Ang “Tigpatalinghog sa Pag-ampo”
Pakigsuod sa Diyos
Ang “Tigpatalinghog sa Pag-ampo”
DUNGGON ba gayod ni Jehova nga Diyos ang kinasingkasing nga pag-ampo sa iyang debotadong mga magsisimba? Ang asoy sa Bibliya bahin sa usa ka wala kaayo mailhing tawo nga ginganlag Jabez nagpakita nga si Jehova “Tigpatalinghog sa pag-ampo.” (Salmo 65:2) Kining mubong asoy mabasa sa talaan sa mga kagikan diha sa Unang Cronicas. Atong hisgotan ang 1 Cronicas 4:9, 10.
Ang tanang impormasyon bahin kang Jabez mabasa diha lamang nianang duha ka bersikulo. Sumala sa bersikulo 9, ang iyang inahan “nagtawag sa iyang ngalan nga Jabez, nga nag-ingon: ‘Gipanganak ko siya sa kasakit.’” a Nganong ang inahan ni Jabez mipili man nianang ngalana? Tungod ba kay siya nalisdan pag-ayo sa pagpanganak kaniya? O dili ba kaha kay balo siya ug naguol pag-ayo kay wala ang iyang bana sa dihang siya nanganak? Kana wala hisgoti sa Bibliya. Apan tingali may panahon ra nga kini nga inahan magmapasigarbohon kaayo sa iyang anak. Ang mga igsoon ni Jabez lagmit matarong nga mga tawo, apan “si Jabez nahimong mas dungganon kay sa iyang mga igsoong lalaki.”
Si Jabez mainampoon nga tawo. Sa sinugdanan sa iyang pag-ampo siya naghangyo sa panalangin sa Diyos. Dayon mihangyo siyag tulo ka butang nga nagpakita sa iyang lig-ong pagtuo sa Diyos.
Una, si Jabez mihangyo: ‘Padak-a ang akong teritoryo.’ (Bersikulo 10) Kining dungganong tawo dili hakog, nga gustong mangilog sa yuta sa uban. Lagmit ang iyang hangyo maoy may kalabotan sa mga tawo, dili sa yuta. Tingali siya naghangyo nga padak-an ni Jehova ang iyang teritoryo sa malinawong paagi aron mas daghang magsisimba sa matuod nga Diyos ang makapuyo. b
Ikaduha, si Jabez mihangyo nga ang “kamot” sa Diyos magauban kaniya. Ang simbolikong kamot sa Diyos mao ang iyang gahom, nga gigamit niya sa pagtabang sa iyang mga magsisimba. (1 Cronicas 29:12) Aron dunggon ang iyang mga hangyo, si Jabez misalig sa Diyos kansang kamot dili mubo ngadto sa nagpasundayag ug pagtuo kaniya.—Isaias 59:1.
Ikatulo, si Jabez miampo: ‘Tipigi gayod ako gikan sa kadaotan, aron kini dili makadaot kanako.’ Ang pamulong nga “aron kini dili makadaot kanako” wala magpasabot nga buot niyang makalikay sa kadaot kondili aron maantos niya ang tanang pagkadaotan.
Ang pag-ampo ni Jabez nagpakita sa iyang pagpabili sa matuod nga pagsimba ug sa iyang pagtuo ug pagsalig sa Tigpatalinghog sa pag-ampo. Unsay sanong ni Jehova? Ang hinapos nga mga pulong niining mubong asoy nagkanayon: “Gihatag sa Diyos ang iyang gipangayo.”
Ang Tigpatalinghog sa pag-ampo wala mausab. Siya malipay sa pagpamati sa pag-ampo sa iyang mga magsisimba. Kadtong motuo ug mosalig kaniya makaseguro niini: “Bisan unsay atong pangayoon sumala sa iyang kabubut-on, siya magpatalinghog kanato.”—1 Juan 5:14.
[Mga footnote]
a Ang ngalang Jabez naggikan sa pulong nga nagkahulogang “kasakit.”
b Ang Targum, ang kaugalingong bersiyon sa mga Hudiyo sa Sagradong mga Kasulatan, naghubad sa giingon ni Jabez: “Hatagi kog mga anak, ug padak-a ang akong teritoryo aron kapuy-an sa daghang magsisimba.”