O ka Lwantšha Bjang Maikwelo a Fošagetšego?

NA O fela o e-ba le maikwelo a fošagetšego? Ge e le gabotse, ke mang yo a sa felego a e-ba le ona? Dinako tšeo re phelago go tšona di swawa ka mathata a tša boiphedišo, go tlala ga bošoro le go hloka toka mo go sa laolegego. Ga go makatše ge batho ba sa balegego ba nyamile kudu, ba ikwa ba le molato ka mo go feteletšego le go ikwa ba se bohlokwa.

Maikwelo a bjalo a ka ba kotsi. A ka phuhlamiša go ipota ga rena, a senya bokgoni bja rena bja go bea mabaka le go re amoga lethabo. Beibele e re: “X’O nôlêxa môkô mohla wa tlalêlô, xôna matla ’axo xa se a selô.” (Diema 24:10) Re tsoma matla a rena le mafolofolo a rena e le gore re tšwele pele ka bophelo mo lefaseng le le nago le mathata. Ka baka leo, go bohlokwa gore re laole maikwelo ao a fošagetšego. *

Beibele e bontšha ditsela tše matla tša go lwantšha maikwelo a fošagetšego. Jehofa Modimo, Mmopi le Mothekgi wa bophelo ka moka, ga a nyake gore o langwe ge o ikwa o hloka kholofelo. (Psalme 36:9) Ka gona, a re eleng hloko ditsela tše tharo tšeo ka tšona Lentšu la gagwe le ka re thušago go lwantšha maikwelo a fošagetšego.

Lemoga Gore Modimo o na le Taba le Wena

Batho ba bangwe ba nagana gore Modimo o swaregile kudu ka dilo tše dingwe moo e lego gore ga a hlokomele maikwelo a bona. Na o ikwa ka tsela yeo? Ge e le gabotse, Beibele e re kgonthišetša gore Mmopi o tshwenyega ka maikwelo a rena. Mopsalme o itše: “Morêna ó kxaufsi le ba ’pelo di rôbexilexo; ó phološa meôya e kxobetsi.” (Psalme 34:18) Ke mo go homotšago gakaakang go tseba gore Mmuši yo matla-ohle o kgaufsi le rena ge re gateletšegile!

Modimo o na le maikwelo e bile ga a kgole le rena. Beibele e re “Modimo ke lerato.” (1 Johane 4:8) O rata batho e bile o tshwenyegile ka bao ba tlaišegago. Ka mohlala, ge Baisiraele ba be ba le bothopša Egipita nywaga e ka bago e 3 500 e fetilego, o itše: “Mahloko a sethšaba sa-ka se se lexo kwa Egipita ke a bone; ke ba kwile xe ba xôlôla ka ’baka la baxapeletši ba bôná; ruri, ditlaišêxô tša bôná ke a di tseba. Byale ke tletše tšôna, xore ke ba namolêlê.”—Ekisodo 3:7, 8, mongwalo o sekamego ke wa rena.

Modimo o tseba kagego ya maikwelo a rena gabotse. Go ba gona, “ké Yêna a re dirilexo; xa r’a itira.” (Psalme 100:3) Ka gona, gaešita le ge re bona eka batho ba bangwe ga ba re kwešiše, re ka kgodišega gore Modimo o a re kwešiša. Lentšu la Modimo le re: “Tsela yeo motho a bonago ka yona ga se yeo Modimo a bonago ka yona, ka gobane motho o bona ponagalo ya ka ntle; eupša Jehofa yena o bona dipelo.” (1 Samuele 16:7, NW) Modimo o tseba gaešita le maikwelo a rena a ka gare-gare.

Ke therešo gore Jehofa o lemoga le diphošo tša rena gotee le mafokodi a rena. Eupša re ka leboga gore Mmopi wa rena yo lerato ke molebaledi. Mongwadi wa Beibele yo a buduletšwego e lego Dafida o itše: “Morêna ó šôkêlwa ba ba mmoifaxo byalo ka tata xo bana xe a xauxêla bana b’axwe. Xobane Yena ó tseba lebopô le re lexo ka lôna, xa a lebale xe re le lerole.” (Psalme 103:13, 14) Modimo o re bona ka tsela yeo re ka bago re sa ipone ka yona. O lebelela botse gomme a phaela bobe ka thoko, ge feela re itshola dibeng tša rena.—Psalme 139:1-3, 23, 24.

 Ka baka leo, ge re hlaselwa ke maikwelo a go ipona re se bohlokwa, re swanetše go ikemišetša go itwela. Re swanetše go gopola kamoo Modimo a re lebelelago ka gona!—1 Johane 3:20.

Hlagolela Bogwera bja Kgaufsi le Modimo

Re holega bjang ge re ipona ka mokgwa woo Modimo a re bonago ka wona? Re tla nolofalelwa ke go gata mogato wa bobedi wa go lebeletšana le maikwelo a fošagetšego—go aga bogwera bja kgaufsi le Modimo. Na ruri seo se a kgonega?

Bjalo ka Tate yo lerato, Jehofa Modimo o fagahletše go re thuša gore re be le bogwera bja kgaufsi le yena. Beibele e re kgothatša ka gore: “Batamelang Modimo, gomme o tla le batamela.” (Jakobo 4:8) Therešo e makatšago še: Gaešita le ge re fokola e bile re le e-na le sebe, re ka aga bogwera bjo borutho le Mmuši wa legohle.

Modimo o ikutolotše ka Beibeleng e le gore re ka mo tseba e le motho. Ka go bala Beibele ka mehla, re ka ithuta mabapi le dika tše di gogelago tša Modimo. * Ge re dutše re naganišiša ka tsebo yeo, re tla ikwa re batametše Jehofa kudu. Re tla mmona ka mokgwa woo a lego ka wona e le ruri—Tate yo lerato le yo a kwelago bohloko.

Go nagana ka mo go tseneletšego ka seo re se balago ka Beibeleng go sa dutše go re hola kudu. Re batamela Tatago rena wa legodimong kudu ge re tsenya dikgopolo tša gagwe ka menaganong ya rena le ka dipelong tša rena, re di dumelela go re phošolla, go re kgothatša le go re hlahla. Re swanetše go dira bjalo kudu ge re katana le dikgopolo le maikwelo ao a ka re huduago goba a re hlokiša boroko. Mopsalme o e bea ka tsela ye: “Ge ke be ke imelwa ke dipelaelo, o nkhomoditše wa ba wa dira gore ke ikwe ke bolokegile.” (Psalme 94:19, Contemporary English Version) Lentšu la Modimo le ka nea khomotšo ka tekanyo e kgolo. Ge e ba re amogela molaetša wa therešo ka boikokobetšo, re ka lemoga gore maikwelo a rena a fošagetšego ganyenyane-ganyenyane a tšeelwa legato ke khomotšo le khutšo tšeo di newago ke Modimo feela. Ka go rialo, Jehofa o re kgothatša bjalo ka ge motswadi yo lerato a kgothatša ngwana yo a kwago bohloko goba yo a nyamilego.

Sephiri se sengwe sa go ba mogwera wa Modimo se akaretša go bolela le yena ka mehla. Beibele e bile e re kgonthišetša ka gore “go sa šetšwe seo re se kgopelago go ya ka thato ya gagwe, [Modimo] o a re kwa.” (1 Johane 5:14) Go sa šetšwe gore re na le dipoifo goba dipelaelo dife, re ka rapela Modimo gomme ra mo kgopela thušo. Ge re ka tšhollela Modimo sa mafahleng, re tla ba le khutšo ya monagano. Moapostola Paulo o ngwadile gore: “Dilong tšohle tsebišang Modimo dikgopelo tša lena ka thapelo le ka topo gotee le ka go leboga; gomme khutšo ya Modimo ye  e fetago kgopolo yohle e tla diša dipelo tša lena le matla a lena a monagano ka Kriste Jesu.”—Bafilipi 4:6, 7.

Ge o dutše o kgomarela lenaneo la go bala Beibele, go naganišiša le thapelo, ka ntle le pelaelo o tla lemoga gore o aga tswalano ya kgaufsi le Tatago wa legodimong. Tswalano yeo ke sebetša se matla seo o ka se dirišago malebana le maikwelo a fošagetšego. Ke’ng se sengwe seo se ka thušago?

Tsepelela Kholofelong e Kgonthišeditšwego ya Bokamoso

Gaešita le ge re le ka tlase ga maemo a thata kudu, re ka bea monagano wa rena dilong tše dibotse. Bjang? Modimo o re nea kholofelo e kgonthišeditšwego ya bokamoso. Moapostola Petro o akareditše kholofelo ye yeo e kgahlišago ka mantšu a: “Go na le magodimo a mafsa le lefase le lefsa tše re di letetšego go ya ka kholofetšo ya [Modimo], gomme toko e tla aga go tšona.” (2 Petro 3:13) Seo se bolela’ng?

Polelwana e rego “magodimo a mafsa” ge e le gabotse e šupa go mmušo—Mmušo wa Modimo wa legodimong wo Jesu Kriste e lego kgoši ya wona. “Lefase le lefsa” ke lekoko le lefsa la batho mo lefaseng bao ba amogelwago ke Modimo. Ka tlase ga pušo ya “magodimo a mafsa,” lekoko le lefsa la batho ba lefaseng le tla ba le se na dilo tšeo di bakago maikwelo a fošagetšego. Ge e le mabapi le batho ba botegago bao ba tla bago ba phela ka nako yeo, Beibele e re kgonthišetša gore Modimo “o tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”—Kutollo 21:4.

Ka ntle le pelaelo o ka dumela gore dikgopolo tšeo di a kgahliša e bile di a kgothatša. Ke ka baka leo Beibele e bolelago ka ditebelelo tša bokamoso tšeo Modimo a di neilego Bakriste ba therešo e le “kholofelo e thabišago.” (Tito 2:13) Ge e ba re tsepelela dikholofetšong tša Modimo tša bokamoso bja batho—le lebaka leo ka lona  dikholofetšo tšeo di ka botwago e bile di kgonthišeditšwego—re phaela ka thoko dikgopolo tše di fošagetšego.—Bafilipi 4:8.

Beibele e bapetša kholofelo ya rena ya phološo le kefa. (1 Bathesalonika 5:8) Mehleng ya bogologolo, lešole le be le ka se leke go tsenela ntwa le se la rwala kefa ya lona. Le be le tseba gore e be e tla dira gore ge le bethwa hlogo le se ke la kwa bohloko e bile e be e tla aroša mesebe ntle le kgobalo. Bjalo ka ge kefa e šireletša hlogo, kholofelo le yona e šireletša monagano. Go dula re nagana ka dilo tšeo di re tlatšago ka kholofelo go ka dira gore re se ke ra ba le dikgopolo tše di fošagetšego, tša poifo le tša go hloka kholofelo.

Ka gona, go lwantša maikwelo a fošagetšego go a kgonega. O ka kgona! Naganišiša ka tsela yeo Modimo a go lebelelago ka yona, batamela go yena gomme o tsepelele kholofelong ya gago ya bokamoso. Ke moka o tla kgodišega gore o tla bona nako yeo ka yona maikwelo a fošagetšego a se sa hlwago a le gona!—Psalme 37:29.

[Mengwalo ya tlase]

[Ntlhakgolo go letlakala 19]

“Ruri, ditlaišêxô tša bôná ke a di tseba.”—EKISODO 3:7, 8

[Ntlhakgolo go letlakala 20]

“Ge ke be ke imelwa ke dipelaelo, o nkhomoditše wa ba wa dira gore ke ikwe ke bolokegile.”—PSALME 94:19, CONTEMPORARY ENGLISH VERSION

[Ntlhakgolo go letlakala 21]

“Khutšo ya Modimo ye e fetago kgopolo yohle e tla diša dipelo tša lena le matla a lena a monagano.”—BAFILIPI 4:7

[Lepokisi/​Seswantšho go letlakala 20, 21]

Mangwalo a Homotšago a Mabapi le Jehofa Modimo

“Morêna, Modimo yo mabobo le kxauxêlô, wa xo se fêlê pelo, wa botho byo boxolo le therešô.”—EKISODO 34:6.

“Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.”—2 KORONIKA 16:9.

“Morêna ó kxaufsi le ba ’pelo di rôbexilexo; ó phološa meôya e kxobetsi.”—PSALME 34:18.

“Wene Morêna O yo botho, O molebaledi.”—PSALME 86:5.

“Morêna ké mo-setša-bohle, kxauxêlô ya xaxwe e ukametše tšohle tše a di dirilexo.”—PSALME 145:9.

“Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo!”—JESAYA 41:13.

“Go tumišwe . . . Tate wa dikgaugelo tše bonolo le Modimo wa khomotšo yohle.”—2 BAKORINTHE 1:3.

“Re tla kgonthiša dipelo tša rena pele ga gagwe ge e le mabapi le eng le eng yeo dipelo tša rena di re ahlolago go yona, gobane Modimo ke yo mogolo go feta dipelo tša rena gomme o tseba dilo tšohle.”—1 JOHANE 3:19, 20.

[Lepokisi/​Seswantšho go letlakala 22]

Ba Lebeletšana ka Katlego le Maikwelo a Fošagetšego

“Tate o lemaletše bjala, gomme o mpaketše tlaišego e kgolo. Ke na le nako e telele ke tletše ka maikwelo a go ipona ke se motho wa selo. Eupša ge ke be ke dumela go ithuta Beibele le yo mongwe wa Dihlatse tša Jehofa, ke ile ka ithuta mabapi le kholofetšo ya bophelo bjo bo sa felego mo lefaseng. Kholofelo ye e ile ya tlatša monagano wa-ka le pelo ya-ka lethabo. Go bala Beibele e bile karolo ya ka mehla ya bophelo bja-ka. Ke dula ke swere Beibele. Ge ke ikwa ke imelwa ke maikwelo a fošagetšego, ke a e tšea gomme ka bala mangwalo a homotšago. Go bala ka dika tša Modimo tše di gogelago go nnea kgonthišetšo ya gore ke bohlokwa mahlong a gagwe.”—Kátia, mosadi wa nywaga e 33. *

“Ke be ke lemaletše bjala, patše, cocaine, crack cocaine e bile ke kgoga le sekgomaretši (glue). Ka ge ke lahlegetšwe ke mo e nyakilego go ba dilo ka moka tšeo ke bego ke e-na le tšona, ke ile ka thoma go ba mokgopedi. Eupša ka morago ga go dumela go ithuta Beibele le Dihlatse tša Jehofa, ke ile ka fetoša bophelo bja-ka ka mo go feletšego. Ke ile ka thoma go tseba Modimo bjalo ka Motho. Gaešita le ge ke sa swanetšwe ke go lwantšhana le maikwelo a go ipona molato le go ipona ke se motho wa selo, ke ithutile go ithekga ka kgaugelo ya Modimo le botho bja gagwe bjo lerato. Ke kgonthišegile gore Modimo o tla tšwela pele a mpha matla a go fenya maikwelo a-ka a fošagetšego. Go tseba therešo ya Beibele ke selo se kaone-kaone seo se diregilego bophelong bja-ka.”—Renato, monna wa nywaga e 37.

“Ke be ke fela ke ipapetša le mogolwake go tloga ke sa le yo monyenyane. Ke be ke dula ke ikwa ke nyatšega. Ke sa dutše ke ikwa ke sa bolokega, e bile ke belaela bokgoni bja-ka. Eupša ke ikemišeditše go fenya ntwa ye. Ke rapetše Jehofa ka mehla, gomme o nthušitše go fenya maikwelo a-ka a go ipona ke sa kgone selo. Ke mo go ruthetšago pelo go tseba gore Modimo o tloga a nthata e bile o a ntlhokomela!”—Roberta, mosadi wa nywaga e 45.

[Mongwalo wa tlase]