‘Enye Emi Okopde Akam’
San̄a Kpere Abasi
‘Enye Emi Okopde Akam’
NDI Jehovah Abasi esinen̄ede okop akam ofụri esịt mbon oro ẹtuakde ibuot ẹnọ enye? Mbụk Bible emi aban̄ade ete kiet oro owo mînen̄ekede ifiọk, emi ekerede Jabez, owụt ke Jehovah enen̄ede edi “[Enye] emi okopde akam.” (Psalm 65:2) Ẹkụt mbụk emi ke ebiet emi owo mîkpodorike enyịn ndikụt—ke ufọt enyịn̄ ubon ke ntọn̄ọ ntọn̄ọ Akpa Chronicles. Ẹyak ineme 1 Chronicles 4:9, 10.
Ikụt kpukpru se ifiọkde iban̄a Jabez ke ufan̄ikọ iba emi kpọt. Ufan̄ikọ 9 ọdọhọ ke eka esie “[okosio] enye enyịn̄ Jabez, ete, koro mmande enye ke ubiak.” * Ntak emi enye ekemekde utọ enyịn̄ oro? Ndi ubiak uman eyen emi ama abiak enye akan nte uman esibiakde owo? Ndi enye ekedi ebeakpa, ke ntre eseme ke ebe imọ ikodụhe nditiene ndara eyen emi? Bible itịn̄ke. Edi nte ini akakade, eka eyen emi ama edinyene ntak ndibụre mbụre mban̄a eyen emi. Ekeme ndidi nditọeka Jabez ẹkedi nti owo, edi “Jabez [ama] enyene ukpono akan nditọ-ete esie.”
Jabez ekedi owo emi amade ndibọn̄ akam. Enye ọkọtọn̄ọ akam esie ke ndiben̄e edidiọn̄ Abasi. Ekem enye ama eben̄e n̄kpọ ita emi ẹwụtde ke enye ama enen̄ede enyene mbuọtidem.
Akpa, Jabez ama eben̄e Abasi ete: “[Nam] adan̄a mi okpon.” (Ufan̄ikọ 10) Owo emi ekenyenede ukpono mi ikedịghe owo emi esinyan̄ade isọn̄, emi okoyomde se inyenede mbon en̄wen. Etie nte eben̄e ofụri esịt esie emi akaban̄a mme owo utu ke isọn̄. Ekeme ndidi enye ekeben̄e ete ẹnam adan̄a esie okpon ke emem emem usụn̄ man mme andituak ibuot nnọ ata Abasi ẹkpewak. *
Ọyọhọ iba, Jabez ama eben̄e ete “ubọk” Abasi odu ye imọ. Ndamban̄a ubọk Abasi edi odudu esie emi enye esidade an̄wam mme andituak ibuot nnọ enye. (1 Chronicles 29:12) Man Jabez ọbọ se enye ekeben̄ede, enye okodori enyịn ke Abasi emi ubọk esie mîmụhọke ikan nte enye anyan̄ade mbon oro ẹbuọtde idem ye enye.—Isaiah 59:1.
Ọyọhọ ita, Jabez ekeben̄e ete: “[Kpan] idiọk-n̄kpọ, ete okûyat mi!” Ikọ oro “ete okûyat mi” ekeme ndiwọrọ ke Jabez ikeben̄eke ete imọ ibọhọ afanikọn̄, edi ekeben̄e ete ẹkpeme imọ mbak idifụhọ m̀mê mbak utịp idiọkn̄kpọ edikan imọ ubọk.
Akam Jabez owụt nte enye ekekerede aban̄a utuakibuot akpanikọ ye mbuọtidem oro enye ekenyenede ke idem Andikop akam. Nso ke Jehovah akanam? Ẹda ibio ibio mbụk emi ẹkeberi ntem: “Ndien Abasi ada se enye ekeben̄ede ọsọk enye.”
Andikop akam ikpụhọkede. Enye esima ndikop akam mme andituak ibuot nnọ enye. Mbon oro ẹbuọtde idem ye enye ẹkeme nditịm nnịm ikọ emi: “Se ededi oro nnyịn iben̄ede ekekem ye uduak esie, enye ọbiọn̄ utọn̄ ke eben̄e nnyịn.”—1 John 5:14.
[Mme Ikọ Idakisọn̄]
^ ikp. 5 Enyịn̄ oro Jabez oto ikọ emi ekemede ndiwọrọ “ubiak.”
^ ikp. 7 Targum, Edisana N̄wed Abasi mme Jew emi ẹfiakde ẹwet ke usụn̄ en̄wen, ewet ikọ Jabez ntem: “Nọ mi ediwak nditọ, nyụn̄ nam adan̄a mi atara ye ediwak mbet.”