‘Uumfwa Ipepo’
Palameni Kuli Lesa
‘Uumfwa Ipepo’
BUSHE cine cine Yehova Lesa alasuka amapepo ya babomfi bakwe abaipeelesha ayo bapepa ukufuma pa nshi ya mutima? Ilyashi lya mu Baibolo ililanda pa muntu uo tushaishiba sana, Yabese, lilanga ukuti cine cine Yehova ‘alomfwa ipepo.’ (Amalumbo 65:2) Ili lyashi ilipi lisangwa apo tushingenekela ukulisanga. Lisangwa pa mitande ya ndupwa sha bantu ishalandwapo mu fipandwa fya kubalilapo ifya mwi buuku lya 1 Imilandu. Natulande pa mashiwi yaba pali 1 Imilandu 4:9, 10.
Ifyalandwa muli ifi fikomo fibili e fyo twaishibapo fye pali Yabese. Ukulingana ne cikomo 9, nyina “e wamwinike ishina lya kuti Yabese, no kutila: ‘Namufyalila mu kucula.’” * Cinshi amwinikile ili shina? Bushe ni pa mulandu wa kuti aliculile sana pa kupaapa uyu mwana ukucila ifyo aculile pa bana bambi? Bushe nalimo ali ni mukamfwilwa, kabili aleilishanya ukuti umulume wakwe uwali no kupokelela umwana uwafyelwe alifwile? Kwena Baibolo tayalandapo. Nomba kwali no kuba inshita ilyo Yabese ali no kulenga nyina ukuba sana ne nsansa. Bamunyina kwa Yabese bafwile bali balungami, lelo “Yabese balimucindike sana ukucila bamunyina.”
Yabese alepepa sana kuli Lesa. Ilyo alepepa, abalilepo ukulomba ukuti Lesa amupaale. Lyena alombele ifintu fitatu ifilangilila ukuti ali ne citetekelo icakosa.
Intanshi, alombele Lesa ukuti: ‘Kusheni icalo candi.’ (Icikomo 10) Yabese ali uwacindikwa, talepokolola impanga sha bene, nelyo ukukumbwa ifya bambi. Ifyo alelomba fifwile fyakumine sana ifyo alefwaya ukuti ficitike ku bantu, tafyakumine sana icalo cakwe. Afwile alelomba ukuti umutende ufule mu calo cakwe pa kuti abantu abengi balepepa Lesa wa cine. *
Ica bubili, Yabese alombele ukuti “ukuboko” kwa kwa Lesa kube pali ena. Ukuboko kwa kwa Lesa ukwa mampalanya, maka yakwe ayo abomfya ku kwafwa bakapepa bakwe. (1 Imilandu 29:12) Pa kuti apokelele ifyo alombele, Yabese acetekele Lesa uwafwa bonse abamucetekela.—Esaya 59:1.
Ica butatu, Yabese apepele ukuti: ‘Ncingilileni ku fibi, pa kuti tafimponene.’ Amashiwi ya kuti “pa kuti tafimponene” yalangilila ukuti Yabese talelomba ukuti ifyabipa fikamucitikila, lelo alelomba ukuti bamucingilile pa kuti elaba sana no bulanda ilyo ifyabipa fyacitika nelyo pa kuti ifyabipa fimunasha.
Ipepo Yabese apepele lilanga ukuti alibikile sana amano ku kupepa kwa cine kabili alicetekele Lesa, uumfwa ipepo. Bushe Yehova alimwaswike? Ili lyashi ilipi lipwa na mashiwi ya kuti: “Awe, Lesa alimucitiile ifyo alombele.”
Lesa, uumfwa ipepo, taaluka. Alatemwa ukukutika ku mapepo ya bantu bakwe. Bonse abamutetekela no kumucetekela balishininkisha ukuti: “Conse ico twalomba, cikulu fye nacilingana no kufwaya kwakwe, alatumfwa.”—1 Yohane 5:14.
[Amafutunoti]
^ para. 5 Ishina lya kuti Yabese lyafuma kwi shiwi ilipilibula ukuti “ukukalipwa.”
^ para. 7 Baibolo ya Targum, Amalembo ya Mushilo ayo abaYuda bayangwishe sana pa kupilibula, yapilibula amashiwi Yabese alandile ukuti: “Mumpaale nkwate abana abengi, kabili kusheni imipaka yandi no kulenga abasambi bafule.”