Tepet na Saray Manbabasa . . .

Wala Kasi Faith Healing ed Saray Tasi nen Jehova?

▪ Agbalot nan-faith healing iray Tasi nen Jehova. Singa si Jesus, panisiaan dan say manunan kimey da et say pangipulong ed maong a balita na Panarian na Dios. Panisiaan da met ya walay sananey ya importantin pakabidbiran ed saray tuan Kristiano, aliwan say faith healing.

Diad tua, samay maaron impamaabig nen Jesu-Kristo ed saray mansasakit nen inmunan siglo C.E. et importantin maong ed sikatayo natan. Gagarantiyaan na saman a diad panuley to bilang Ari ed Panarian na Dios, ‘anggapoy manaayam a mangibagan, Mabeblay ak.’​—Isaias 33:24.

Natan balet ey? Saray faith healer ed saray relihyon a mankuan a Kristiano tan ed arum nin relihyon et mangibabagan makakapanpaabig ira panamegley na milagro. Balet ta pinasakbayan a mismo nen Jesus iramay mankuan a ‘makakapanggawa iray milagro’ ed ngaran to. Imbaga ton: “Agta kayon balot kabat. Arawi kayo’d siak, sikayon managgaway kaugsan!” (Mateo 7:22, 23, Maung a Balita) Kanian, kasin saramay ibabaga ran milagro na saray faith healer natan et pakanengnengan ya aabobonan tan bebendisyonan na Dios so sakey a relihyon?

Nengnengen tayo pa so rekord na Biblia nipaakar ed saramay impamaabig nen Jesus. No ikompara tayo iratan ed gagawaen na saray faith healer natan, namoria tayon tampol no kasin say faith healing et nanlapud Dios.

Agbalot inusar nen Jesus so panagpaabig pian sagyaten so dakel ya totoo, diad ontan et ondakel so disipulo to. Imbes, dakel so pinaabig to ya ag-anengneng na karaklan. Dakel so pankanawnawan ingganggan to iramay pinaabig to ya agda itan ibabaga’d anggan siopa.​—Lucas 5:13, 14.

Agbalot nampabayar si Jesus ed saray milagro to. (Mateo 10:8) Tan agbalot pinmalpak. Amin ya mansasakit ya inmasingger ed sikato et inmabig, tan ag-akadepende so inyabig da ed no panon kabiskeg so pananisia ra. (Lucas 6:19; Juan 5:5-9, 13) Pinabilay ni ingen nen Jesus iray inaatey!​—Lucas 7:11-17; 8:40-56; Juan 11:38-44.

Anggano nanmilagro si Jesus, agto anagyat na saray totoon nakomberte to panamegley na maemosyon iran panagmilagro. Imbes, say manunan ginawa to et say pangipulong ed maong a balita na Panarian na Dios. Inorganisa nen Jesus iray patumbok to pian bangatan iray totoo, diad ontan et magmaliw iran disipulo to, tan saraya met so mangibangat ed arum nipaakar ed Panarian na Dios, a sano satan la so manuley et anggapo lay mansakit.​—Mateo 28:19, 20.

Tua, walaray patumbok nen Jesus nen inmunan siglo ya inikdan na Dios na abilidad a manpaabig, balet ta angangga la irayan abilidad. (1 Corinto 12:29, 30; 13:8, 13) Saray tuan Kristiano natan et nabidbir, aliwan diad panamegley na milagron panagpaabig, noagta diad masakripisyon aroan da. (Juan 13:35) Say faith healing ya gagawaen na totoo natan et ag-akapawala na saray Kristianon manaaroan a singa saksakey ya pamilya anggano nanlapu ra’d nanduruman bansa tan nanduruma met so apalabas da.

Anggaman ontan, walay sakey a grupo na saray Kristiano a mankakasakey ta malet so aroan da. Lapud satan et agda labay ya sakitan so sakey tan sakey tan anggan siopa, anggano grabe lay panlalaban na totoo’d kaliberliber da. Siopa iraya? Saray Tasi nen Jehova. Diad interon mundo et kabkabat ira lapud pangipapanengneng da na aro a singa ed samay aro nen Kristo. Nibagan milagro so pankakasakey na totoon nanlapud nanduruman bansa tan kultura, tan posible labat iya lapud masanton espiritu na Dios. Akin ta no salien moy onatendi ed pantitipon da pian napaneknekan mon mismo itan?

[Litrato ed pahina 13]

Kasin saray faith healer natan (singa ed sayay walad litrato) et talagan susuportaan na Dios?