Li jkʼel vunetike tskʼan tsnaʼik

¿Mi chpoxtavanik van ta xchʼunel oʼontonal li yajrextikotak Jeovae?

▪ Li yajrextikotak Jeovae mu xpoxtavanik jsetʼuk ta xchʼunel oʼontonal. Jech kʼuchaʼal Jesuse, snaʼojik lek ti yabtelik mas tsots skʼoplale jaʼ li xcholel lekil aʼyej sventa Ajvalilal yuʼun Diose. Jech xtok, snaʼojik lek ti kʼusi chichʼik-o ojtikinel li melel yajtsʼaklomtak Cristoe maʼuk li poxtael ta xchʼunel oʼontonale, yuʼun oy kʼusi yan ti mas tsots skʼoplale.

Melel onoʼox, ta skoj ti oy xkʼuxul yoʼonton li Jesuse la xpoxtaan krixchanoetik li ta baʼyel sigloe. Ta melel, toj tsots skʼoplal sventa jkotoltik maʼ taje, yuʼun chakʼ jchʼuntik ta melel ti kʼalal mi lik ajvalilajuk tal ta balumil li Jesuse, muʼyuk xa buchʼu ti «toj ipun», xie (Isaías 33:24).

Pe ¿kʼusi xuʼ xkaltik ta sventa li poxtaeletik ta xchʼunel oʼontonal avie? Li buchʼutik tskuy sbaik ta yajtsʼaklom Cristo ti chpoxtavanik ta xchʼunel oʼontonale xchiʼuk li yantik relijionetike, chalik ti chpoxtavanik ta skʼelobil juʼelale. Pe li Jesuse laj yal ti chlokʼ talel krixchanoetik ti ta spasik ep skʼelobil tsatsal ta sbie, jech xtok laj yal ti xi chalanbee: «Me jutuc muʼyuc bu laj cotquinoxuc. Vocʼo abaic ta jtojol; yuʼun jaʼ laj apasic li cʼusi chopole» (Mateo 7:22, 23). Vaʼun chaʼa, ¿mi lek van chil Dios o mi jaʼ van ta sjuʼel tspasik li buchʼutik chpoxtavanik ta skʼelobil juʼelale?

Jkʼeltik kʼusi chal Vivlia ta sventa ti kʼuyelan poxtavan li Jesuse xchiʼuk ti kʼuyelan chpoxtavanik li avie. Jaʼ jech chkakʼtik venta mi ta sjuʼel Dios tspasik li buchʼutik chpoxtavanik avie.

Baʼyel, li Jesuse muʼyuk poxtavan sventa noʼox tstsob svinik o sventa chikʼ talel li krixchanoetike. Yuʼun ep ta veltae ta mukul la spas li skʼelobiltak juʼelale. Ep ta velta xtoke, laj yalanbe ti muʼyuk buchʼu xalbeik ti laj yichʼik poxtaele (Lucas 5:13, 14).

Xchibal, li Jesuse muʼyuk la skʼan stojol kʼalal poxtavane (Mateo 10:8). Jech xtok, yuʼun la xpoxtaan lek skotol li buchʼutik kʼanbat koltaele. Naka lek chkʼot ta pasel yuʼun skotol kʼalal chpoxtavane, manchuk mi oy o mi muʼyuk xchʼunel yoʼonton li krixchanoetike (Lucas 6:19; Juan 5:5-9, 13). Maʼuk noʼox taje, yuʼun jlome la xchaʼkuxesan xtok (Lucas 7:11-17; 8:40-56; Juan 11:38-44).

Akʼo mi la spas skʼelobiltak juʼelal li Jesuse, maʼuk sventa tskʼan tsta sviniktak o ti labaluk xa x-ilat ta skoj ti chpoxta jchameletike. Li kʼusi mas tsots skʼoplal laj yaʼie jaʼ ti chchol batel li lekil aʼyeje. Jaʼ yuʼun, la xchapan li yajtsʼaklomtak sventa tspasik batel ta yajtsʼaklomtak Cristo li krixchanoetike xchiʼuk ti xakʼik ta chanel ti chʼabal xa buchʼu ch-ipaj kʼalal mi lik spas mantal li Ajvalilal yuʼun Diose (Mateo 28:19, 20).

Jnaʼojtik lek ti laj noʼox skʼoplal li kʼusitik toj labalik sba la spasik li yajtsʼaklomtak Cristo ta baʼyel sigloe, jech kʼuchaʼal ti chpoxtavanik toʼox ta skʼelobil juʼelale (1 Corintios 12:29, 30; 13:8, 13). Li melel yajtsʼaklomtak Cristo ta jkʼakʼaliltike maʼuk ojtikinbilik-o ta skoj ti chpoxtavanike, moʼoj, jaʼ ojtikinbilik-o ta skoj ti skʼanoj sbaik ta melele (Juan 13:34, 35). Mi junuk poxtael ta skʼelobil juʼelal xuʼ stsob sba yuʼun yajtsʼaklomtak Cristo ti jeltos stsʼunbalike xchiʼuk ti yutsʼ yalal xa chaʼi sbaike.

Vaʼun chaʼa, li yajrextikotak Jeovae jmoj oyik ta skoj ti skʼanoj sbaik tajeke, jaʼ yuʼun muʼyuk ta yoʼontonik ti chilbajin li yermanotakike xchiʼuk li yan krixchanoetike, akʼo mi jaʼo kʼalal tsots tajek tsaʼik kʼop li krixchanoetike. Ta spʼejel Balumil ojtikinbilik ti skʼanoj sbaik jech kʼuchaʼal chkʼanvan li Cristoe. Mi junuk skʼelobil juʼelal stsob yuʼun krixchanoetik ti jeltos stsʼunbalike, slumalike, stalel xkuxlejalik o ti yantik-o skʼopike. Taje jaʼ noʼox spas yuʼun li xchʼul espiritu Diose. ¿Kʼu yuʼun mu xa bat li bu tstsob sbaik li yajrextikotak Jeova sventa xavakʼ venta atuke?

[Lokʼol ta pajina 21]

¿Mi ta sjuʼel Dios tspasik li buchʼutik chpoxtavanik ta xchʼunel oʼontonal avie?