Dri “Roñjake Jar” Ko
Druaklok Ñan Anij
Dri “Roñjake Jar” Ko
1 KRONIKEL 4:9, 10
JEOVA Anij ej ke uake jar ko an dri karejar ro an retiljek? Juõn bwebwenato ilo Baibel eo kin juõn eman etan Jebez, eo im jejjab lukkun jelã kajen, ej kwalok bwe Jeova ej dri “Roñjake jar” ko. (Sam 65:2) Bwebwenato in ekadu ej walok ilo juõn jikin jejjab kõtõmene bwe en kar bed ie, ibwiljin lajrakin menmenbwij eo im ej walok ilo jinoin book in Juõn Kronikel. Jen etale 1 Kronikel 4:9, 10.
Erkein ej eon ko wõt im rej kwalok kin Jebez. Ekkar ñan eon 9, jinen ear “naetan Jebez, im ba, Bwe I ar keutak e kin buromõj.” * Etke ear kãlet ãt in? Melelen ke bwe ear lukkun lap an iñtan ke ear keutak e? Ak emaroñ ke bwe ear juõn kõrã ejako belen, im ej buromõj bwe leo belen ear jab maroñ bed ilo ien eo ke ladrik eo nejiiro ej lotak? Eokwe Baibel eo ejjab ba. Bõtab enaj wor juõn ien kõrã in enaj loudriñdriñ kin ladrik in nejin. Ro jein im jatin Jebez remaroñ kar jet armij ro remmõn, bõtab “Jebez e ar utiej jen ro jein im jãtin.”
Jebez ear juõn eo eniknik ilo jar. Ear jino jar eo an ilo an eowore Anij bwe en kejerammõn e. Inem ear kwalok jilu kajitõk ko im rar kalikar bwe ekajur tõmak eo an.
Mokta, Jebez ear eowore Anij im ba: “Kalaplok tõreren [ene] eo aõ.” (Eon 10) Jebez ear juõn armij emmõn im ear jab juõn eo ekibbon ilo an ankwõnaki brij ko an armij ro jet. Kajitõk eo an emaroñ kar kin armij ro im jab kin ijoko jikin. Emaroñ kar kajitõk ñan kalaplok ijoko jikin bwe en maroñ lõñlok ro rej kabuñ ñan Anij eo emol. *
Kein karuo, Jebez ear eowore Anij bwe ‘pein’ en bed ibben. Ilo kõkkar, pein Anij ej kajur eo an, im ej kajerbale ñan jibañ dri karejar ro an. (1 Kronikel 29:12) Bwe en lo uak in kajitõk ko an, Jebez ear reilok ñan Anij, eo im emaroñ jibañ ro im rej tõmak ilo e.—Aiseia 59:1.
Kein kajilu, Jebez ear jar: “Kejbãrok iõ jen nana, bwe en jab kaburomõj iõ.” Nan ko “bwe en jab kaburomõj iõ” emaroñ kalikar bwe Jebez ear jar, jab bwe en deor jen jorrãn, ak bwe en jab lap an buromõj kin wãwen ko rej walok jen men ko renana.
Jar eo an Jebez ear kalikar bwe ear kaurõk kabuñ eo emol im ear wor an tõmak im liki ilo Eo ej Roñjake jar ko. Ewi wãwen an kar Jeova emakõt? Bwebwenato in ekadu ej kajemlok kin nan kein: “Im Anij e ar lelok ñõn e men eo e ar kajitõk kake.”
Eo ej Roñjake jar ko ejañin oktak. Ej mõnõnõ in roñjake jar ko an ro im rej kabuñ ñan e. Ro im ewor air tõmak im liki ilo e remaroñ liki nan kein: “Bwe elañe jej kajitõk iben kin jabrewõt men eo ekar ñõn ankil An, Ej roñjake kij.”—1 Jon 5:14.
[Kamelele eo Itulal]
^ Ãt in Jebez ej itok jen nan eo emaroñ melelen “iñtan.”
^ Book eo etan Targums, ukok eo an dri Ju kin Jeje ko Rekwojarjar, rar ukõt nan ko an Jebez ilo wãwen in: “Kejerammõn iõ kin ajiri ro, im kalaplok tõreren ko aõ kin dri kalor ro.”