misy raha mampiasaloha atsika. Fan̈ahy masin̈y io koa man̈ampy atsika hanan̈a toetry tsara salakady mampatsaratsara. (Galatianina 5:22, 23) Jesosy nan̈amia toky pan̈aradia izy fa hamiany Zan̈ahary fan̈ahy masin̈y be iro.​—Lioka 11:13.

Zan̈ahary man̈amia fahaizan̈a lan̈iany olo mazoto mitady izy. (Asan’ny Apostoly 17:26, 27) Misy olo ten̈a mitady ny marin̈y fo erantany. Iro tihahay raha maro momba Zan̈ahary, karaha ataony azovy an̈arany Zan̈ahary, ino fikasan̈anany momba tany ndreky olombelon̈o, ndreky fomba mety an̈aton̈ana izy. (Jakoba 4:8) Matetiky Vavolombelon̈o Jehovah tojy olo karaha zen̈y, ke ravoravo iro man̈aboaka amindro olo aby io valiny fan̈ontanian̈a aby io amy Baiboly.

Tihahay raha momba Zan̈ahary anao matoa anao nangala gazety ty? Ke mety baka aminizy ty amaliany Zan̈ahary vavaka nataonao.