Mga Magbabasa Nangutana . . .

Duna bay Faith Healing sa mga Saksi ni Jehova?

▪ Ang mga Saksi ni Jehova walay faith healing o milagrosong pagpang-ayo. Sama ni Jesus, sila nagtuo nga ang ilang pangunang misyon mao ang pagsangyaw sa maayong balita sa Gingharian sa Diyos. Gituohan usab nila nga ang matuod nga mga Kristohanon mailhan dili pinaagi sa milagrosong pagpang-ayo, kondili sa usa ka butang nga labi pa gayong hinungdanon.

Tinuod, ang pagpang-ayo ni Jesu-Kristo sa mga masakiton niadtong unang siglo C.E. dakog kahulogan kanatong tanan. Kadto maoy garantiya nga ubos sa iyang pagmando ingong Hari sa Gingharian sa Diyos, “walay pumoluyo nga moingon: ‘Ako masakiton.’”—Isaias 33:24.

Komosta sa atong panahon? Ang mga faith healer sa Kakristiyanohan ug sa uban pang relihiyon nangangkon nga sila makaayog masakiton sa milagrosong paagi. Apan, si Jesus hugot nga nagpasidaan batok sa mga tawong nangangkon nga “naghimog daghang milagro” pinaagi sa iyang ngalan. Siya nag-ingon: “Wala ako makaila kaninyo. Pahilayo kanako, kamong mga daotan ug binuhatan!” (Mateo 7:22, 23, Ang Biblia—Bag-ong Hubad nga Binisaya) Busa makaingon ba kita nga ang milagro nga gihimo sa mga faith healer karon pamatuod sa pag-uyon ug panalangin sa Diyos?

Tagda kon unsay giingon sa Bibliya bahin sa pagpang-ayo nga gihimo ni Jesus. Pinaagi sa pagtandi sa rekord sa Bibliya ug sa pamaagi sa mga faith healer, dali natong matino kon gikan ba sa Diyos ang milagrosong pagpang-ayo karon.

Si Jesus wala mang-ayo aron makaagnig daghang membro. Gani, daghan sa iyang gihimong pagpang-ayo wala niya himoa sa publiko. Daghan sa iyang gipang-ayo iyang giingnan nga dili kana ipanulti ngadto sa uban.—Lucas 5:13, 14.

Si Jesus wala magpabayad sa iyang gihimong mga milagro. (Mateo 10:8) Ang tanang masakiton nga miduol kaniya nangaayo, ug ang ilang pagkaayo wala mag-agad sa ilang pagtuo. (Lucas 6:19; Juan 5:5-9, 13) Nagbanhaw pa gani siyag patay!—Lucas 7:11-17; 8:40-56; Juan 11:38-44.

Bisan tuod si Jesus naghimog mga milagro, ang iyang ministeryo wala masentro sa pagpang-ayo aron makadanig mga membro. Hinunoa, ang iyang pangunang buluhaton mao ang pagwali sa maayong balita sa Gingharian. Iyang gibansay ang iyang mga sumusunod sa paghimog tinun-an aron tudloan ang uban bahin sa paglaom nga makabaton ug hingpit nga panglawas ilalom sa Gingharian sa Diyos.—Mateo 28:19, 20.

Tinuod, ang pipila sa mga sumusunod ni Jesus sa unang siglo may gasa sa pagpang-ayo, apan sa ulahi kini giwagtang. (1 Corinto 12:29, 30; 13:8, 13) Ang tinuod nga mga Kristohanon karon mailhan, dili tungod sa milagrosong pagpang-ayo, kondili tungod sa ilang masakripisyohong gugma alang sa usag usa. (Juan 13:35) Kana nga gugma dili makita diha sa mga membro sa relihiyon karon nga naghimog milagrosong pagpang-ayo.

Apan dunay grupo sa mga Kristohanon nga nahiusa pag-ayo sa gugma, nga gani dili mohimog daotan sa ilang isigka-Kristohanon o sa uban, bisan panahon sa mabangis nga mga gubat. Kinsa sila? Sila mao ang mga Saksi ni Jehova. Sa tibuok kalibotan, sila nailhan sa ilang Kristohanong gugma. Ang panaghiusa sa mga tawo nga lainlaig rasa, nasyonalidad, kultura, ug kagikan maoy usa ka milagro, nga nahimong posible tungod lamang sa balaang espiritu sa Diyos. Ikaw among gidapit sa pagtambong sa panagkatigom sa mga Saksi aron imo kanang makita.

[Hulagway sa panid 13]

Ang mga faith healer karong adlawa (makita sa tuo) tinuod bang gipaluyohan sa Diyos?