NANDXICHNO que xidal buñ rioladx gan ximod rarexa galrranabdiitz reʼ. Ma bienno que Dios racadiag tipnés oración, per diti guiráni. Per ¿sacadiagbu oración xtunyno la? Ma riaʼni en lóono.

Jesús diti bioladx mod buny oración guirá buñ ni gosanir ló religión: portín nosi bunyibu láani par guibiʼ stipnés que nigolú cayenyibu Dios. Goniʼyibu que guirá buñreʼ ma «cuaʼyibu ni non guicaʼyibu». Guirá buñreʼ diti goniiny nacadiag Dios layibu, xalagary ngú bunyibu láani par nabiʼ stipnés buñ ni cayonyibu, né ngúsi ni cuaʼyibu (Mateo 6:5). Né ngúca rac ló naareʼ. Xidal buñ órni ronyibu oración diti ronyibu pensary lóo Dios, xalagary ngú rioʼyibu galrrasaʼ por laʼsiyibu. Dios diti racadiag oración xtunyibu portín diti rasobyibu guirá consej ni sieed ló la Biblia mod ma bisuidyno ló artículo ni ma godudy.

¿Né xí labúu guinino de tigaagano? Par labúu guicadiag Jehová oración xtunyno, diti fuerspa gacno de toib color o de toib gudx. La Biblia ná: «Dios diti rabúbu buñ xalagary ngú, racacuentbu buñ ni nap respet láabu né ni rony xinésni nac nitisi nac xcudxyibu» (Hechos 10:​34, 35). Buñ ni nap respet Dios diti raniiny láabu gonybu cós ni labúu guisioʼob xcalnabany Dios. Buñ «ni rony xinésni» ronybu rutirigaʼlni láabu, gonybu xchiin Dios né diti ni nábu nili ni ná buñgudxlio. Por ngú, pal nainy lóono guicadiag Jehová oración xtunyno, non guisobno ni ná Xtiitzbu.

Xidal buñ rabés que Dios guicapy oración xtunybu né toib galrradziguiaʼ. Dada ló dzú ni see diti guirá ór buny Dios láani scú. Historia ni sieed ló la Biblia rasetlani que godudy xidal íz par cuapy Dios oración né toib galrradziguiaʼ. La Biblia ná que órni ma ñaity guirá apóstoles ma diti ñoʼ galrradziguiaʼ (1 Corintios 13:​8-10). Ndeʼ diti radudy diitz que Dios diti racapy guirá oración. Guisuidyno tipnés ejemplos ximod racapy Jehová láani ló naareʼ.

Radudybu sabiduría. Dios ni nac ro ralainy sabiduría radudybu láani guirá ni rayopy láabu né ni rony xtem guisob láabu (Santiago 1:5).

Radudybu espíritu santo. Diti noʼ chú rigaʼl espíritu santo, ndeʼ radudy diitz xcalnadip Dios. Racnéni lóono guicalóno prueby, radudyni paz lóono órni noʼno ló galrrasaʼ né racnéni lóono gapno tipnés cualidades sacróyen (Gálatas 5:​22, 23). Jesús bidudy xtiitz que Dios labúu guidudy midid espíritu santo ni caquiinno (Lucas 11:13).

Radudybu galnan ni rayopy galnigolú. Xomod ná Hechos 17:​26, 27, xidalguixo buñ ni noʼ ló guidopynac Gudxlio rayopy Dios. Nainy layibu ganyibu ximod laa Dios, ni ná Dios gony né Gudxlio né raniiny ganyibu ximod labúu guibigaxyibu ronoʼ Dios (Santiago 4:8). Testigos xtuny Jehová guirási ór radzelyibu buñ ni ná guimbu Dios né rioladxyibu guisuidyibu guirá buñreʼ.

¿Por ngú cuacuentlo revista reʼ la? ¿Cayopylo Dios la? Pal scú láani, sigory modreʼ cacapy Dios oración xtunylo.